...ينستيتۋتقا رەكتور تانىستىرىلدى
ءبىلىم جانە عىلىم ءمينيسترىنىڭ بۇيرىعىمەن اتىراۋ مۇناي جانە گاز ينستيتۋتىنىڭ رەكتورى قىزمەتىنە تاعايىندالعان پروفەسسور دۇيسەمبەك قۇلجانوۆ ارىپتەستەرىنە تانىستىرىلدى. ول بۇرىنعى گۋرەۆ پەداگوگيكا ينستيتۋتىنىڭ فيزيكا-ماتەماتيكا فاكۋلتەتىنىڭ تۇلەگى, وقىتۋشىلىق ەڭبەك جولىن دا وسى وقۋ ورنىندا باستاعان. اتىراۋ مۇناي جانە گاز ينستيتۋتىندا تابان اۋدارماستان ەڭبەك ەتكەن ول ءار جىلدارى كافەدرا مەڭگەرۋشىسى, فاكۋلتەت دەكانى, پرورەكتوردىڭ ورىنباسارى, پرورەكتور, ءبىرىنشى پرورەكتور سياقتى جاۋاپتى جۇمىستاردى ابىرويمەن اتقاردى. ەڭبەك ەتە ءجۇرىپ, عىلىمي ىزدەنىسىن دە توقتاتقان جوق. 2004 جىلى ءال-فارابي اتىنداعى قازۇۋ-دە فيزيكا-ماتەماتيكا عىلىمدارى بويىنشا دوكتورلىق ديسسەرتاتسياسىن ءساتتى قورعادى. 2010 جىلى وعان اتالعان جوعارى وقۋ ورنىنىڭ پروفەسسورى عىلىمي اتاعى بەرىلدى.
جولداسبەك شوپەعۇل,
اتىراۋ وبلىسى.
...گۇلدەر فەستيۆالى ءوتتى
وسىمەن 8-ءشى رەت ۇيىمداستىرىلعان بۇل بايقاۋعا قاراعاندىلىق گۇل وسىرۋشىلەردىڭ ۇلكەن توبى قاتىستى. اسەم وسىمدىكتىڭ سان الۋان ءتۇرى ونى قىزىقتاۋشىلاردىڭ نازارىنا ۇسىنىلدى. بايقاۋ كوز جەتكىزگەندەي قالادا گۇل باپتاۋدىڭ شەبەرلەرى از بولماي شىقتى. ولاردىڭ اراسىندا ۆەنەرا بەكماعامبەتوۆا, سۆەتلانا ورلوۆا سياقتى وسىناۋ ءىستى سۇيەرمەندەرىڭ وزىندىك قولتاڭبالارى كورۋشىلەر كوڭىلىن باۋرادى. جەڭىمپازدار ماراپاتتالىپ, سىيلىقتار تاپسىرىلدى.
فەستيۆالدە جۇرتشىلىقتىڭ كوزىن قۋاندىرعان گۇل شوقتارىنىڭ ءبىرازى كوپ بالالى انالارعا, سول كۇنى وتاۋ تىككەن جاس جۇبايلارعا, بالاباقشالارعا تارتۋ ەتىلدى.
ايقىن نەسىپباي,
قاراعاندى.
...ناسيحات توبى جۇرتپەن جۇزدەستى
استانادان ارنايى كەلگەن اقپاراتتىق-ناسيحاتتىق توپ وكىلدەرى ايماق تۇرعىندارىمەن كەزدەستى. كەزدەسۋگە وبلىس اكىمىنىڭ ورىنباسارى رزاقۇل نۇرتاەۆ قاتىستى.
وسىعان دەيىن ءدىن ىستەرى ءجونىندەگى اگەنتتىك قۇرىلعانى بەل-گىلى. ونىڭ قۇرامىنا ەكى عىلىمي ورتالىق كىرەدى. سونىمەن قاتار, وبلىستارداعى ءدىن ىستەرى جونىندەگى دەپارتامەنتتەر دە وسى اگەنتتىكتىڭ قۇزىرىنا بەرىلگەن. اتالعان اقپاراتتىق-ناسيحاتتىق توپتىڭ قۇرامىندا ءدىن ىستەرى جونىندەگى اگەنتتىكتىڭ ساراپشىسى وسپان احمەتوۆ, ءدىنتانۋشى باحادىر ابدۋللا, حالىقارالىق ءمادەنيەت جانە ءدىن ورتالىعىنىڭ باس عىلىمي قىزمەتكەرى مەيرام يمانباەۆ جانە قازاقستان مۇسىلماندار ءدىني باسقارماسىنىڭ وكىلى سامات مۇنارباەۆتار بار. توپ مۇشەلەرى رەسپۋبليكاداعى ءدىني احۋال مەن ءدىني ەكسترەميزمنىڭ الدىن الۋ ماسەلەلەرى بويىنشا حابارلاما جاسادى.
ەرجان بايتىلەس,
قىزىلوردا.