اتاپ ايتقاندا, يندۋستريالدى-يننوۆاتسيالىق دامۋ باعدارلاماسى اياسىندا ىسكە قوسىلعان جوبالاردىڭ 94 %-ى جوسپارلىق قۋاتتىلىقتى يگەرىپ, 101 ملرد تەڭگەنىڭ ءونىمىن وندىرگەن. ناتيجەسىندە, ونىڭ وڭدەۋ ونەركاسىبىندەگى ۇلەسى 21 %-عا ءوستى.
بۇدان بولەك, وڭىردە جاڭا ءونىم تۇرلەرىن وندىرەتىن وندىرىستىك نىساندار ىسكە قوسىلدى. يمپورتتالاتىن ونىمدەر – سۋ ناسوستارى, كەروموگرانيتتىك پليتالار, كىلەمدەر, مدف تاقتايلار جانە وزگە دە تاۋارلار وڭىرىمىزدە شىعارىلسا, تسەمەنت, موتور مايى, كىلەم, ماتا, ءدارى-دارمەك, ترانسفورماتورلاردى ەكسپورتتاۋ قولعا الىندى. وبلىسقا 79,4 ملرد تەڭگە ينۆەستيتسيا باعىتتالىپ, 2016 جىلدىڭ ءتيىستى كەزەڭىنەن 2 ەسە ارتىپ وتىر.
يندۋستريالدى-يننوۆاتسيالىق دامۋ مەملەكەتتىك باعدارلاماسى اياسىندا بيىل 37 ملرد تەڭگەگە 17 جوبانى ىسكە قوسىپ, 900-دەن استام جۇمىس ورنىن قۇرۋ جوسپارلانۋدا. وبلىس ونەركاسىبى ءونىمىنىڭ كولەمىن 850 ملرد تەڭگەگە جەتكىزۋ, ياعني, شاعىن جانە ورتا كاسىپكەرلىك سۋبەكتىلەرى وندىرگەن ءونىم كولەمىن 900 ملرد تەڭگەگە دەيىن ۇلعايتۋ كوزدەلۋدە.
اۋىل شارۋاشىلىعىن ەكونوميكانىڭ جاڭا درايۆەرىنە اينالدىرۋ جۇمىستارى قارقىندى ءجۇرىپ جاتىر. ماسەلەن, وسى جىلى ەگىستىك كولەمى 792,5 مىڭ گا جەتكىزىلىپ, ينتەنسيۆتى باۋ اۋماعى اعىمداعى جىلى 1 500 گا ۇلعايتىلادى. سونىمەن بىرگە, 300 گا جەرگە جاڭعاق, 200 گا بادام باۋلارىن وتىرعىزۋ جوسپارلانۋدا. جىلىجايلار الاڭى 1 323 گا قۇراسا, 3 013 بىرلىك شاعىن مال بورداقىلاۋ الاڭى, 722 جانۇيالىق ءسۇت فەرما, 14 شاعىن قۇس فەرماسى, 4 بىرلىك بالىق شارۋاشىلىعى اشىلادى دەگەن بولجام بار.
شىمكەنت قالاسىن ءۇشىنشى ءىرى مەگاپوليسكە اينالدىرۋ جۇمىستارىنىڭ بارىسى دا ايتارلىقتاي. بۇگىنگى تاڭدا شاھاردا 19 كوپقاباتتى ءۇيدىڭ, 1 200 ورىندى مەكتەپتىڭ جانە باسقا دا نىسانداردىڭ قۇرىلىسى جۇرگىزىلىپ جاتىر.
«Shymkent City» جوباسى باستالىپ, وندا ينجەنەرلىك-كوممۋنيكاتسيالىق جۇيەلەر مەن جولداردىڭ, 10 كوپقاباتتى تۇرعىن ءۇيدىڭ, 49 گا ساياباقتىڭ قۇرىلىسى جۇرگىزىلۋدە. سونىمەن قاتار, شىمكەنتتى جاسىل قالا مارتەبەسىنە اينالدىرۋ ماقساتىندا «شاتقالدار» جوباسى بويىنشا 141 گا اۋماق انىقتالىپ, 5 قوعامدىق دەمالىس ورنى اشىلماق. ال تۇرعىن ءۇي قۇرىلىسىن دامىتۋ ماقساتىندا «نۇرلى جەر» باعدارلاماسى اياسىندا 700 مىڭ شارشى مەتردى قۇرايتىن 8 052 پاتەر پايدالانۋعا بەرىلەدى.
سالىق تۇسىمىنە كەلسەك, 2017 جىلدىڭ 3 ايىندا مەملەكەتتىك بيۋدجەتكە تۇسكەن سالىقتار مەن باسقا تۇسىمدەردىڭ كولەمى 72,3 ملرد تەڭگەنى قۇراپ, جوسپاردان 12,4%, وتكەن جىلدىڭ ءتيىستى كەزەڭىنەن 12,3% ارتتى. جەرگىلىكتى بيۋدجەتكە 27,4 ملرد تەڭگە ءتۇسىپ, جوسپاردان 14,4% جانە وتكەن جىلدىڭ ءتيىستى كەزەڭىنەن 7,3% ارتتى.
جۇمىسسىزدىق دەڭگەيىن تومەندەتۋ, كاسىپكەرلىكتى قولداۋ ماقساتىندا 21 192 ادامعا الەۋمەتتىك قولداۋ شارالارى كورسەتىلىپ, جالپى 3 330 جۇمىس ورنى قۇرىلدى. كاسىپكەرلىكتى دامىتۋعا ۇسىنىلاتىن شاعىن نەسيە كولەمى 2 ەسە كوبەيدى.