كەشە سىرتقى ىستەر مينيسترلىگىندە ۆەدومستۆونىڭ باسپاسوز حاتشىسى ءىلياس وماروۆتىڭ قاتىسۋىمەن بريفينگ ءوتتى.
ءىلياس وماروۆ الدىمەن 18-20 شىلدە ارالىعىندا ەلىمىزدىڭ سىرتقى ىستەر ءمينيسترى ەرجان قازىحانوۆتىڭ بەلگيا كورولدىگىنە, ۇلىبريتانيا جانە سولتۇستىك يرلانديا بىرىككەن كورولدىگىنە, گەرمانيا فەدەراتيۆتىك رەسپۋبليكاسىنا ءىسساپارىنىڭ ماڭىزدىلىعىنا توقتالدى. ونىڭ ايتۋىنشا, بۇل ەۋروپالىق تۋرنە اياسىندا قازاقستاندىق سىرتقى ساياسي ۆەدومستۆونىڭ باسشىسى ءوزىنىڭ بەلگيالىق, ۇلىبريتانيالىق جانە گەرمانيالىق ءارىپتەستەرىمەن كەزدەسىپ, اتالعان ەلدەرمەن ساياسي, ساۋدا-ەكونوميكالىق جانە ينۆەستيتسيالىق سالالارداعى بايلانىستاردى تالقى تارازىسىنا سالاتىن كورىنەدى. ساپار بارىسىندا ايماقتىق جانە جاھاندىق قاۋىپسىزدىك ماسەلەلەرى دە نازاردان تىس قالمايدى. «قازاقستان سىرتقى ىستەر مينيسترىنىڭ ەۋروپالىق ارىپتەستەرىمەن ءوزارا تالقىعا سالاتىن تاعى ءبىر ماسەلە بار. ول ەلباسىنىڭ تاپسىرماسىمەن قولعا الىنىپ, جۇزەگە اسىرىلىپ وتىرعان «ەۋروپاعا جول» مەملەكەتتىك باعدارلاماسى. سونداي-اق, ساپار شەڭبەرىندە جوعارى ءجانە وتە جوعارى دەڭگەيلەردەگى كەزدەسۋلەرگە دە كوڭىل بولىنبەك», دەدى ءباسپاسوز حاتشىسى.
ءدال وسى كۇندەر ارالىعىندا ۆاشينگتوندا امەريكا قۇراما شتاتتارىنىڭ مەملەكەتتىك دەپارتامەنتى وكىلدەرىمەن قازاقستاندىق-امەريكالىق كونسۋلدىق كونسۋلتاتسيالارى دا ءوتكىزىلمەك. بۇعان قازاقستان سىرتقى ىستەر مينيسترلىگىنىڭ جاۋاپتى حاتشىسى ر. جوشىباەۆ باستاعان دەلەگاتسيا قاتىسادى. دەلەگاتسيا قۇرامىندا سىرتقى ىستەر مينيسترلىگىنىڭ جانە اقش-تاعى قازاقستان ەلشىلىگىنىڭ قىزمەتكەرلەرى, ەلىمىزدىڭ مەملەكەتتىك ورگاندارىنىڭ وكىلدەرى بار.
«كەزدەسۋ بارىسىندا ادامداردى جاۋاپقا تارتۋ بويىنشا, سونداي-اق, جوعالعان جانە ۇرلانعان قۇجاتتار تۋرالى (اقش ەلشىلىگى مەن ينتەرپول ارقىلى) اقپارات الماسۋ, ەلەكتروندى قۇجاتتاردى ەنگىزۋ, ازاماتتىق ماسەلەسى, سونىڭ ىشىندە راسىمدىك قۇجاتتاردى دايىنداۋ, جەكە قۇجاتتاردى كۋالاندىرۋ, حالىقارالىق بالا اسىراپ الۋ, ينفراقۇرىلىمدىق شەكارالاردى كۇزەتۋ سەكىلدى ماسەلەلەر تالقىلانباق», دەدى ۆەدومستۆو وكىلى.
بۇل كۇنگى بريفينگتە تاعى بەلگىلى بولعانى, 22 شىلدە كۇنى بۇۇ باس حاتشىسىنىڭ ارنايى وكىلى, بۇۇ ايماقتىق ورتالىعىنىڭ باسشىسى, ەلشى ميروسلاۆ ەنچانىڭ استاناعا ىسساپارمەن جولى ءتۇسپەك. الدىن-الا جوسپارلانعان كەزدەسۋلەر بارىسىندا قازاقستان مەن بۇۇ اراسىنداعى ىنتىماقتاستىق بولاشاعى, ورتالىق ازيا ايماعىندا بەيبىتشىلىك پەن تۇراقتىلىقتى قامتاماسىز ەتۋدەگى ۇدەرىستەر, اۋعانستانداعى جاعدايدىڭ ورتالىق ازياعا اسەرى, شىۇ ءسامميتىنىڭ شەشىمدەرىن ايماقتا ىسكە اسىرۋ, قازاقستاننىڭ يىۇ-عا توراعالىعى ماسەلەلەرىن تالقىلاۋ كوزدەلىپ وتىر.
ءلايلا ەدىلقىزى.