«زاڭ جوباسى اۋىل شارۋاشىلىعى جەرلەرىن قازاقستاندىقتارعا جالعا بەرۋ ينستيتۋتىن ساقتاي وتىرىپ, جەرلەردى كونكۋرستىق نەگىزدە بەرۋدىڭ جەكە ءتارتىبىن بەلگىلەۋدى كوزدەيدى. كورسەتىلەتىن تارتىپپەن اۋىل شارۋاشىلىعىن جۇرگىزۋ ءۇشىن جەر ۋچاسكەلەرى اكىمدىكپەن بەكىتىلگەن كونكۋرسقا قويىلاتىن جەرلەر تىزبەسىنە سايكەس بەرىلەدى. تىزبە اۋداننىڭ جەر قاتىناستارى بولىمدەرمەن ازىرلەنىپ, مىندەتتى تۇردە قوعامدىق كەڭەستەرمەن جانە «اتامەكەن» ۇكپ-مەن كەلىسىلىپ, اۋداننىڭ اتقارۋشى ورگانىمەن بەكىتىلەدى. كونكۋرستىڭ ايقىندىلىعىن قامتاماسىز ەتۋ ءۇشىن كونكۋرستىق كوميسسيانىڭ قۇرامىنا ونىڭ مۇشەلەرىنىڭ كەمىندە ەلۋ پايىزىن قۇرايتىن قوعامدىق كەڭەستەر مەن ۇيىمداردىڭ وكىلدەرىن قوسۋ كوزدەلگەن. بۇل نورمالار جەر ءبولۋ باراسىندا جەرگىلىكتى تۇرعىنداردىڭ قوعامدىق پىكىرىن ەسكەرۋ ءۇشىن ەنگىزىلەدى», - دەدى نىسىنباەۆ.
سونىمەن قاتار كونكۋرستىڭ جاريالىلىعى مەن ونىڭ بارلىق قاتىسۋشىلارىنىڭ تەڭ قول جەتكىزۋىن قامتاماسىز ەتۋ ماقساتىندا جاڭا ءتارتىپ بويىنشا كونكۋرس وتكىزىلەتىندىگى تۋرالى حابارلاندىرۋ بۇقارالىق اقپارات قۇرالدارىندا, اۋىل شارۋاشىلىعى مينيسترلىگى جانە اكىمدىكتەردىڭ رەسمي ينتەرنەت رەسۋرستارىندا ورنالاستىرىلادى. وسى ورايدا جەرلەردى ءتيىمدى پايدالانۋدىڭ ءتيىستى تالاپتارى ەسكەرىلىپ وتىر. بەرىلەتىن جەرلەردىڭ ۇتىمدى پايدالانىلۋىن باقىلاۋ ماقساتىندا زاڭ جوباسىندا تۇراقتى مونيتورينگ جۇرگىزۋ كوزدەلگەن.
«مونيتورينگ كورسەتكىشتەرىندە جەر تەلىمىنىڭ نىسانالى ماقساتى, ونىمدىلىك دەڭگەيى مەن اۋىسپالى ەگىستىكتى ساقتاۋ, جەرلەردى ءارامشوپ باسۋىنا جول بەرمەۋ, ەگىستىكتەردى قورعاۋ بويىنشا شارالار جۇرگىزۋ, جالداۋ شارتىنىڭ مىندەتتەرىن ورىنداۋ كىرەدى. مونيتورينگ قۇرامىنا اۋىل شارۋاشىلىعى ورگاندارىنىڭ, قوعامدىق ۇيىمدار مەن بىرلەستىكتەردىڭ وكىلدەرى كىرەتىن كوميسسيانىڭ, سونداي-اق جەر قاتىناستارى بولىمدەرىنىڭ قاتىسۋىمەن جۇزەگە اسىرىلادى. ونى جۇرگىزۋدىڭ ءتارتىبى اۋىل شارۋىشىلىعى مينيسترلىگىنىڭ بۇيرىعىمەن بەكىتىلەدى», - دەدى ۆيتسە-مينيستر.