استاندا «يننوۆاتسيالىق بيزنەس-جوبالاردىڭ NIF$50K» رەسپۋبليكالىق بايقاۋىنىڭ تۇساۋكەسەرى بولىپ ءوتتى. وعان قاتىسۋشىلار كەيىن كتك تەلەارناسىنداعى «يننوۆاتسيالىق فورساج» ينتەللەكتۋالدىق رەاليتي-شوۋىنا قاتىسا الادى. باس ءجۇلدەگەرگە بيىلعى جىلدىڭ قاراشاسىندا بولاتىن يننوۆاتسيالىق فورۋمدا ەلباسىنىڭ قولىنان 7,5 ملن. تەڭگە كولەمىندە گرانت تاپسىرىلماق.
بايقاۋدى ۇلتتىق يننوۆاتسيالىق قور يندۋستريا جانە جاڭا تەحنولوگيالار مينيسترلىگىمەن ءبىرلەسە وتىرىپ ۇيىمداستىردى.
جوبا حالىقتىڭ يننوۆاتسيالىق بەلسەندىلىگىن كوتەرۋگە جانە جاڭا تەحنولوگيالار سالاسىنداعى الەۋمەتتىك ماڭىزعا يە باستامالاردى قولداۋعا, يننوۆاتسيالىق جوبالاردىڭ الەۋەتتى يننوۆاتورلارى مەن جاساقتاۋشىلارىن بيزنەس-جوسپارلاۋعا ۇيرەتۋگە باعىتتالعان جانە 2010-2014 جىلدارعا ارنالعان ۇدەمەلى يندۋستريالىق-يننوۆاتسيالىق دامۋ باعدارلاماسىنىڭ اياسىندا ىسكە اسۋدا.
بايقاۋدى ۇيىمداستىرۋشىلاردىڭ ايتۋىنشا, بۇل تەلەۆيزيالىق شوۋ ناقتى مىسالدارمەن بۇكىل قازاقستانعا يننوۆاتسيالار سالاسىنداعى جەكە بىرەگەي بيزنەس-جوبالاردى دامىتۋدىڭ كەڭ مۇمكىندىكتەرىن كورسەتىپ بەرەدى. سونىمەن بىرگە, «يننوۆاتسيالىق فورساج» – ينۆەستورلاردى تابۋدىڭ جانە زاماناۋي تەلەۆيزيانىڭ مۇمكىندىكتەرىنىڭ ارقاسىندا ءبۇكىل ەلگە ءوز يدەيالارى جايلى جار سالۋدىڭ تاماشا ءمۇمكىندىگى.
ءابدىراحمان قىدىربەك.