كەشە ءماجىلىس توراعاسى, «نۇر وتان» حالىقتىق-دەموكراتيالىق پارتياسىنىڭ پارلامەنتتەگى فراكتسياسىنىڭ جەتەكشىسى ورال مۇحامەدجانوۆ اتالعان پارتيانىڭ قوعامدىق قابىلداۋىندا ازاماتتاردى وتىنىشتەرى بويىنشا قابىلداۋ وتكىزدى.
بۇگىنگى قابىلداۋعا كەلگەندەردىڭ اراسىندا زەينەتكەرلەر, شاعىن جانە ورتا كاسىپكەرلىك وكىلدەرى مەن مەملەكەتتىك قىزمەتكەرلەر دە بولدى. توراعانىڭ قابىلداۋىنا كىرگەندەر جەكە پروبلەمالارىمەن قاتار, ەلدىك ماسەلەلەردى دە كوتەرىپ, وزدەرىنىڭ ۇسىنىستارىن دا ورتاعا سالىپ جاتتى.
سولتۇستىك قازاقستان وبلىسى اقجار اۋدانى ۇيالى اۋىلىنىڭ تۇرعىنى جۇماباي نۇراحمەتوۆ اقساقال نەمەرەسىن ەرتە كەلىپتى. ونىڭ ايتۋىنشا, وسىدان ءبىراز بۇرىن ول «اليانسستروينۆەست» جشس-ىنە ۇلەستىك قاتىناسپەن تۇرعىن ءۇي سالۋعا اقشا قۇيعان. الايدا قۇرىلىستىڭ سوزىلىپ كەتۋىنە بايلانىستى, سوت ارقىلى قۇيعان قارجىسىن كەرى قايتارىپ الۋ تۋرالى ارىز تالابى قاناعاتتاندىرىلعانىمەن, ءالى دە ورىندالماي كەلەدى ەكەن. ورال بايعونىس ۇلى قاريانىڭ ءسوزىن مۇقيات تىڭداپ بولعان سوڭ, ونىڭ وڭ شەشىلۋى مۇمكىندىگىن ايتىپ, وسى ماسەلە بويىنشا جشس باسشىسىمەن سويلەسۋگە ناقتى تاپسىرما بەردى.
كەلەسى كەزەكتە ءوزىن جەكە كاسىپكەرمىن دەپ تانىستىرعان قاراعاندىلىق ساتتار مولدابەكوۆتىڭ فراكتسيا جەتەكشىسىنە ايتار ۇسىنىستارى بار ەكەن. ول اۋىل شارۋاشىلىعى ونىمدەرىن ساقتاۋدا قىسى-جازى بىرقالىپتاعى تەمپەراتۋرا ۇستاپ تۇراتىن شاحتالىق ۇڭعىمالاردى پايدالانۋعا بولارىن العا تارتتى. سونداي-اق جەلدى ەلەكتر قۋاتىنا اينالدىرۋ قۇرىلعىلارىن جاساۋعا ەلىمىزدە بارلىق جاعدايدىڭ بارلىعىمەن ءبولىستى. وكىنىشكە قاراي, قابىلداۋعا كەلگەن كاسىپكەر ناقتى جوبالارىن الىپ كەلمەگەن بولىپ شىقتى. سوندىقتان دا بۇل ءجونىندەگى ماسەلە كەيىنگە ىسىرىلدى.
جالپى, ورال مۇحامەدجانوۆ وتىنىشتەردىڭ ىشىندە ينۆەستيتسيالىق جوبالاردى ەنگىزۋ, اۋىل شارۋاشىلىعىن دامىتۋ ماسەلەلەرىنە قاتىستى ازاماتتار ۇسىنىستارىنا ەرەكشە نازار اۋداردى. فراكتسيا جەتەكشىسى يپوتەكالىق نەسيەلەندىرۋ جانە تۇرعىن ءۇي قاتىناستارى ماسەلەلەرى بويىنشا قولدانىستاعى زاڭناماعا وزگەرىستەر ەنگىزۋ قاجەتتىگى تۋرالى پىكىرلەرمەن دە كەلىسەتىندىگىن ءبىلدىردى. وسىلايشا كوپتەگەن پروبلەمالار سول جەردە شەشىمىن تاۋىپ جاتسا, بىرقاتارى ءتيىستى قۇزىرەتتى مەملەكەتتىك ورگاندار تاراپىنان باقىلاۋعا الىندى.
قابىلداۋ سوڭىنان ءماجىلىس توراعاسى, «نۇر وتان» حدپ فراكتسياسىنىڭ جەتەكشىسى بۇقارالىق اقپارات قۇرالدارى وكىلدەرىنە ارنايى سۇحبات بەردى. سپيكەر قابىلداۋعا كەلۋشىلەر اراسىندا جەكە باسىنىڭ شارۋاسىنان گورى قوعامدىق پروبلەمالارعا كوڭىل قويا باستاعان ازاماتتاردىڭ سانى ارتىپ كەلە جاتقانىن اتاپ كورسەتتى. توراعا قازىرگى كەزدە تۇرعىنداردى باسپانا ماسەلەسى قيناپ وتىرعاندىعىمەن دە بولىسە كەتتى. جاعدايدىڭ بۇلايشا ۋشىعىپ كەتۋى اۋىلدىق جەرلەرگە جەكەنىڭ كەلۋىمەن ەكى قولعا ءبىر جۇمىس تاپپاي جۇرگەندەر كوبەيىپ, ولار قالالارعا قونىستانا باستاعان. بولاشاقتا اۋىل تۇرعىندارىنىڭ سانى 10-15 پايىزدان اسپاۋى مۇمكىن, دەگەن سپيكەر ولاردىڭ باسپاناعا قاجەتتىلىگىن باسەڭدەتۋ جاقىن ون جىلدا جۇزەگە اسۋى مۇمكىندىگىن دە العا تارتتى.
جالپى, فراكتسيا دەپۋتاتتارى «نۇر وتان» حدپ ورتالىق اپپاراتىندا ازاماتتارعا قابىلداۋدى اپتاسىنا ەكى رەت وتكىزەدى. جىل باسىنان بەرى وتكىزگەن 23 قابىلداۋ بارىسىندا ازاماتتاردىڭ 194 ارىز-ءوتىنىشى قارالسا, سونىڭ 185-ءى وڭ شەشىمىن تاپقان. ءتورتىنشى شاقىرىلىم باسىنان ۇكىمەت پەن مەملەكەتتىك ورگاندار باسشىلارىنىڭ اتىنا جولدانعان ساۋالدار سانى 1871 بولسا, اعىمداعى سەسسيا بارىسىندا 444 دەپۋتاتتىق ساۋال جولدانىپتى.
اسقار تۇراپباي ۇلى.