بىرلەسكەن قادامدار وڭ باعالاندى

كەشە سىرتقى ىستەر ءمينيسترى ەرجان قازىحانوۆ اقش-تىڭ اۋعانستان جانە پاكستان جونىندەگى جاڭادان تاعايىندالعان ارنايى وكىلى مارك گروسسمانمەن كەزدەستى. كەزدەسۋدە ەكى ەل اراسىنداعى ىنتىماقتاستىقتى تەرەڭدەتۋدىڭ ورىندالۋ بارىسى اڭگىمە بولدى. سونداي-اق تاراپتار وڭىرلىك قاۋ­­ىپ­­سىزدىك پەن اۋعانستانداعى جاع­دايدى تۇراقتاندىرۋداعى بىرلەسە ارەكەت ەتۋدىڭ جايىنا نازار اۋ­داردى. بۇل ماسەلەدە قازاق­ستان­نىڭ ۇلەسى زور. مۇنداي قادامدار اقش تاراپىنان وڭ باعالانادى جانە بىرلەسە ارەكەت ەتۋ  وتە ما­ڭىز­دى ءىس بولىپ تابىلادى. وسى­عان بايلانىستى گروسسمان سىرت­قى ىستەر ءمينيسترى ە.قازىحانوۆقا ءوزى­نىڭ العىسىن جەتكىزدى. سو­نى­مەن قا­تار, كەزدەسۋدە الداعى ايلاردا وتەتىن كەزدەسۋلەر با­رى­سى دا ءسوز بولدى. ونىڭ ىشىندە بۇۇ باس اسسام­بلەيا­سىندا جانە ىس­تام­بۇل­دا قاراشا ايىندا وتەتىن ءىس-شارالار شەڭبە­رىن­دەگى كەزدەسۋلەر بار. وعان اۋ­عان­ستاننىڭ ەڭ جاقىن كورشى­لە­رى­مەن بىرگە, اقش پەن قا­زاقستان دا قاتىسادى. سول كەزدەسۋلەردە تەر­رور­شىلدىقپەن كۇرەس ءجا­نە اۋ­عان­ستاندى تۇراق­تان­دىرۋ ءما­سەلەلەرى جان-جاقتى تال­قىلانباقشى. كەزدەسۋدەن كەيىن امەريكالىق ديپلومات بۇقارالىق اقپارات قۇ­رالدارى وكىلدەرىمەن بريفينگ ءوت­كىز­دى. باستى سۇراق جاقىندا اقش-تا جاريالانعان تەررور­شىل­دىققا بەيىم ەلدەردىڭ تىزىمىندە قازاق­ستان­نىڭ دا بولۋىنا قاتىستى قوي­ىلدى. ول وسى ماسەلەگە تۇسىنىك بەرگەن اقش ەلشىلىگىنىڭ ءمالىم­دە­مەسىن قولدايتىندىعىن بىلدىرە كەلىپ, قازاقستان مەن اقش تەررور­شىلدىقپەن كۇرەس جۇرگىزىپ كەلە جاتقان ەلدەر ەكەندىگىن ەرەكشە اتاپ ءوتتى. سوندىقتان دا قازاق­ستان تەررور قاۋپى تۋاتىن ەلدەر ساناتىنا جاتپايدى. ال اقش-تا جاسالعان ءتىزىمنىڭ ناقتى ەلدەرگە ەمەس,  جەكەلەگەن ازامات­تارعا قا­تىس­تى ءتىزىلۋى مۇمكىن, دەدى گروسسمان. ەڭ باستىسى, ۆاشينگتون ەلى­مىزدىڭ تەر­رورشىلدىقپەن كۇرەستى قول­داۋ­ىن باعالايدى جانە ما­ڭىزدى دەپ ەسەپتەيدى. اسقار تۇراپباي ۇلى.