– مادىعالي اعا, ايدار بەكجانوۆتىڭ قۇرامادان كەتكەنىن ەستىپ جاتىرمىز. سپورتشىنىڭ ايتۋىنشا, بۇعان باسشىلاردىڭ ونىڭ ناتيجەسىنە كوڭىلى تولماۋى سەبەپ. وسىعان بايلانىستى ءسىزدىڭ پىكىرىڭىزدى ەستىسەك...
– ماۋسىم باستالعالى ونىڭ بەلى, اياعى اۋىرىپ ءجۇردى. وليمپياداعا دايىندالۋعا دا ونىڭ شاماسى كەلمەي تۇر. سوندىقتان كومانداعا الا المادىق. باسەكە جوعارى, جاستار اراسىندا ءوز كەزەگىن كۇتىپ تۇرعاندارى بار. باستاپقىدا ايتقانمىن: «كىم ءتيىستى مەجەگە جەتە الماسا, سول ورنىن بوساتادى» دەپ. وكشە باسىپ كەلە جاتقان دارىندارعا دا كەزەك بەرىپ, سولاردىڭ مۇمكىندىگىن تەكسەرۋ كەرەك.
– ايداردىڭ ورنىن باسۋى مۇمكىن دەگەن سپورتشىلاردان كىمدەردى اتاي الاسىز؟
– قازىردىڭ وزىندە 5-6 بالا بار «گوللانديا قۇراماسىمەن دايىندىققا قاشان بارامىز» دەپ اسىعىپ جۇرگەن. مىسالى, ميرسايد جاقسىباەۆتى ايتۋعا بولادى. ودان بولەك 2022 جىلعى وليمپيادا ويىندارىنا قاتىسادى دەگەن ماقساتپەن تاعى ەكى جاستى قوستىق – ەركەبۇلان شامۇحانوۆ پەن گالياحمەتوۆ ءادىل. تورتەۋى كەتتى. قازىر نيدەرلاند قۇراماسىمەن بىرگە ۆەلوسيپەد جاتتىعۋلارىن جۇرگىزىپ جاتىر. قالعاندارىن مەن مامىردىڭ باسىندا الىپ كەتەمىن.
– وتكەندە ءبىر سوزىڭىزدە شورت-ترەك ماماندارىنىڭ ازدىعىن العا تارتىپ ەدىڭىز. ايداردىڭ وسى سالادا باعىن سىناۋىنا مۇمكىندىك بەرۋگە بولۋشى ما ەدى؟
– ول باپكەر بولامىن دەپ ەشقاشان ايتقان ەمەس. اسلان داۋىموۆ قىزدار قۇراماسىمەن بىرگە وڭتۇستىك كورەياعا دايىندىققا كەتەدى. ال ازامات سۇلتاناليەۆ گوللاندياعا بارادى. اسلان سپورتتىق كارەراسىمەن قوش ايتىسقالى كومەكشى رەتىندە قاسىما الدىم, ازاماتتىڭ دا استاناعا كەلىپ جۇمىس ىستەپ جۇرگەنىنە بىرنەشە جىل بولدى. باپكەر رەتىندە ءبارىن باسىنان باستاۋى كەرەك. ال جاس مامانداردىڭ ايلىعى تىم از. كۇن كورۋ قيىن. وعان كەلىسپەيدى دە. ال الگى جىگىتتەر سپورتشى بولىپ جۇرگەندە-اق باپكەر رەتىندە جۇمىس ىستەۋ تۋرالى ويلارىن ايتقان.
– بەكجانوۆ بۇعان دەيىن دە سپورتتان كەتىپ, قايتا ورالىپتى. تاعى دا سولاي بولۋى مۇمكىن بە؟
– جوق. وسىعان دەيىن مۇمكىندىك بەردىك. ال قازىر جاسى كەلدى. ۋاقىت دەگەن ءبىر ورىندا تۇرمايدى. دەنساۋلىعى ءجيى سىر بەرەدى. كورەي مامانى كەلگەندە دە جاتتىعۋىنا كوڭىلى تولمادى. ءتىپتى, «ول كەتپەسە مەن جۇمىس ىستەمەيمىن» دەپ شارت قويدى. سوندىقتان ايداردى قۇرامادان شەتتەتتىك. نيدەرلاند ەلىنە بارعاندا دا اۋىرتپالىققا شىداي المادى. ول جاقتاعى ماماندار «دەنساۋلىعى جوق بولسا, قارجىنى باسقا سپورتشىعا جۇمساۋ قاجەت, بۇل جىگىتتى دە قيناماڭىزدار» دەدى. گوللاندياداعى اۋىرتپالىق سۇمدىق. ولار كىشكەنتاي كەزىنەن ۆەلوسيپەدپەن كادىمگە سپورتشىلار سەكىلدى زۋلايدى. وعان بىزدىكىلەردىڭ مۇرشاسى جەتپەيدى. ءبىزدىڭ قىزدارعا بۇل جاتتىعۋ مۇلدە تۋرا كەلمەيدى. ولاردى وڭتۇستىك كورەياعا جىبەرىپ جاتقانىمىز دا سوندىقتان. ەگەر نيدەرلاندعا اپارساق, وقۋ-جاتتىعۋ جيىنى باستالىسىمەن-اق دارىگەردىڭ الدىنان شىعاتىنى انىق. جۇرەك, بۋىن, اياق-قول دەگەن شىدامايدى. دالاعا اقشا شاشۋ بولاتىنى انىق. ال ەرلەر قۇراماسىن بىرتىندەپ بەيىمدەپ جاتىرمىز. سونىڭ ارقاسىندا قانشاما مەدال الدىق, بىرنەشە جارىستاردا كەي قاشىقتىقتاردا نيدەرلاندىقتاردىڭ ءوزىن باسىپ وزدىق. بۇل ەڭبەكتىڭ ناتيجەسى. ال ايدارعا مۇنداي جاتتىعۋ اۋىر سوقتى.
– ونىڭ سىزدەرمەن, ارىپتەستەرىمەن قارىم-قاتىناسى قالاي؟
– وسەكتىڭ بارىنە ءمان بەرە بەرۋدىڭ قاجەتى جوق. ءار بالاعا قۇلاق اسىپ, سونىڭ سوزىنە ەرە بەرسەڭ, كوماندالىق جۇمىس دەگەن قۇردىمعا كەتەدى. ونىڭ ءبارىن قايتەسىز. قۇرامادا كىمنىڭ قاشان, قالاي ونەر كورسەتەتىنىنە مەن جاۋاپتىمىن, شەشىمدى دە قابىلدايتىن مەنمىن. ونىڭ ناتيجەلەرى شىنىمەن دە كوڭىلدەن شىقپادى. شاماسى جەتپەيدى, ءارى قاراي قيناي بەرگەننەن نە شىعادى.
اڭگىمەلەسكەن ءمادينا اسىلبەك,
جۋرناليست