الدىمەن ايتارىمىز, كوپتىڭ كوڭىلىنەن شىعاتىنداي تۇشىمدى تەلەحابارلاردىڭ از بولۋ سەبەبى, تەلەجۋرناليستيكانىڭ قادىرىن ءتۇسىرىپ الدىق. ويتكەنى, ءۇش قايناسا سورپاسى قوسىلمايتىن ماماندىق يەلەرى تەلەجۋرناليستيكانى جاۋلاپ الدى دا, كاسىبي ماماندار شەتتەپ قالدى. تەلەجۋرناليستەردىڭ «نانىن تارتىپ العانداردىڭ» سىرتقى كەلبەتى كورىكتى, بىراق باسقا تالاپتاردى بىلاي قويعاندا, ولاردىڭ تەلەجۋرناليستيكانىڭ الىپپەسىنەن دە حابارى جوق. باسىم بولىگىنىڭ سوزدىك قورى شولاق, سويلەۋ مادەنيەتى تومەن. ءان شىرقاعاندا اسقاقتاعان داۋىسى بار شىعار, بىراق, ول داۋىس تەلەسالاعا كەلە مە, جوق پا؟ ونى ويلامايدى. تەلەجۇرگىزۋشىلەردىڭ داۋىسى قۇلاققا جاعىمدى بولۋى ءتيىس. كورەرمەندى تارتىپ, ەلىكتىرىپ اكەتۋى كەرەك. مانەرىنە قاراپ جاتقان دا ەشكىم جوق. ال ءتيىستى ءبىلىم العان جۋرناليستەرگە وسى ماسەلەلەرگە بايلانىستى جەكە-جەكە ساباق وتەدى. ستۋدەنت كەزدەن باستاپ ماشىقتانادى. تاجىريبە جيناقتايدى. وسىنىڭ بارىنەن وتكەن تەلەجۋرناليست ىسىلىپ, توسەلەدى. ال ونىڭ ورنىنا فونوگراممامەن ءان شىرقاپ جۇرگەن ءانشىنى اكەپ قويساڭىز قالاي بولادى؟ ساحنادا ءان شىرقاۋ مەن تەلەكامەرانىڭ الدىندا حابار جۇرگىزۋ ەكى بولەك دۇنيە. وسىنداي سەبەپ-سالدارلارعا بايلانىستى كوبىنە حابارلار سۇرەڭسىز شىعادى, كورەرمەنىن تارتپايدى.
ەڭ سوراقىسى سول, ولاردىڭ كوبى نە ايتىپ تۇرعانىن وزدەرى تۇسىنبەيدى. تەلەجۇرگىزۋشى سويلەمنىڭ ماعىناسىنا, ءسوزدىڭ ايتىلۋى مەن استارىنا جەتە ءمان بەرۋى ءتيىس. دۇرىس تىنىس الۋ, داۋىس ىرعاعى, ەكپىن ءتۇسىرۋ دەگەن بار. مۇنىڭ بارىنە بولاشاق تەلەجۋرناليستەر وقۋ ورداسىنىڭ قابىرعاسىندا جاتتىعادى. ال, سۋفلەردەگى ءماتىندى سۋدىراتىپ وقىپ شىققان تەلەجۇرگىزۋشى نە وقىعانىن ءوزى دە, كورەرمەن دە تۇسىنبەگەندىكتەن, ونىڭ اقپاراتىن قابىلداي المايدى. ويتكەنى, كوپ تەلەحابارلاردا جۇرگىزۋشى ءماتىندى ءوزى جازبايدى, وعان دايىن كۇيىندە بەرىلەدى. ءتىپتى, ءدال حابار باستالار الدىندا قولىنا ءتيۋى مۇمكىن. دايىندالۋعا دا مۇرشاسى بولمايدى. كەيدە تىكەلەي ەفير كەزىندە تەلەجۇرگىزۋشىلەردىڭ اسىپ-ساسىپ, ابدىراپ قالاتىنىنىڭ سەبەبى دە وسى.
ونىمەن قويماي, ەكرانعا شىققان كەزدە «پالەنشە پالەنشيەۆ, جۋرناليست» دەپ تيتر بەرەتىنىن قايتەرسىڭ؟ تەلەارنانىڭ باسشىلارى وسىعان ءمان بەرۋى كەرەك. ويتكەنى, ولاردىڭ جۋرناليستىك ماماندىعى, ديپلومى جوق. سوندىقتان «جۋرناليست» دەپ جازۋعا قۇقى جوق. تيترعا جازعىسى كەلىپ بارا جاتسا «ءتىلشى» دەپ جازسىن.
انشىلەردىڭ جۇرگىزگەن حابارلارىندا جاساندىلىق بىردەن بايقا-
لادى. ونى كوزى اشىق, كوكىرەگى وياۋ كورەرمەن بىردەن بايقايدى. سوندىقتان تەلەجۋرناليستيكانى وسى سالانىڭ وقۋىن وقىپ, توقۋىن توقىعان, قىر-سىرىن بەس ساۋساقتاي ءبىلەتىن مامانداردىڭ وزدەرىنە قايتارۋ كەرەك. سوندا عانا تەلەجۋرناليستيكا وركەندەپ, جاقسى حابارلار كوبەيەدى.
وتاندىق تەلەيندۋستريا رەسەي تەلەارنالارىنىڭ كوشىرمەسى بولۋدان اۋلاق بولعانى ءجون. اسىرەسە, شوۋ باعدارلامالاردى جاساعاندا اينىتپاي كوشىرىپ الا قويادى. ول جوبا ۇلتتىق مەنتاليتەتكە كەلە مە, ءتار-
بيەلىك, تاعىلىمدىق ءمانى بار ما, وعان ءمان بەرىپ جاتقان ەشكىم جوق.
قىرىق-ەلۋ جاستان اسقان كاسىبي تەلەجۇرگىزۋشىلەردى ەكراننان الاس-
تاتۋ دا دۇرىس ەمەس. شەتەلدىك تەلەارنالاردىڭ باسىم بولىگىندە تاڭەرتەڭگىلىك جانە اقپاراتتىق باعدارلامالارىن جۇرگىزەتىندەر مەن دايىندايتىندار – ورتا جاستاعىلار. ويتكەنى, كوزى جىپىلىقتاعان جاساندى تەلەجۇرگىزۋشىلەرمەن سالىستىرعاندا, ولاردىڭ اقپاراتىنا كورەرمەندەر يلانادى, سەنەدى.
تەلەحابارلاردىڭ ساپاسىن كوتەرۋ باسەكەلەستىككە بايلانىستى. سوندىقتان, اۋتسورسينگتىك جۇمىستارعا جول اشۋ كەرەك. باسەكەلەستىك بار جەردە جاقسى ناتيجە بولاتىنىن ءومىردىڭ ءوزى كورسەتىپ وتىر.