جيىنعا قر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا, وڭتۇستىك قازاقستان وبلىسىنىڭ اكىمى جانسەيىت تۇيمەباەۆ, قوستاناي, پاۆلودار, سولتۇستىك قازاقستان جانە شىعىس قازاقستان وبلىستارى اكىمدەرىنىڭ ورىنباسارلارى, وقو قالالارى مەن اۋداندارىنىڭ اكىمدەرى, جوعارىدا كەلتىرىلگەن وڭىرلەردەگى جۇمىسپەن قامتۋدى جانە الەۋمەتتىك باعدارلامالاردى ۇيلەستىرۋ باسقارمالارىنىڭ, حالىقتى جۇمىسپەن قامتۋ ورتالىقتارىنىڭ باسشىلارى, جۇمىس بەرۋشىلەر جانە تاعى باسقا دا تاراپتار قاتىستى.
فورۋم جۇمىسىن اشقان وڭتۇستىك قازاقستان وبلىسىنىڭ اكىمى جانسەيىت تۇيمەباەۆ ءوڭىر حالقىنىڭ تىعىزدىعىنا وراي, مۇندا جىل سايىن اۋىل شارۋاشىلىعى, كاسىپكەرلىك سىندى ماڭىزدى سالالاردا اتقارىلىپ جاتقان جۇمىستاردىڭ جايىنا توقتالدى. جىل سوڭىنا دەيىن كۇنگەيدەن تەرىسكەيگە 400 مىڭ تونناعا جۋىق باقشا, 250 مىڭ توننا كوكونىس, 15 مىڭ توننا جەمىس-جيدەك, 15 مىڭ توننا ءجۇزىم جونەلتۋگە مۇمكىندىكتىڭ بار ەكەنىن, سايكەسىنشە, ول جاقتان بيداي, كارتوپ, مال ازىقتىق جەم ونىمدەردى الماستىرىپ, وڭىرارالىق كووپەراتيۆتەر جۇيەسىن قالىپتاستىرۋ جولدارىنا ءمان بەرۋ قاجەتتىگىن جەتكىزدى.
«بۇگىندە وڭتۇستىكتىڭ باقشالىق ونىمدەرى ونسىز دا مىڭداعان شاقىرىمعا تاسىمالدانىپ, رەسەيگە وتكىزىلىپ جاتىر. ال سول كوكونىستى ءوسىرۋدى سولتۇستىك وڭىرلەردە جولعا قويىپ, شەكارا اسىرۋ الدەقايدا ءتيىمدى بولادى دەپ ويلايمىن. سونىمەن قاتار شارۋالار سولتۇستىكتەن وڭتۇستىككە جەتكىزىلەتىن اۋىل شارۋاشىلىعى ونىمدەرىن دە مولىنان دايىنداپ, وسىندا جىبەرۋىنە مۇمكىندىك تۋادى. بۇل ءوز كەزەگىندە ەلىمىزدەگى ازىق-ت ۇلىك نارىعىن رەتتەۋگە وڭدى ىقپال ەتەتىندىگى ءسوزسىز», - دەدى ج.تۇيمەباەۆ.
قر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ەلباسى حالىقتى جۇمىسپەن قامتۋ سالاسىندا جاڭا جۇمىس ورىندارىن قۇرۋدى باسىم باعىت رەتىندە ايقىنداعانىن اتاپ ءوتىپ, بيىل قازاقستاندا 630 مىڭنان استام جۇمىس ورنى قۇرىلاتىنىن جەتكىزدى. بۇل رەتتە, ت.دۇيسەنوۆا وسى جىلدىڭ 1 قاڭتارىنان باستاپ «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ» باعدارلاماسىن جۇزەگە اسىرۋ قولعا الىنعانىن ەسكە سالىپ, ونىڭ ءاربىر باعىتى بويىنشا تولىققاندى ءتۇسىندىرىپ بەردى.
«بۇدان تۇسىنەتىنىمىز, بارشامىز, ەڭبەك نارىعىن ءتيىمدى رەتتەۋ جولىندا قاي وڭىرلەردە, قانداي سالالار مەن باعىتتاردا قانداي جاڭا جۇمىس ورىندارىن قۇرۋ قاجەتتىگىن ناقتى ءبىلۋىمىز كەرەك. ءبىزدىڭ مينيسترلىك ورتالىق مەملەكەتتىك ورگاندارمەن جانە وڭىرلەرمەن بىرلەسكەن رايدا, مەملەكەتتىك جانە سالالىق باعدارلامالار اياسىندا جۇزەگە اسىرىلاتىن جوبالاردا; جاڭا زاڭدى تۇلعالار تۇرعىسىندا; ەڭبەك رەسۋرستارىنىڭ وزىندىك ورىن اۋىستىرۋى جونىندە (زەينەتكە شىعۋ, انا بولۋعا بايلانىستى دەمالىس جانە وزگە دە) قۇرىلاتىن جۇمىس ورىندارىنا قاتىستى ماقساتتى ينديكاتورلاردى انىقتادى. سونىمەن قاتار, وبلىستار, استانا مەن الماتى قالالارى اكىمدەرىمەن بىرلەسكەن جاعدايدا, ءتيىستى مەموراندۋمدارعا قول قويدىق. جالپى, ەلىمىزدە, مەملەكەت كومەگىنە جۇگىنەتىن جۇمىسسىز ازاماتتاردى ەڭبەكپەن قامتۋدا كادەگە جارايتىن قور رەتىندە 630 مىڭنان استام جۇمىس ورنىن قۇرۋ كوزدەلىپ وتىر», - دەدى تامارا دۇيسەنوۆا.
