مال باعاتىندار ءۇشىن مالدىڭ ەتىن وتكىزۋ قيىننىڭ قيىنى. ال, قالاداعىلار بولسا اق-ادال جولمەن باۋىزدالعان, كۇيلى دە ساۋ مالدىڭ ەتىن العىسى كەلەتىنى بەلگىلى. اقتاۋدا وسى ەكى قاجەتتىلىكتى وتەي الاتىن جاڭا قىزمەت ءتۇرى پايدا بولدى. ول «قازاقى ەت ورتالىعى» دەپ اتالاتىن ورىن. مال ارنايى حالال جولىمەن سويىلىپ, عۇسىل دارەتپەن, باسىنا ورامال تاققان قىز-كەلىنشەكتەر پىسىرگەن ەتكە سۇرانىس تا كوپ ەكەن. كىرەبەرىستە قولعا سۋ قۇيىلىپ, سۇلگى ۇسىنىلىپ, تاباقتى كەلىندەر سالەم سالىپ الۋىنىڭ ءوزى قازاقى ورتاعا قىزىعۋشىلىقتى ارتتىرا تۇسەدى. ءتىپتى, قازى-قارتا, جال-جاياسىمەن, قولدان دايىندالعان نان سالعان ەتتى استىرىپ, ءۇي-ۇيگە تاپسىرىسپەن الدىراتىندار قاتارى كوبەيگەن. بيزنەسىن دامىتىپ, ءارى ۇلتتىق استى ناسيحاتتاۋدى قولعا العان كاسىپكەرلەر سۇرانىستىڭ كوپ ەكەندىگىن, قازاقتىڭ ەت اسۋ ونەرىن جانە ءاربىر قازاق ءسۇيىپ جەيتىن ەتتى ۇلتتىق برەندكە اينالدىرۋدى ماقسات ەتىپ وتىر. ورتالىققا كەلگەن قوناقتار, اسىرەسە, شەتەلدىكتەر قازاقتىڭ ەت تاعامىن جەۋمەن بىرگە, ۇلتىمىزدىڭ سالت-ءداستۇرىمەن, ءان-كۇي, جىر-تەرمە تىڭداپ, قازاقتىڭ مادەنيەتىمەن تانىسا تۇسەتىن بولادى.
ورتالىقتان سۇرلەنگەن ەت, جاڭا سويىلعان مالدىڭ ەتى, قوي, سيىر, جىلقى, تۇيە ەتى, قۋىرداق جانە ونىڭ تۇرلەرى, قازى-قارتا, جال-جايا, بۇجى, شۇجىق – بارلىعىن تابۋعا بولادى. تۇرعىنداردىڭ بىرقاتارى قازاقتىڭ ۇلتتىق تاعامىن ناسيحاتتاۋدا ۇتىمدى جول دەسە, ەندى بىرەۋلەرى ەتتى ۇيگە اسىپ اكەلىپ بەرسە, كەلىندەردىڭ «قولى ۇزارىپ, جاسايتىن جۇمىس تاپپاي قالا ما؟» دەپ الاڭداۋلى.
گۇلايىم شىنتەمىرقىزى, «ەگەمەن قازاقستان» ماڭعىستاۋ وبلىسى