پارلامەنت ءماجىلىسىنىڭ ءتوراعاسى ورال مۇحامەدجانوۆ ەكى كۇندىك جۇمىس ساپارىمەن كەشە اقمولا وبلىسىنا كەلگەن بولاتىن. ساپار ماقساتى, جەرگىلىكتى جەرلەردە زاڭداردىڭ قالاي جۇمىس ىستەپ جاتقانىن, وسىعان وراي ادامداردىڭ پىكىرلەرىن ءبىلۋ, سونىمەن قاتار ءوڭىر حالقى ەل ءتاۋەلسىزدىگىنىڭ 20 جىلدىعىن قانداي كوڭىل-كۇيدە قارسى الاتىنىن باعامداۋ بولىپ تابىلادى. بۇعان قوسا, حالىقتىڭ پارلامەنتپەن كەرى بايلانىسىن جانداندىرىپ, وعان ناقتى ءىس-قيمىل بەرۋگە دە باسا نازار اۋدارىلماق.
و.مۇحامەدجانوۆ ءوزىنىڭ جۇمىس ساپارىن وبلىستىڭ شورتاندى اۋدانىنان باستادى. وندا ول باراەۆ اتىنداعى استىق شارۋاشىلىعى ينستيتۋتىندا بولدى. استانالىق وبلىس قازاقستاننىڭ اسا استىقتى وڭىرلەرىنىڭ ءبىرى بولىپ تابىلادى. كوپتەگەن جەتەكشى تەحنولوگيالار, داقىلداردىڭ جاڭا تۇرلەرى وسىندا جاسالادى. بيىلعى جىل قازاقستان ءۇشىن ءداندى داقىلدار تۇرعىسىنان العاندا مولشىلىق جىلى بولعالى تۇر. سوندىقتان ءماجىلىس توراعاسى الداعى ەگىن وراعىنىڭ ستراتەگياسى مەن تاكتيكاسىنا بايلانىستى عالىمداردىڭ ۇسىنىس-پىكىرلەرىن بىلگىسى كەلگەنى دە انىق.
«نوۆوكۋبانسك» جاۋاپكەرشىلىگى شەكتەۋلى سەرىكتەستىگىندە ورال بايعونىس ۇلى كۇزگى جيىن-تەرىن جۇمىسىنا دايىندىق بارىسىمەن تانىسىپ, «باي ازات» جاۋاپكەرشىلىگى شەكتەۋلى سەرىكتەستىگىندە ەت وڭدەۋ باعىتىنداعى ءىس-قيمىلدارعا قىزىعۋشىلىق تانىتتى جانە شورتاندى كەنتىندەگى №3 ورتا مەكتەپتىڭ پەداگوگيكالىق ۇجىمىمەن جۇزدەستى. سونداي-اق, اۋدان اكتيۆىنىڭ جۇمىسىنا قاتىستى.
پارلامەنت ءماجىلىسى توراعاسىنىڭ بۇلاندى اۋدانىندا بولۋ باعدارلاماسى دا تىعىزدىعىمەن ەرەكشەلەندى. سپيكەر «نانار» مال شارۋاشىلىعى كەشەنىن ارالاپ, «ارنا» جاۋاپكەرشىلىگى شەكتەۋلى سەرىكتەستىگىنىڭ جاڭا ەلەۆاتورىن كوردى. سونىمەن قاتار, «بالداۋرەن» بالالار باقشاسىندا, اۋداندىق اۋرۋحانادا بولدى.
و.مۇحامەدجانوۆ كەشە كەشكىسىن زەرەندى اۋدانىنا كەلىپ, وندا دەنە شىنىقتىرۋ-ساۋىقتىرۋ كەشەنى قۇرىلىسىنىڭ بارىسىمەن تانىستى.
باقبەرگەن امالبەك, اقمولا وبلىسى.