ءومىر ءسۇرۋ ءۇشىن وزگەرە ءبىلۋ كەرەك
نۇرسۇلتان نازارباەۆ
توقتاعان, ءبىر ورىندا تۇرعان ارتتا قالادى. قوعام دا وسى زاڭدىلىققا باعىنادى. ءىس-ارەكەتسىز, جوسپارسىز وتىرعان ەل: اۋەلى – قيىنشىلىققا, سوسىن داعدارىسقا ۇشىرايدى. سوڭى مەملەكەتىنىڭ قۇلدىراۋىمەن اياقتالادى.
ەلباسى ءوزىنىڭ تۇجىرىمدامالىق ماقالاسىندا وزەكتى ماسەلەلەردى كوتەرەدى. ماڭىزدىلىعى, تەگىندە, ءمان-ماعىناسى نىعىزدالعان ۇزدىك تاقىرىبىنان اڭدالادى: «بولاشاققا باعدار: رۋحاني جاڭعىرۋ».
ۇلت – بۇكىل حالىقتىق جوسپارى قولدا, كەلەشەگىن ايقىنداعان دامۋ باعىت-باعدارى باردا عانا ءتىرى. جوسپارسىز ەل – جەلكەنسىز قايىق ءتارىزدى. دىتتەگەن جەرىنە, اتتانعان ساپار مۇراتىنا جەتە المايدى.
1. XXI عاسىر: ادامزات اقىل-ويى جانە ۇلتتىڭ اشىق سانا-سەزىمى
دۇنيە وزگەردى. ادامزات ءبىرتىندەپ عالامزات بولدى. جيىرما ءبىرىنشى عاسىردا تۋعان ءۇيىڭ, تۋعان جەرىڭدى عانا جاقسى كورگەن ازدىق ەتەدى, سەبەبى, ادامزاتتىڭ جالعىزى – جەر, ءپىل ساۋىرلى عالامشار, ۇلى پلانەتا – بىرەۋ عانا. ءبىزدىڭ ەندىگى تۋعان ءۇيىمىز – ءوز كىندىگىن ءوزى اينالىپ جۇرگەن قارا توپىراقتى, كۇن شۇعىلالى, اي ءمۇسىندى جەر. پلانەتالىق سانا ورتاق ۇيىمىزگە تونگەن قاۋىپ-قاتەر تۋرالى دابىل قاعادى.
بىراق, پلانەتالىق سانا ءار ۇلتتىڭ ءوز تۋعان جەرىن عانا ەمەس, تۋعان ەلىن سۇيگەن شەكسىز ماحاببات, تەرەڭ سەزىمىنەن قالىپتاسادى. تۋعان ءۇي, التىن بەسىك ءسىزدىڭ تۋعان جەرىڭىزدىڭ كورىنىسى بولسا, مەملەكەتىڭىز – تۋعان ەلىڭىزدىڭ ءوزى.
ەلباسىنىڭ, ەلدىڭ ىرگەسىن بەكىتىپ, بەيبىت ءومىر, تىنىش قوعامدى ساقتاپ, تەرريتوريامىزدى بەلگىلەۋدە, قۇجاتتارىن راستاۋدا, استانامىزدىڭ جاعرافيالىق جانە ساياسي ورنىن ءدال انىقتاپ, جىلدام كوشىرۋدە, ەلوردانى تۇرعىزۋدا سىڭىرگەن ەڭبەگى وتە زور. سوندىقتان, ۇلت جوسپارى ساتىمەن جالعاسىن تاۋىپ, بۇگىندە بولاشاقتىڭ باعىت-باعدارىنا اينالىپ وتىر.
ءبىز, تولعان-تولىسقان مەملەكەت رەتىندە, جۇيەلى عۇمىر كەشىپ كەلەمىز. ءىس-ارەكەتىمىزدە كەزدەيسوقتىق جوق.
راس, كەشەگى الىپتار حاندىق داۋىردە مەكەنىمىزدى وتانعا اينالدىردى. ءبىز وتانىمىزعا شەكاراسى تولىق ايقىندالعان مەملەكەتتىك سيپات بەرىپ, قاستەرلى تاۋەلسىزدىككە قول جەتكىزدىك.
