ساپار بارىسىندا ا.مامين تۇرىكمەنستان پرەزيدەنتى گ.بەردىمۇحامەدوۆپەن كەزدەسىپ, ەكونوميكالىق, عىلىمي-تەحنيكالىق جانە مادەني ىنتىماقتاستىق جونىندەگى 9-شى قازاقستان-تۇرىكمەنستان ۇكىمەتارالىق كوميسسياسىنىڭ وتىرىسىنا قاتىستى.
پرەمەر-ءمينيستردىڭ ءبىرىنشى ورىنباسارى ا.مامين ۇكىمەتارالىق كوميسسيا وتىرىسىنىڭ ىنتىماقتاستىقتى ودان ءارى دامىتۋعا جانە تەرەڭدەتۋگە ەلەۋلى سەرپىن بەرگەن تۇرىكمەنستان پرەزيدەنتىنىڭ 18-19 ساۋىردەگى قازاقستانعا مەملەكەتتىك ساپارىنان كەيىن ىلە-شالا ءوتىپ وتىرعانىن اتاپ ءوتتى.
تاراپتار كولىك ينفراقۇرىلىمى مەن ورتاق شەكارانى ەسكەرگەندە ەكى ەل اراسىندا ءوزارا ءتيىمدى ىقپالداستىقتى جولعا قويۋ ءۇشىن ۇلكەن الەۋەتتىڭ بار ەكەنىن ايتا وتىرىپ, ەكىجاقتى ساۋدانى ايتارلىقتاي ءوسىرۋ ءۇشىن كۇش-جىگەردى شوعىرلاندىرۋ قاجەت ەكەنىن اتاپ كورسەتتى.
2016 جىلى سىرتقى ساۋدا اينالىمى 2015 جىلمەن سالىستىرعاندا 59 پايىزعا ارتىپ, 283,5 ملن اقش دوللارىن قۇرادى.
تاراپتار تۇرىكمەنستان پرەزيدەنتىنىڭ قازاقستانعا مەملەكەتتىك ساپارى شەڭبەرىندەگى جوعارى دەڭگەيدە قول جەتكىزىلگەن ۋاعدالاستىقتاردى جۇزەگە اسىرۋ بويىنشا, سونىڭ ءىشىندە ورتا مەرزىمدى پەرسپەكتيۆادا تاۋار اينالىمىن 1 ملرد اقش دوللارىنا دەيىن جەتكىزۋدە ەكىجاقتى شارالار قابىلداۋ قاجەتتىگىن اتاپ ءوتتى.
تۇرىكمەنستان پرەزيدەنتى گ.بەردىمۇحامەدوۆ ءوز ەلىنىڭ استانادا وتەتىن ەكسپو-2017 حالىقارالىق مامانداندىرىلعان كورمەسىنە بەلسەندى قاتىسۋعا نيەتتى ەكەنىن ءبىلدىردى.
سول كۇنى اشعابادتا قازاقستان پرەمەر-ءمينيسترىنىڭ ءبىرىنشى ورىنباسارى ا.ءماميننىڭ جانە تۇرىكمەنستان مينيسترلەر كابينەتى توراعاسىنىڭ ورىنباسارى ب.اننامەرەدوۆتىڭ توراعالىعىمەن ەكونوميكالىق, عىلىمي-تەحنيكالىق جانە مادەني ىنتىماقتاستىق جونىندەگى قازاقستان-تۇرىكمەنستان ۇكىمەتارالىق كوميسسياسىنىڭ 9-شى وتىرىسى ءوتتى.
وعان قاتىسۋشىلار بۇعان دەيىن قول جەتكىزگەن ۋاعدالاستىقتاردى جۇزەگە اسىرۋ بارىسىن تالقىلاپ, ىنتىماقتاستىقتىڭ, وتىن-ەنەرگەتيكا سەكتورىن, كولىك-كوممۋنيكاتسيا سالاسىن, اۋىل شارۋاشىلىعىن, قورشاعان ورتانى قورعاۋ, ءبىلىم بەرۋ مەن مادەنيەتتى قوسا العاندا, باسىم باعىتتارىن دامىتۋ بويىنشا ناقتى شارالار بەلگىلەدى.
وتىرىستا قازىرگى بار كەلىسىمشارتتىق-قۇقىقتىق بازانى جەتىلدىرۋ, ساۋدا-ەكونوميكالىق بايلانىستاردى ۇلعايتۋ, ەكسپورتتىق-يمپورتتىق وپەراتسيالار كولەمىن ارتتىرۋ, جەتكىزىلەتىن تاۋارلار مەن كورسەتىلەتىن قىزمەتتەردىڭ نومەنكلاتۋراسى مەن كولەمدەرىن كەڭەيتۋ ەسەبىنەن ەكونوميكالىق ىنتىماقتاستىقتى نىعايتۋ قاجەتتىگى اتاپ ءوتىلدى.
قازاقستاندىق كومپانيالاردىڭ اشعاباد – اۋعانستان شەكاراسى جولى ۋچاسكەسىنىڭ قۇرىلىسىنا قاتىسۋى, 243 شاقىرىمعا سوزىلاتىن تۋرمەنابات -مارى تەمىر جولىنىڭ ۋچاسكەسىن جاڭعىرتۋعا, سونداي-اق, فاراپ قالاسىنداعى رەلس دانەكەرلەۋ كاسىپورنى مەن سەردار قالاسىنداعى ۆاگون جوندەۋ زاۋىتىن جاڭعىرتۋعا قاتىسۋى تۋرالى الدىن الا ۋاعدالاستىقتارعا قول جەتكىزىلدى.
ونىڭ سىرتىندا تاراپتار تۇرىكمەنستان ءۇشىن عارىش اپپاراتتارى قۇرىلىسىنىڭ جوباسىن جانە عارىش سالاسىنداعى مامانداردى وقىتۋ, ماڭعىستاۋ وبلىسى مەن بالكان ءۋالاياتىندا شەكارالىق ساۋدا ايماعىن قۇرۋ, ارالدى حالىقارالىق قۇتقارۋ قورى شەڭبەرىندەگى ىنتىماقتاستىق ماسەلەلەرىن تالقىلادى.