بۇگىندە جۇرتشىلىققا سپورتتىڭ ارتىقشىلىعىن ايتىپ جاتۋدىڭ ءوزى ارتىق. جىل سايىن ءبىزدىڭ ەلىمىزدە دە سپورت كۇنى كەڭىنەن اتالىپ وتەدى. بيىل رۋدنىي قالاسىنداعى «گورنياك» كومانداسىنىڭ حوككەيشىلەرى وسى ءتول مەرەكەسىن جول ۇستىندە اتاپ ءوتتى. بىلتىر كەنشىلەر كومانداسى ون جىلدىڭ ىشىندە ءبىرىنشى رەت قازاقستان كۋبوگىن قانجىعالاپ قايتقان ەدى. رۋدنىيلىقتاردىڭ بيىلعى دايىندىعى دا جامان ەمەس. ءبىز حوككەيشىلەر ساپارى الدىندا كوماندانىڭ باس باپكەرى سەرگەي موگيلنيكوۆپەن اڭگىمەلەسكەن ەدىك.
– 2010 جىلعى كۋبوك جەڭىمپازىنىڭ بيىلعى شابىسى قالاي بولماق؟
– حوككەيدەن قازاقستان كۋبوگى – ماڭىزدى تۋرنيرلەردىڭ ءبىرى. مەنىڭ ويىمشا, قازىر بارلىق كوماندالاردىڭ دايىندىق دەڭگەيى بىردەي. جەرەبە بويىنشا, ءبىز قاراعاندىلىق «سارىارقا», كوكشەتاۋلىق «ارلان», وسكەمەندىك «كازتسينك-تورپەدو-2» جانە بيىل قۇرىلعان جاڭا «استانا» كوماندالارىمەن ءبىر توپتامىز. جارىستا بىلتىرعى جەڭىستىڭ كەزدەيسوق ەمەستىگىن بۇل جولى دا دالەلدەۋگە ۇمتىلامىز. قىسقاسى, الىسپاي بەرىسپەيمىز.
– كوماندانىڭ تۋرنيرگە دايىندىعى قالاي؟ دەمالىس جىگىتتەردى بوساتىپ جىبەرگەن جوق پا؟
– كوماندا رۋدنىيعا كەزەكتى دەمالىستان كەيىن جينالدى. الدىمەن جان-جاقتى مەديتسينالىق تەكسەرۋدەن وتتىك, «گورنياك» ويىنشىلارىنىڭ بارلىعى دا شار بولاتتاي شىمىر ەكەندىگىن كورسەتتى. جەرگىلىكتى سپورت بازاسىندا شامالى دايىندالعاننان كەيىن, جىگىتتەر ون كۇن «سوسنوۆىي بور» ساناتوريىندە بولدى. وندا كۇنىنە ءۇش رەت جاتتىعۋ جۇمىسىن ءجۇرگىزدىك. رۋدنىيعا كەلگەن كۇننىڭ ەرتەڭىندە كوماندا مۇز ايدىنىنا شىقتى. جاقىندا ويىنشىلاردىڭ بارلىعى دا جاڭا فورما الدى, دايىندىقتى كۇشەيتىپ, دەمالىسسىز جۇمىس ىستەۋدەمىز.
– جاڭا فورما دەمەكشى, حوككەيدىڭ سپورتسۇيەر قاۋىمعا بەرەر راحاتى كوپ بولعانىمەن, ءوزى ارزانعا تۇسپەيتىنى بەلگىلى. رۋدنىي سياقتى شاعىن قالادا جالپى حوككەيدىڭ دامۋىن جانە «گورنياك» كومانداسىن قولداپ وتىراتىن دەمەۋشى بار ما؟
– راس, حوككەي – قىمبات سپورت. حوككەي كومانداسى جاقسى ءناتيجەگە جەتۋى ءۇشىن وعان كۇشتى جاتتىعۋ جۇمىستارى كەرەك, ال ول قوماقتى قارجىسىز جۇزەگە اسپايدى. دەمەۋشى دەگەندە, الدىمەن ENRC كورپوراتسياسى جانە «ENRC كومەك» كورپوراتيۆتىك قورىن ايتامىز. كورپوراتسيا جىل سايىن «گورنياك» حوككەي كومانداسىن دامىتۋعا شامامەن 100 ميلليون تەڭگەدەن استام قاراجات بولەدى. وسىنداي قارجىلاي قولداۋدىڭ ارقاسىندا كوماندا حوككەي قۇرالدارى مەن سپورتتىق فورماسىن جاڭالاپ وتىرامىز. بيىل كومانداعا جاڭا ويىن فورماسى الىندى, ونى حوككەيشىلەر 10 قىركۇيەكتە وتەتىن قازاقستان چەمپيوناتىندا كيىپ شىعادى.
