ال سويلەۋشىنىڭ ەموتسياعا بەرىلۋى ايتىپ تۇرعان ءسوزىنىڭ مازمۇنى مەن تىڭدايتىن ورتاعا بايلانىستى بولۋى كەرەك. ايتىلىپ جاتقان ماسەلە وزدەرىنە مۇلدە قاتىسى جوق ورتادا ەموتسياعا بەرىلىپ سويلەۋ كۇلكى تۋدىراتىن كەزدەرى ءجيى بولادى. ماسەلەن, مالدىڭ وبادان قىرىلۋى تۋرالى پوليتەحنيكالىق ينستيتۋتتىڭ ستۋدەنتتەرىنە ەموتسيامەن ايتساڭىز, ولاردىڭ كۇلەتىنى كۇمانسىز. ال سول ماسەلە ۆەتەريناريا فاكۋلتەتىنىڭ ستۋدەنتتەرىنە ايتىلسا, ولار جاقسى قابىلدايدى.
سونداي-اق, داۋىستى ورىنسىز كوتەرۋ دە تىڭداۋشىلارعا تەرىس اسەر ەتەتىن كەزدەر ءجيى بولادى. پرەزيدەنتتىڭ پۋلىندا 10 جىل ءىستەگەندە وسىلاي سويلەگەندەردىڭ دە كۋاسى بولدىق. ماسەلەن, تمد ەلدەرى باسشىلارىنىڭ كەزەكتى سامميتتەرىنىڭ بىرىندە, اتىن ايتپاي-اق قويايىق, ءسوز العان ءبىر ەلدىڭ پرەزيدەنتى داۋىسىن ورىنسىز كوتەرە سويلەدى. ايتىپ جاتقان ماسەلەلەرى ورىندى, الايدا, داۋىس ىرعاعى تىڭداۋشىلارىن كەۋدەدەن كەرى يتەرگەندەي اسەر قالدىردى.
وسى زامانعى قازاق شەشەندەرىنىڭ اراسىنان پرەزيدەنت ن.نازارباەۆتىڭ سوزدەرى تىڭداۋشىسىن ەشقاشان بەيجاي قالدىرماي, ءوزىنىڭ قۇدىرەتىنە باۋراپ الادى. ن.نازارباەۆتىڭ ءسوزدەرىن تىڭداي باستاساڭىز, ونىڭ ۇنىنە اربالىپ, شىعا الماي قالاسىز. ونىڭ ۇستىنە, ول بايانداماداعى ءبىر سارىندى ءماتىننەن ءجيى شىعىپ, ەموتسيالىق كوممەنتاريلەرىمەن, مىسالدارىمەن سوزدەرىن ءجيى جانداندىرىپ وتىرادى.
سول سياقتى ءا.كەكىلباي ۇلىنىڭ داۋىس ىرعاقتارى دا ادام ساناسىن تۇساۋلاپ, ءوزىنىڭ ەركىنە باعىندىرىپ الاتىن. بىردە مىناداي وقيعا بولدى. قازاق حاندىعىنىڭ 550 جىلدىعىنا ارنالعان كەزەكتى كونفەرەنتسيا ءوتىپ, ونى جازۋعا «ەگەمەننەن» ءبىز بارعان ەدىك. ءسوز كەزەگى وزىنە تيگەندە ءابىش كەكىلباي ۇلى مارقۇم اعىل-تەگىل اقتارىلدى عوي. جۇرتتىڭ ءبارى سىلتىدەي تىنىپ, اربالىپ قالعان...
قازاق شەشەندەرىنىڭ اراسىندا باۋىرجان مومىش ۇلى سوزدەرىنىڭ دە ورنى ەرەكشە. ءسوز باتىردىڭ داۋىس ىرعاعىنان عانا ەمەس, شىندىقتىڭ شىرقىن بۇزباي اشىق ايتا الاتىن ايرىقشا تاپقىرلىعىمەن مەنمۇندالاپ تۇرادى. ءبىر قىزىعى سول, ونىڭ سوزدەرىن تۇپنۇسقادان وقىساڭ دا باتىردىڭ ءۇنى قۇلاعىڭا گۇرىلدەپ ەستىلىپ تۇرعانداي بولادى.
جۋىردا ينتەرنەت-گازەتتىڭ ءبىرىندە باۋكەڭنىڭ ليتۆادا ورنالاسقان 9-شى گۆارديالىق ديۆيزيانىڭ كومانديرى كەزىندە, ياعني 1945 جىلى سويلەگەن ءسوزى جاريالاندى. بۇل كومديۆتىڭ ۇكىمەتتىڭ دەموبيليزاتسيا جاريالاعانىن پولك جاۋىنگەرلەرىنە ەستىرتۋى ەدى. وسى ءسوزدى وقىپ وتىرىپ, ءبىر جەرىنەن دە جالىقپايسىڭ: باۋكەڭ ليريكالىق شەگىنىس جاساسا دا, مورالدىق تۇرعىدان اقىل-كەڭەس ايتسا دا, جەڭىمپازعا لايىقتى ءتارتىپتى ساقتاۋ كەرەكتىگىن ەسكەرتسە دە, وتباسىمەن قاۋىشۋ قۋانىشىن جاساۋعا بەرىلەتىن ماتەريالدىق كومەك تۋرالى ايتسا دا ارتىق-كەمى جوق, ناقپا-ناق, سولداتتىڭ جۇرەگىنە جاقىن سوزدەرمەن تۋرا جەتكىزەدى.
مۇندا سول كەزدەردە ايتىلۋعا مىندەتتى «پارتياعا العىس», «ستالينگە ماداق», «كەڭەس ارمياسىنىڭ قاھارماندىعى» سياقتى تولىپ جاتقان ودالاردىڭ ءبىرى دە اۋىزعا الىنباعان, ويتكەنى, ولاردىڭ تاپ وسى جەردە مۇلدە ارتىق ەكەندىگىن ول تانىپ تۇر.
الەمدىك ارەناداعى ايتۋلى شەشەندەردىڭ ءبىرى – فيدەل كاسترو. يسپانشا تۇسىنبەيتىن ءبىر اعىلشىن ءجۋرناليسى فيدەلدىڭ ءسوزىن تىڭداعاننان كەيىن «نە ايتقانىن ءتۇسىنبەسەم دە, مەن ونىڭ ارتىنان ەرۋگە دايىن بولدىم» دەپ جازعان ەكەن. بۇل – سوزىنە ۇيلەسىمدى ءۇننىڭ قۇدىرەتى.
شەشەن ءسوزىنىڭ دۇرىس قورىتىلۋى دا وتە ماڭىزدى. ويتكەنى, ءسوزدىڭ ناق وسى بولىگى تىڭداۋشىنىڭ ەسىندە قالادى. وسى سالانى زەرتتەيتىن ماماندار مۇندايدا سايكەس كەلەتىن جىر جولدارىن كەلتىرسە, جاراسىپ كەتەتىندىگىن ايتادى. «ولەڭ – ءسوزدىڭ پاتشاسى» ەكەندىگىن اباي دا ايتقان عوي. وسىنى ءبىزدىڭ ۇلكەن مىنبەرلەردەن سويلەيتىن شەشەندەرىمىز ەسكەرىپ وتىرسا, تەك ۇتاتىنى انىق.