قوستاناي اۋدانىنا قاراستى ەڭبەك اۋىلىندا 100 ورىندىق مەكتەپ پايدالانۋعا بەرىلدى. اۋىلدىق جەرلەردەگى مەكتەپ ينفراقۇرىلىمىن جاڭعىرتۋعا باعىتتالعان مەملەكەتتىك باعدارلاما اياسىندا بوي كوتەرگەن ەكى قاباتتى ءبىلىم ورداسى 1 ملرد 220 ملن تەڭگەدەن استام قارجىعا سالىنعان, دەپ جازادى Egemen.kz.
جاڭا مەكتەپتىڭ اشىلۋ سالتاناتىنا وبلىس اكىمى قۇمار اقساقالوۆ قاتىسىپ, اۋىل تۇرعىندارىن قۇتتىقتادى.
«بۇل مەكتەپ – تەك ەڭبەك اۋىلىنىڭ عانا ەمەس, بۇكىل وبلىستىڭ قۋانىشى. بۇگىن ەسىگىن ايقارا اشقان جاڭا ءبىلىم ورداسى زاماناۋي تالاپتارعا ساي جانە بالالاردىڭ ساپالى ءبىلىم الۋعا جان-جاقتى جاعداي جاسالعان. جاڭا مەكتەپتە كەلەشەكتە ەلىن سۇيەتىن, ءبىلىمدى, تاربيەلى ۇرپاق ءوسىپ شىعادى دەپ سەنەمىن», دەدى ءوڭىر باسشىسى.
اۋىل مەكتەبى زاماناۋي ءبىلىم بەرۋ تالاپتارىنا ساي سوڭعى ۇلگىدەگى ادىستەمەلىك كەرەك-جاراقپەن جابدىقتالعان. جاڭا ءبىلىم عيماراتىندا 14 وقۋ كابينەتى, بىرنەشە شەبەرحانا, مۋلتيمەديالىق, باعدارلامالىق, ينتەراكتيۆتى كابينەتتەر, مەديتسينا ءبولىمى, اسحانا جانە كەڭ سپورت زالى بار.
ورالدا 79 بالاباقشا مەن 36 مەكتەپ سالىنادى
مەكتەپتە 77 وقۋشى ءبىلىم الاتىن بولادى. مەكتەپالدى دايارلىق توبىندا 8 بالا تاربيەلەنىپ جاتىر. پەداگوگيكالىق ۇجىمدا 30 مۇعالىم جۇمىس ىستەيدى.
«اۋىلدىڭ بۇرىنعى مەكتەبى ادبەن توزىپ كەتكەندىكتەن, قىستا جىلۋ ۇستاماي, بالالارىمىز توڭىپ وتىرۋشى ەدى. وسىدان 15 جىل بۇرىن مەكتەپ ماسەلەسىن كوتەرىپ مينيسترلىككە دەيىن حات جازعانبىز. وبلىس باسشىلىعىنداعى ازاماتتار وسى وتىنىشىمىزگە قۇلاق اسىپ, بۇگىن, مىنە, وقۋشىلار جاڭا مەكتەپكە كىرىپ وتىر. قانداي تاماشا, قاراساڭ كوز تويارلىق. ىشى كىرسە شىققىسىز. وتە قۋانىشتىمىز. ەل تىلەگىن ورىنداعان ازاماتتارعا العىس ايتامىز», دەيدى اۋىل اقساقالى جاقسىلىق ءجۇنىسوۆ.
ەسكە سالا كەتەيىك, بيىل ەلىمىزدە شامامەن 47 مىڭ وقۋشىعا ارنالعان 90 جاڭا مەكتەپتىڭ قۇرىلىسى جوسپارلانعان.
قوستاناي وبلىسى