مۇنىڭ سىرتىندا ENRC كورپوراتسياسى جانە «ENRC كومەك» كورپوراتيۆتىك قورى تەك ءبىزدىڭ وبلىستا عانا ەمەس, ەلىمىزدىڭ باسقا وڭىرىندە دە سپورتتىڭ كەڭ تاراۋىنا قولداۋ كورسەتەدى. بيىلعى جىلى كورپوراتسيا قازاقستانداعى سپورتتىق جوبالار ءۇشىن 800 ميلليون تەڭگەگە جۋىق دەمەۋشىلىك كومەك كورسەتتى. ال وتكەن جىلى وسى ماقساتقا جالپى 765 ميلليون تەڭگە بولگەن بولاتىن.
دەمەۋشىلىك جونىندە ءسوز قوزعالعاندا ENRC قۇرامىنا كىرەتىن «سوكولوۆ-سارىباي كەن ءوندىرۋ ءبىرلەستىگى» اكتسيونەرلىك قوعامى (سسكوب) تۋرالى دا ايتپاسقا بولمايدى. بىرلەستىك پرەزيدەنتى مۇحامەدجان تۇرداحۋنوۆ ون جىل بويى قوستاناي وبلىستىق شايبالى حوككەي فەدەراتسياسىن باسقارىپ كەلەدى. بيىل كاسىپورىن رۋدنىيداعى اشىق ستاديوندى قالپىنا كەلتىرۋ ءۇشىن 150 ميلليون تەڭگە ءبولدى, وندا «گورنياك» ماۋسىم الدىنداعى جاتتىعۋلارىن وتكىزەدى. جۇگىرۋ جولدارى, فۋتبول, ۆولەيبول الاڭدارى بار بۇل ستاديون قوستاناي وبلىسىنداعى ەڭ ۇزدىك سپورت نىسانى بولماق.
جاڭا ويىن ماۋسىمى باستالار الدىندا كلۋبتىڭ اكىمشىلىگى, جاتتىقتىرۋشى-جەتەكشى قۇرامى ءجانە بارلىق ويىنشىلارى اتىنان ENRC كورپوراتسياسىنا, «ENRC كومەك» كورپوراتيۆتىك قورىنا ءجانە «سسكوب» اكتسيونەرلىك قوعامى مەن رۋدنىي قالاسى اكىمدىگىنە سپورتتى قولداعانى جانە ارقاشان قاسىمىزدان تابىلعانى ءۇشىن زور ريزاشىلىعىمدى بىلدىرەمىن.
