7 مامىر كۇنى ديەگو مارادونا بىرىككەن اراب امىرلىگى چەمپيوناتىنىڭ ەكىنشى ديۆيزيونىنداعى «ال-فۋدجايرا» كومانداسىنىڭ باس باپكەرى بولىپ تاعايىندالعان بولاتىن. تانىستىرۋ راسىمىندە ارگەنتينالىق مامان قازاقستاننان, رەسەيدەن ۇسىنىس تۇسكەنىن ايتتى. دەگەنمەن, بۇل باپكەرلىك قىزمەت ەكەنىن اشىپ ايتپادى.
«مەن فۋتبولدى, ستاديونداردى قاتتى ساعىندىم. تەلەديدار الدىندا وتىرىپ كورۋدى ەمەس سول ماتچتىڭ ورتاسىندا ءجۇرۋدى ارماندايمىن. كوماندانى جاتتىقتىرۋدىڭ قانداي ەكەندىگىن تاعى دا سەزىنگىم كەلەدى. بۇل «ال-فۋدجايرا» كومانداسىنا كەلگەنىمدەگى باستى ماقساتىم بولاتىن.
قازىر ويىمنىڭ ءبارى «ال-فۋدجايرا» كومانداسىندا. ەندىگى بار ەموتسيامدى, فيزيكالىق جانە مورالدىق كۇشىمدى وسى جوباعا ارناعىم كەلەدى. ماعان الەمنىڭ كوپتەگەن ەلدەرىنەن ۇسىنىس ءتۇستى. ولاردىڭ اراسىندا قازاقستان دا, رەسەي دە بولدى. ال اگەنتىم سولاردان ەڭ ۇزدىك ۇسىنىستى ىرىكتەپ الدى», دەدى مارادونا.
ەستەرىڭىزگە سالا كەتەيىك, ديەگو ارماندو مارادونا باس باپكەر رەتىندە ءوزىن وسىمەن ءۇشىنشى رەت سىناپ كورمەك. وسىعان دەيىن ول 2008-2010 جىلدار ارالىعىندا ارگەنتينا ۇلتتىق قۇراماسىن, ال 2011/12 ماۋسىمىندا بىرىككەن اراب امىرلىگىنىڭ «ال ۆاسل» كلۋبتارىن جاتتىقتىرعان.
ال فۋتبولشى كەزىندە 1976-1997 جىلدارى ارگەنتينانىڭ «ارگەنتينوس حۋنيورس», «بوكا حۋنيورس», «نيۋس ولد بويز», يسپانيانىڭ «بارسەلونا», «سەۆيليا» جانە يتاليانىڭ «ناپولي» كوماندالارىندا ويناعان. ارگەنتينا ۇلتتىق قۇراماسىنىڭ ساپىندا 91 ويىنعا قاتىسىپ, 34 گولدىڭ اۆتورى اتاندى. «البيسەلەستە» ۇجىمىمەن 1986 جىلى الەم چەمپيونى اتانسا, كەلەسى مۋنديالدا فينالعا جەتكەن.
56 جاستاعى مامان يتاليانىڭ ەكى دۇركىن چەمپيونى جانە «ناپولي» تاريحىنداعى ۇزدىك سۇرمەرگەن اتاندى. ال 2000 جىلى فيفا نۇسقاسى بويىنشا ءجۇز جىلدىڭ ۇزدىك ويىنشىسى اتاعىنا يە بولدى.