1 مامىر – قازاقستان حالقىنىڭ بىرلىگى كۇنى استانالىق وبلىستىڭ تسەلينوگراد اۋدانىنىڭ ورتالىعى اقمول اۋىلىندا دا بۇكىلحالىقتىق مەرەكە رەتىندە اتاپ ءوتىلدى. اۋداندىق مادەنيەت ۇيىندە 15 ەتنومادەني بىرلەستىكتەردىڭ ۇلتتىق تاعامدارىنىڭ كورمەسى ۇيىمداستىرىلدى.
شەرۋ باستالار الدىنداعى سالتاناتتى راسىمدە اۋدان اكىمى مانات ءجۇنىسوۆ, ءماسليحات حاتشىسى بالتاباي ماجرەنوۆ, «اقمولا-فەنيكس» اق كاسىپوداق كوميتەتىنىڭ ءتورايىمى ليۋبوۆ دروبوت, اۋداندىق ۇيىمدار وكىلدەرى مەن شاقىرىلعان قوناقتار قۇتتىقتاۋ ءسوز سويلەدى.
مەرەكەلىك شەرۋدى تۋ ۇستاۋشىلار باستاسا, ولاردىڭ سوڭدارىنان نەمەرەلەرى مەن شوبەرەلەرىن جەتەكتەگەن سوعىس جانە ەڭبەك ارداگەرلەرى ەرىپ ءجۇردى. كەلەسى قاتارعا اۋدانداعى بارلىق ۇلتتار وكىلدەرىنەن قۇرالعان كولوننالار ىلەستى. ولار ۇلتتىق بيلەرىن بيلەدى.
مەيماندار نەمىستىڭ شترۋدەلىنەن, بەلارۋستىڭ درانيكتەرىنەن, ۋكرايننىڭ گالۋشكيلەرىنەن, وزبەكتىڭ پالاۋىنان, تاعى باسقا ەتنوستاردىڭ اس مازىرلەرىنەن اۋىز ءتيدى. باياننىڭ داۋىسىن ەستىگەن جۇرتشىلىق بايىز تاۋىپ تۇرا الماي, جاپپاي بي بيلەسە, مانات ءجۇنىسوۆ جەكە ۇلگىسىمەن جۇرتشىلىقتىڭ دەلەبەسىن قوزدىردى.
سۋرەتتەردە: جارمەڭكە كورىگى كەيىن قىزدى; ورىستىڭ كاراۆايى ەتنومادەني بىرلەستىكتەردىڭ كونتسەرتى.
___________________
سۋرەتتەردى تۇسىرگەن ۆلاديمير باحمۋتسكي.