– «گورنياك» جاڭا ماۋسىمدا مۇز ايدىنىنا قانداي قۇرامدا شىقپاق؟
– ءبىز بۇگىندە كومانداعا جاستاردى تارتۋدى, ويىندى ولاردىڭ ەسەيۋى مەن تاجىريبە جيناقتاۋىنا قاراي قۇرۋدى ويلاستىرىپ وتىرمىز. ەرەسەك سپورتشىلاردىڭ تالابى كۇشتى بولعانمەن, ولاردىڭ ويىن ناتيجەسى شامالى, كورەرمەننىڭ دەلەبەسىن قوزدىرا تۇسەتىن شيەلەنىسكەن ويىنداردى ولار كورسەتە بەرمەيدى. ال جاستار ويىن جولىندا كوپ ەڭبەكتەنەدى, جاتتىقتىرۋشىنى جاقسى تىڭدايدى, تەز ءتۇسىنەدى. وسىعان بايلانىستى كومانداعا قازاقستاندىق جاس بالالاردى العاندى دۇرىس كوردىك. وسكەمەن حوككەي مەكتەبىنىڭ ءتورت تۇلەگىن –الەكساندر نۋرەكانى, ەۆگەني ەرگەردى, الەكساندر كۋرشۋكتى جانە ميحايل لازارەنكونى شاقىردىق. وتكەن جىلى قاتارىمىزعا قوسىلعان ءوسكەمەندىك لەونيد مەتالنيكوۆ, رينات وماربەكوۆ جانە ۆياچەسلاۆ فەدوسەنكو «گورنياك» قۇرامىندا وينايتىن بولادى. سونىمەن قاتار, كورشى چەليابىلىك الەكساندر ششۋكين, قاراعاندىلىق 1993 جىلى تۋعان ارتەم يۆانوۆ پەن ماگنيتوگورسكىدەن كەلگەن, 1994 جىلعى الەكسەي بىۆالتسەۆ تە كوماندا قۇرامىن تولىقتىرا ءتۇستى. الەكسەي جاستىعىنا قاراماستان رەسەيدىڭ قۇراما كومانداسىندا ءبىرنەشە رەت جاقسى ويىنى ءۇشىن ماراپاتتالعان جىگىت. ال جەرگىلىكتى جىگىتتەردەن شىمىر بولاتتان سوققانداي اندرەي شەۆچەنكو مەن ءوزىمىز ۇكىلى ۇمىتىمىزگە سانايتىن اندرەي مەديانيكتى ايتسام دا جارار. مىنە, وسى اتالعان جىگىتتەر بۇرىنعى ويىنشىلاردان كەم ءتۇسپەيدى دەپ ويلايمىن.
– ويىنشىلاردىڭ ىشىندە ەسىمى كورەرمەن جادىندا جۇرەتىن حوككەيشىلەر بار ما؟
– كومانداعا بۇرىن «گورنياكتا» ءبىر ەمەس, بىرنەشە ماۋسىم ويناعان ەكى ويىنشى بىردەن ورالدى. ولار شابۋىلشى الەكساندر وبۋحوۆ پەن قورعاۋشى سەرگەي ليتۆينوۆ. بۇل ەكى جىگىت قۇرامىندا ويناعان كەزدە «گورنياك» قازاقستان چەمپيوناتىنىڭ جۇلدەگەرى جانە ءبىرىنشى ليگاداعى كوماندالار اراسىندا رەسەي بىرىنشىلىگىنىڭ («ۋرال-باتىس ءسىبىر» ايماعى) جەڭىمپازى اتاندى. ايتپاقشى, وسىدان ءتورت جىل بۇرىن «گورنياك» قۇرامىندا جۇرگەندە س.ليتۆينوۆ تۋريندەگى ۋنيۆەرسيادادا قازاقستاننىڭ اتىن شىعارىپ, قانجىعاعا قولا مەدال سالىپ قايتقان ەدى. بيىل جانكۇيەرلەر پاۆەل فيليپەنكونىڭ دا ويىنىن تاماشالايتىن بولادى. ول جاراقات السا دا ساپتان شىققان جوق, بۇگىندە جىگىتتەرمەن بىرگە جاتتىعۋدى كۇشەيتكەن. وتكەن جىلى مۇز ايدىنىمەن قوشتاسۋدى ويلاعان ەۆگەني لياپۋنوۆپەن جانكۇيەرلەر بيىل دا كەزدەسپەك. قىسقاسىن ايتقاندا, كوماندا قۇرامىندا ءتاجىريبەلىلەر دە, «جاڭا پەرىلەر» دە بار. ەڭ باستىسى, جۇدىرىقتاي جۇمىلعان جىگەرلى ۇجىم قۇرۋ باستى ماقسات.
اڭگىمەلەسكەن ءنازيرا جارىمبەتوۆا,
قوستاناي وبلىسى,
رۋدنىي قالاسى.