30 تامىزدا ەلورداداعى «قازاق ەلى» مونۋمەنتى جانىنداعى باس الاڭدا ەل تاۋەلسىزدىگىنىڭ 20 جىلدىعى مەن قازاقستان رەسپۋبليكاسى كونستيتۋتسياسىنىڭ 16 جىلدىعىنا ارنالعان اسكەري پاراد وتەدى. وعان قاتىسۋعا استاناعا بارلىق گارنيزونداردان ءارتۇرلى اسكەر تۇرلەرى مەن تەكتەرىنەن, قارۋلى كۇشتەردىڭ وڭىرلىك قولباسشىلىقتارىنان ساربازدار كەلىپ جەتتى. بۇل اسكەري قىزمەتشىلەردى ۋاقىتشا شوعىرلاندىرۋ ءۇشىن 40-شى رازەزدەگى 68665 اسكەري ءبولىمنىڭ جانىنان دالالىق لاگەر بوي كوتەردى. دايىندىق كۇن سايىن وتكىزىلۋدە.
شاتىرلى قالاشىق قاجەتتى ينفراقۇرىلىممەن قامتاماسىز ەتىلگەن. جاۋىنگەرلەر ءۇشىن دالالىق اسحانا جاساقتالىپ, ءۇش مەزگىل تاماقتاندىرۋ ۇيىمداستىرىلعان. مەديتسينالىق بەكەتتەر مەن مونشا جۇمىس ىستەپ تۇر. ءبىر سوزبەن ايتقاندا, 170-تەن استام شاتىردان تۇراتىن بۇل جەر شاعىن قالاعا ۇقسايدى.
30 تامىزدا استانا تۇرعىندارى مەن قوناقتارىنا ءتول اسكەرىمىزدەگى قارۋ-جاراق پەن جاۋىنگەرلىك تەحنيكا تۇرلەرى كورسەتىلەتىن بولادى. ەلوردا اسپانىندا اسكەري ۇشقىشتار جوعارى پيلوتاجدى قيمىلدار جاسايدى.
اسكەريلەر قازىر ءوز شەبەرلىكتەرىن شىڭداۋ ۇستىندە. كۇندەلىكتى ساپ دايىندىعى ولاردان ءتۇزۋ ءجۇرۋدىڭ ءاربىر ميلليمەترلىك ەسەبىن تالاپ ەتەدى. وسى اپتادان باستاپ ساربازدار بويىنداعى بەس قارۋىمەن ساپ دايىندىقتارىن جاساۋعا كىرىستى.
وتانشىل رۋح پەن پاتريوتتىق سەزىمدى تۋ ەتكەن قازاقستاندىق اسكەري قىزمەتشىلەر وزدەرىنە جۇكتەلگەن جاۋاپكەرشىلىكتى دۇرىس تۇسىنەدى. ولار وزدەرىنە قويىلعان مىندەتتەردى ءساتتى ورىنداپ شىعاتىندىقتارىنا نىق سەنىمدى.
قازاقستان رەسپۋبليكاسىنىڭ 20 جىلدىعىنا ارنالعان پارادقا اسكەري قىزمەتشىلەر ۇلكەن جاۋاپكەرشىلىكپەن كەلىپ وتىر. بۇل سەكىلدى ماڭىزدى ءىس-شارالارعا ازىرلىك جاۋىنگەرلەردىڭ ساپ دايىندىعىن شىڭداي تۇسەرى انىق. ءارى اسكەرلەر پارادىنا ۇزدىكتەردىڭ عانا تارتىلاتىنى اقيقات.
بيىلعى اسكەري شەرۋدىڭ كەڭ كولەمدە ءارى قىزىقتى وتەتىنىنە سەنىم بىلدىرۋگە بولادى. سەبەبى, بۇل ءىس-شارا ەل تاۋەلسىزدىگىنىڭ جەتىستىكتەرىن پاش ەتپەك.
وكسانا پارپۋرا, قورعانىس مينيسترلىگى ءباسپاسوز قىزمەتىنىڭ قىزمەتكەرى.
سۋرەتتەردى تۇسىرگەن ەرمەك سارباسوۆ.