«امەريكادا جۇرت گولوۆكيندى بەينە ءبىر «قۇبىجىق» سەكىلدى كورەدى. ولاردىڭ پىكىرىنشە, GGG جەكپە-جەكتە ءبارىن سۇلاتا بەرۋى ءتيىس. تەك اقش-تا عانا ەمەس بۇكىل الەمدە سونداي تۇسىنىك قالىپتاسقان. گەنا بۇل تۇسىنىكتەن قۇتىلۋدىڭ جولىن قاراستىردى. وسىعان بايلانىستى دجەيكوبسپەن 12 راۋند جۇدىرىقتاستى. بويىنداعى بار كۇشىن بۇل جەكپە-جەكتە كورسەتكىسى كەلمەدى. سەبەبى, سوندەرس, الۆارەس سەكىلدى قارسىلاستارىن شوشىتىپ الۋى مۇمكىن. دەنيەل ارقىلى ءوزىنىڭ «قۇبىجىق» ەمەس قاراپايىم بوكسشى ەكەنىن كورسەتكىسى كەلگەندەي.
ونى گەنناديدىڭ قولدانعان ءتاسىلى دەپ ويلاۋعا بولادى. قارسىلاستارىنىڭ وزىنە دەگەن پىكىرىن وزگەرتىپ, ياعني الدارقاتىپ, جەكپە-جەكتەر ۇيىمداستىرماق. بۇل بىرىنشىدەن. ال ەكىنشىدەن, ول قانشا جاستا؟ 1982 جىلى دۇنيەگە كەلدى, قازىر 34 جاستا. بىرەر كۇننەن كەيىن 35-كە تولادى. ءبىز جاسارا تۇسپەيمىز عوي. ۋاقىت وتە كەلە جىلدامدىعىمىز دا, سوققىلارىمىزدىڭ كۇشى دە باسەڭدەيدى. ءار نارسەنىڭ ءوز ۋاقىتى بار. GGG بوكسشى رەتىندەگى كارەراسىن اياقتاۋ تۋرالى ويلانا بەرۋى كەرەك. كىشى فلويد مەيۋەزەر جەڭىلمەگەن بوكسشى رەتىندە رينگتەن كەتكەن سياقتى. بۇل كەز كەلگەن ادامنىڭ بەدەلىن ارتتىرا تۇسەدى», – دەدى ەرماحان ىبرايىموۆ.
وليمپيادا چەمپيونى سونداي-اق, امەريكالىق دەنيەل دجەيكوبس جايلى دا وي ءبولىستى.
«بويى ۇزىن, جىلدام. قاس قاعىم ساتتە وڭعا دا سولعا دا قاشىپ, سوققىلاردان سىتىلىپ شىعىپ كەتەدى. بولاشاعى زور. ودان ۇلكەن ءۇمىت كۇتۋگە بولادى», – دەدى وليمپيادا چەمپيونى.
ايتا كەتەيىك, گەننادي گولوۆكين 18 ءساۋىر كۇنى نيۋ-يوركتەگى Madison Square Garden ارەناسىندا امەريكالىق دەنيەل دجەيكوبسپەن كۇش سىناسىپ, تورەشىلەردىڭ شەشىمى بويىنشا جەڭىسكە جەتكەن بولاتىن. قازاقستاندىق بوكسشى كارەراسىندا العاش رەت 12 راۋندتى تولىق وتكىزدى. كەزدەسۋدەن سوڭ دجەيكوبس رەۆانش جەكپە-جەك ۇيىمداستىرعىسى كەلەتىنىن مالىمدەدى. ال گەنادي وعان قارسى ەمەستىگىن ايتتى.
WBC, WBA (Super), IBF جانە IBO نۇسقالارى بويىنشا الەم چەمپيونى گەننادي گولوۆكين شارشى الاڭعا 10 ماۋسىم كۇنى شىعادى دەپ كۇتىلۋدە. ونىڭ قارسىلاسى ورتا سالماقتاعى بريتان بوكسشىسى WBO بەلبەۋىنىڭ يەگەرى بيللي دجو سوندەرس بولۋى مۇمكىن. قوس تاراپ ازىرگە جەكپە-جەك جونىندە كەلىسىمشارتقا قول قويمادى. GGG ورتا سالماقتاعى بارلىق بەلبەۋدىڭ باسىن قوسىپ, ءابسوليۋتتى چەمپيون بولۋدى ارماندايتىنىن بىرنەشە رەت مالىمدەدى. ال جالعىز قالعان بەلبەۋ ءدال وسى بريتان بوكسشىسىنىڭ يەلىگىندە. قوس تاراپ ورتاق كەلىسىمگە كەلەر بولسا, بوكس كەشى استانادا EXPO-2017 كورمەسى كەزىندە ءوتۋى مۇمكىن.
مالىمەتتەر بويىنشا گولوۆكين وسى كۇزدە مەكسيكالىق ساۋل «كانەلو» الۆارەسپەن دە قولعاپ تۇيىستىرەدى.
ايتا كەتەيىك, «كانەلو» 2015 جىلدىڭ قاراشا ايىندا پۋەرتوريكالىق ميگەل كوتتونى تورەشىلەردىڭ شەشىمىمەن جەڭگەننەن كەيىن WBC نۇسقاسى بويىنشا الەم چەمپيونى اتانعان. 7 مامىردا امير حاندى جەڭىپ, تيتۋلىن قورعاعاننان كەيىن زالدا وتىرعان گەننادي گولوۆكيندى اشىق تۇردە كۇش سىناسۋعا شاقىردى. سونداي-اق, ۇيىم ونى WBC-ءدىڭ تۇراقتى چەمپيونى گولوۆكينمەن جۇدىرىقتاسۋدى مىندەتتەدى. ەكى جاق وتكەن جىلدىڭ 24 مامىرىنا دەيىن بوكس كەشى جونىندە ورتاق ىمىراعا كەلۋى ءتيىس بولاتىن. بىراق 19 مامىر كۇنى مەكسيكالىق سپورتشى WBC بەلبەۋىن قالدىرىپ, سالماعىن اۋىستىراتىنىن مالىمدەدى.
«كارەرامدا مۇنان دا ۇلكەن كەزدەسۋلەر وتكىزدىم. ونداي قادامعا ەكىنىڭ ءبىرى بارا بەرمەيدى. وسىعان دەيىن ەشكىمنەن قورىققان ەمەسپىن. بىراق مەنى ارنايى ۋاقىت بەلگىلەپ شارشى الاڭعا ەشكىم دە شىعارا المايدى», – دەدى الۆارەس.
بۇل ايقاس 2016 جىلدىڭ قىركۇيەگىندە ءوتۋى ءتيىس بولاتىن. بىراق مەكسيكالىقپەن كەلىسىمگە كەلە الماعاننان كەيىن گولوۆكين 11 قىركۇيەكتە كەلل برۋكپەن قولعاپ ءتۇيىستىردى.
دايىنداعان: ايان ءابدۋالي, «ەگەمەن قازاقستان»