وبلىستىق ىشكى ىستەر دەپارتامەنتىنە وبلىس تۇرعىندارى بۇگىنگە دەيىن ءوز ەركىمەن 13 قارۋ تاپسىردى. ەرىكتىلەرگە تاپسىرعان قارۋى ءۇشىن 530 مىڭ 946 تەڭگە تولەندى. تاپسىرىلعان قارۋدىڭ بارلىعى دا تەگىس ۇڭعىلى مىلتىقتار.
وبلىستىق ىشكى ىستەر دەپارتامەنتى اكىمشىلىك باسقارماسى ءبولىمىنىڭ باسشىسى, پوليتسيا پولكوۆنيگى ابزال بولاتوۆتىڭ ايتۋىنشا, اكتسيا شەڭبەرىندە 5 ميلليون تەڭگەنى يگەرۋ كوزدەلگەن. قازىر قوستانايلىقتار تەك تەگىس ۇڭعىلى قارۋلار تاپسىرىپ جاتىر.
قوستاناي قالاسىنىڭ تۇرعىنى ىشكى ىستەر باسقارماسىنا «توز-بم» قارۋىن تاپسىرعان. مىلتىقتى ول 1950 جىلى ساتىپ الىپ, وسى كۇنگە دەيىن تىركەۋسىز ساقتاپ كەلگەن.
رۋدنىي قالاسىنىڭ تۇرعىنى وتكەن جىلى توقتىباي وزەنىنىڭ جاعاسىنان تاۋىپ العان مىلتىقتى تاپسىردى.
ءنازيرا جارىمبەتوۆا «ەگەمەن قازاقستان»