استانا ساياسي ورتالىق قانا ەمەس, قازىرگى تاڭدا باسەكەگە قابىلەتتى ساياسي-زياتكەرلىك قالا بولدى.
كورمەگەن كورۋگە اسىعاتىن, كورگەن كەتە المايتىن, ال كەتكەن ۇمىتا المايتىن شاھار.
ەلباسى قازاق قوعامىن, قازاقستان حالقىن بىرتۇتاستىققا, بەيىمدىلىككە شاقىرادى, باسەكەلەستىكتە توپ جارىپ وزىپ شىعۋعا ۇندەيدى, ۋاقىت تالابىنا ساي, قاشاندا سەرگەك, بەلسەندى ءومىر ءسۇرۋدى حالقىمىزعا مىندەتتەيدى.
ەلباسى وسيەتى زامان اعىسى, ءداۋىر تىنىسى قانداي ەكەندىگىن العا تارتا وتىرىپ, قوعام مۇددەسىنە, قازاق مۇراتىنا قىزمەت ەتۋدى ناسيحاتتايدى.
2. ءبىلىم سالتاناتى: كاسىپتىك سيپات جانە بەيىمدىلىك
ءبىلىمسىز كاسىپتى يگەرە المايسىز, كاسىپسىز بۇگىنگى نارىقتا ەشكىمگە كەرەگىڭىز جوق. تاۋەلسىزدىكتىڭ ءبىر كورىنىسى – دامىعان تەحنولوگيا. بىرەۋگە تاۋەلدى, ەكىنشىگە كىرىپتار بولمايسىز. تەحنولوگيا – عىلىم تابىسى, عىلىم – ءبىلىمنىڭ ناتيجەسى. ءبىلىم – ءبىلىم كۋلتىنەن شىعادى.
قازاق بالاسىن جوعارى وقۋ ورىندارىنا باستىق بولسىن دەپ بەرەتىن زامان ءوتتى. ەندى پەرزەنتىڭىزدى ءبىر نەمەسە بىرنەشە كاسىپتى مەڭگەرگەن مامان بولسىن دەپ وقىتاسىز.
تاياۋ جىلدارداعى مىندەتتەردىڭ ىشىندە عىلىم دا بار, ءبىلىم دە بار.
قازىر ۋاقىت جىلدام. تەز ءبىلىم الىپ, تەز ماماندىقتى يگەرمەسەڭىز, نارىق ءسىز مەڭگەرگەن ماماندىققا دەگەن قاجەتتىلىكتى جويىپ جىبەرەدى.
پراگماتيكالىق كوزقاراس العا شىقتى. ءومىردىڭ جىلدامدىعى ارتتى. قوعام دا, نارىق تا, كوزقاراس تا جاڭارىپ تۇراتىن مەزگىل تۋدى. ءبىر ماماندىق يەسىنەن گورى سان كاسىپتىڭ يەسى بولۋ كۇن تارتىبىندە تۇر.
ەندى ءومىر بويى وقيتىن بولاسىز, ءومىر بويى ىزدەنەتىن بولاسىز.
قورىتىندى
رۋحاني جاڭعىرۋدىڭ نەگىزى – وزگەرمەيتىن ىشكى وزەك – رۋحاني ۇلتتىق كود. ماتەماتيكالىق ەسەپتەي كەمەل قۇرىلعان وي-سانا تەڭدىگى. تەڭدەۋدىڭ شەشىمى دە بار.
قوس ۇعىم, ەگىز تۇسىنىكتىڭ ديالەكتيكاسى بىزگە وزگەرىپ تۇراتىن ءومىر, ارەكەتتەنىپ جۇرگەن قوعامدى بەرەدى.
اقىنداردىڭ جىرلارىنداي جالىندى, انشىلەردىڭ انىندەي اسەم, ابىزداردىڭ سوزىندەي انىق.
ديدار امانتاي,
جازۋشى, فيلوسوف, كينەماتوگرافيست,
قازاقستاننىڭ ەڭبەك سىڭىرگەن قايراتكەرى