وبلىس كوركەمونەرپازدارىنىڭ قورىتىندى كونتسەرتى ءوتتى. جىل باسىنان بەرى وڭىردەگى 20 اۋدان مەن قالادا جەرگىلىكتى بايقاۋلار وتكەن بولاتىن. وعان اۋىلداردان 12 مىڭنىڭ سىرتىندا ونەرپازدار قاتىستى. «ەل ءىشى – ونەر كەنىشى» دەگەن, اۋىل اراسىنان اتى وزعان انشىلەر مەن بيشىلەر, كۇيشىلەر قوستانايدا ونەر جارىستىردى. قورىتىندى كونتسەرتتىڭ وزىنە وبلىستىڭ ءار شالعايىنان 836 ونەرپاز كەلدى. ماڭدايىن كۇن قاققان ديقان مەن مالشىنىڭ, كەن قازعان كەنشىنىڭ بايلىق تەك قولىندا عانا ەمەس, كوكىرەگىندە ەكەن. وبلىس ورتالىعىنىڭ تالعامپاز جۇرتشىلىعى تۇما بۇلاقتاي تازا ونەردى تاماشالادى.
– بيىلعى كونتسەرت جىلداعىدان ونەرپازداردىڭ كاسىپتىك دەڭگەيىنىڭ جوعارىلاۋىمەن ەرەكشەلەندى. وبلىس ورتالىعىنان ون ساعات ءجۇرىپ جەتەتىن جانگەلدين اۋدانىنان كەلگەن رايا الىمباەۆا «اققۋ» كۇيىن شەرتكەندە زال دۋىلداپ تۇرىپ كەتتى. كورمەيسىز بە, ونەردىڭ قۇدىرەتىن! كاسىپتىك دەڭگەي دەپ وسىنى ايت. قوستاناي اۋدانىنان كەلگەن «عاجايىپ ارەناسى» اتتى تسيركتىك قويىلىم دا كورەرمەندەردى تاڭداندىردى. ءجىتىقارالىق, ارقالىقتىق بيشىلەر دە تامساندىرا ءبىلدى. بارلىق اۋداندار مەن قالالاردان كەلگەن ونەر ۇجىمدارىنىڭ ساحنالىق كوستيۋمدەرى جاڭارتىلعان. ساحنا سۇلۋلىقتان جانىپ تۇردى, – دەيدى وبلىستىق مادەنيەت باسقارماسىنىڭ باستىعى ماريونەلا سلەسار.
جەرگىلىكتى جەرلەردەگى ونەرپازدار بايقاۋى كەزىندە ساحنانى بەزەندىرۋگە دە قازىلار القاسى ۇلكەن ءمان بەرگەن بولاتىن. گالا كونتسەرتتە جاڭادان ەشنارسە ويلاپ تاپپاي-اق, سارىكول, قوستاناي اۋداندارىنىڭ ۇزدىك ساحنالىق بەزەندىرۋلەرى پايدالانىلدى. ساحنادا بارلىعى وننان اسا ونەر جانرى ۇسىنىلدى. دەگەنمەن, بايقاۋدىڭ اتى – بايقاۋ. وندا جۇيرىكتەن جۇيرىك وزاتىنى اقيقات. بۇل جولى گران پري ءجۇلدەسىن تاران اۋدانىنىڭ ونەرپازدارى – بياعانىڭ جەرلەستەرى قانجىعالادى. تاراندىقتار ورىنداعان اندەر مەن بيلەر كاسىبي دەڭگەيىنىڭ جوعارىلىعىمەن, تالعامعا ساي ساحنالىق كوستيۋمدەرىمەن, جانرلارىنىڭ ءار الۋاندىعىمەن كورەرمەننىڭ دە, قازىلاردىڭ دا كوكەيىنەن شىعا ءبىلدى. ولار وبلىس اكىمىنىڭ جۇلدەسى «گازەل» كولىگىن ءمىنىپ قايتتى. ال ءبىرىنشى ورىندى قوستاناي, ۇزىنكول اۋداندارى مەن ارقالىق قالاسى ءبولىستى. ەكىنشى ورىن جانگەلدين, جىتىقارا, اۋليەكول اۋداندارى مەن رۋدنىي, قوستاناي قالالارىنىڭ ەنشىسىنە ءتيدى. ءۇشىنشى ورىنعا مەڭدىعارا, قاراسۋ, امانگەلدى اۋداندارى مەن ليساكوۆ قالاسى ونەرپازدارىنىڭ ەڭبەگى لايىق دەپ تابىلدى.
ءنازيرا جارىمبەتوۆا.
قوستاناي.