«وڭىرلەر اراسىنداعى ەڭبەك رەسۋرستارىنىڭ قوزعالىسىنا ەرەكشە كوڭىل بولۋدەمىز. وسى اپتادا رەسپۋبليكامىزدا العاشقىلاردىڭ ءبىرى بولىپ وڭتۇستىك قازاقستان وبلىسى 4 وڭىردەن جۇمىس بەرۋشىلەر ۇسىنعان بوس جۇمىس ورىندارىمەن تانىسۋدىڭ جانە وسىلايشا ءوز ماماندىعى بويىنشا تاڭداۋ جاساۋدىڭ تاماشا مۇمكىندىگىن جاسادى. بۇل ارقىلى, ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسىن جۇزەگە اسىرۋ اياسىندا, قازاقستاندىقتارعا سۇرانىسقا يە كاسىپكە تەگىن وقىپ قانا قويماي, جاڭادان اشىلاتىن جۇمىس ورنىنا, جۇمىس بەرۋشىدەگى بوس ورىنعا ورنالاسۋدى نەمەسە جەكە ءىس اشۋدى تاڭداۋدى قامتاماسىز ەتەمىز. وبلىستار اراسىندا دا ەڭبەككە جۇمىلۋدى ارتتىرۋدان تىس, ونەركاسىپ, اۋىلشارۋاشىلىق, كولىك-لوگيستيكا, ساۋدا جانە قىزمەت كورسەتۋ سالالارىندا جوبالاردى بىرلەسە ىسكە اسىرۋ باعىتىندا تىعىز قارىم-قاتىناس ورناتقان ءجون. سوندىقتان دا وسى بيزنەس-فورۋمدى وتكىزۋ جايلى باستاما كوتەردىك. ءۇش كۇندىك ءىس-شارانى جوعارى دەڭگەيدە ۇيىمداسىتىرىپ وتىرعان وڭتۇستىك قازاقستان وبلىسىنىڭ باسشىلىعىنا العىسىمدى بىلدىرىمەن», - دەدى ت.دۇيسەنوۆا.
مينيستر, ەرىكتى كوشى-قوندى ىنتالاندىرۋ ماقساتىندا, ەل ۇكىمەتى ورالمانداردى قوسقاندا قونىس اۋدارۋشىلاردى قابىلداۋدا 7 ءوڭىردى (اقمولا, اتىراۋ, شىعىس قازاقستان, باتىس قازاقستان, قوستاناي, پاۆلودار جانە سولتۇستىك قازاقستان) جانە كوشتىڭ قاينار كوزى رەتىندەگى 4 ءوڭىردى (الماتى, جامبىل, ماڭعىستاۋ جانە وڭتۇستىك قازاقستان وبلىسى) بەلگىلەگەنىن ەسكە سالدى. اتالمىش وڭىرلەردەن شىعاتىن ەڭبەك ميگرانتتارىنا كوش شىعىندارىن جاباتىن جانە ءبىر جىل بويى باسپانا جالداۋعا قاجەت قارجىنى وتەيتىن سۋبسيديا بولىنبەك. بارلىق باعدارلامالارعا ساي بەرىلەتىن جاردەمقارجىنىڭ جيىنتىق كولەمى 18 ملن تەڭگەگە دەيىن ۇلعايتىلىپ وتىر. نەسيە 6 پايىزبەن بەرىلەتىن بولادى.
فورۋمدا ءسوز العان سولتۇستىك قازاقستان وبلىسى اكىمىنىڭ ورىنباسارى اسقار ساقىپكەرەەۆ بيىلعى جىلى 300 وتباسىنى قابىلداۋعا دايىن ەكەندىكتەرىن جەتكىزدى. ول ءۇشىن 600 باسپانا, 1 مىڭعا جۋىق جۇمىس ورنى مەن 35 مىڭ گەكتار ەگىستىك جەر ازىرلەنىپ جاتقانىنا توقتالدى.
شىعىس قازاقستان وبلىسى اكىمىنىڭ ورىنباسارى اسەم نۋسۋپوۆانىڭ ايتۋىنشا, كوشىپ كەلەتىن 150 وتباسىعا رەيدەر جانە شەمونايحا اۋداندارىندا تۇرعىن ءۇي بەرىلەتىن بولادى. جالپى بۇگىندە شىعىس وڭىرىندە بوس جۇمىس ورنى 2 مىڭ 105-كە جەتىپ وتىر ەكەن.
بيىل سونداي-اق قوستاناي وبلىسى وڭتۇستىكتەن قونىس اۋداراتىن 30 وتباسىنى قابىلداۋعا نيەت ءبىلدىرىپ وتىر. ال پاۆلودار وبلىسى قونىس اۋدارۋعا نيەتتى 100 وتباسى ءۇشىن 473 بوس جۇمىس ورنىن ۇسىنباق.
جيىن سوڭىندا ەڭبەك رەسۋرستارىنا سۇرانىستى قاناعاتتاندىرۋ مەن ەڭبەك نارىعىنىڭ موبيلدىلىگىن ارتتىرۋ ماسەلەلەرى بويىنشا وڭتۇستىك قازاقستان وبلىسى مەن سولتۇستىك قازاقستان وبلىسى, قوستاناي, پاۆلودار, شىعىس قازاقستان وبلىستارى اكىمدىكتەرى اراسىندا ىنتىماقتاستىق مەموراندۋمىنا قول قويىلدى.
ايتا كەتۋ كەرەك, مۇنداي بيزنەس-فورۋمداردى الداعى ۋاقىتتا ماڭعىستاۋ, جامبىل جانە الماتى وبلىستارىندا وتكىزۋ ۇيعارىلىپ وتىر.