كەشە استانادا قازاقستان حالىقتىق كوممۋنيستىك پارتياسى ورتالىق كوميتەتىنىڭ قوعامدىق تىڭدالىمدارى ءوتتى. وعان اتالعان پارتيانىڭ ەلىمىزدىڭ ءار وڭىرىندەگى بەلسەندى مۇشەلەرى قاتىستى.
كۇن تارتىبىنە بىرنەشە ماسەلەلەر قويىلدى. ولاردىڭ ىشىندە تۇرعىن ءۇي-كوممۋنالدىق شارۋاشىلىعىنىڭ جۇمىستارى, كوممۋنالدىق قىزمەتكە تولەمدەر, قوعامدىق كولىكتەردە ءجۇرۋ اقىلارى سىندى ماسەلەلەر تالقى تارازىسىنا ءتۇستى. قحكپ وك ءبىرىنشى حاتشىسى ۆلاديسلاۆ كوسارەۆتىڭ ايتۋىنشا, قوعام مەملەكەتتىك ورگاندارعا ەلدەگى مونوپوليستەردىڭ باعانى تىم شارىقتاتىپ جىبەرۋ ۇدەرىسىمەن كۇرەسۋگە كومەكتەسۋى قاجەت. بۇل جەردە حالىقتىڭ كۇش-جىگەرى ايتارلىقتاي ماڭىزعا يە بولماق.
– بۇگىنگى وتىرىس بارىسىندا قىزىقتى ۇسىنىستار مەن پىكىرلەر ايتىلدى. ءبىز ولاردىڭ بارلىعىنىڭ باسىن ءبىر قۇجاتقا بىرىكتىرەتىن بولامىز. ودان كەيىن اتالعان قۇجاتتى ءتيىستى ورگاندارعا, سونداي-اق, ۇكىمەت پەن مەملەكەت باسشىسىنىڭ نازارىنا تىكەلەي ۇسىنعالى وتىرمىز. سول ارقىلى ەل ىشىندە جاڭا وزگەرىستەردىڭ ورىن العانىن كوزدەمەكپىز. سەبەبى, مۇنداي قادامدار ەڭ الدىمەن, قارجىلىق رەسۋرستاردىڭ ءتيىمسىز پايدالانىلۋىنا شەكتەۋ قويۋعا مۇرىندىق بولادى. ەكىنشىدەن, كوممۋنالدىق تاريفتەردى ءجونسىز جوعارىلاتۋ كەرەك پە, جوق پا دەگەن ساۋالعا جاۋاپ ىزدەۋگە سەپ بولماق, – دەدى ۆ.كوسارەۆ. – بۇل رەتتە, ءبىز اتالعان قىزمەت تۇرلەرىنە باعانىڭ وسىرىلۋىنە قاتىستى 2 جىلدىق مەرزىم كولەمىندە موراتوري جاريالاۋدى ۇسىنامىز.
ۆ.كوسارەۆتىڭ پىكىرىنشە, كوممۋنالدىق مونوپوليستەر ءوزىنىڭ جۇمىسىنا اقى الۋ ۇدەرىسىن جۇرگىزۋدە ەشقانداي شەڭبەرگە سىيمايتىن, كەيدە زاڭ تالاپتارىنا سايكەس كەلمەيتىن ساياساتتى باسشىلىققا الۋدى ادەتكە اينالدىرعان. وسى ورايدا, پارتيانىڭ ءبىرىنشى حاتشىسى مۇنداي زاڭسىز ۇدەرىستەرگە باعىتتالعان ءموراتوريدى رەسپۋبليكالىق كولەمدە وتكىزۋ قاجەتتىگىنە توقتالىپ ءوتتى. سونداي-اق, ول قازاقستاندىق ازاماتتاردى زاڭ تالاپتارىنا قايشى ارەكەت ەتەتىن حالىققا قىزمەت كورسەتۋ مەكەمەلەرىنىڭ جۇمىسىنا بىرلەسە توسقاۋىل قويۋعا شاقىردى.
«ەگەمەن-اقپارات».