وبلىس اكىمىنىڭ وكىمىمەن جولداسباەۆ نۇرلىبەك قالجاتاي ۇلى قىزىلوردا وبلىسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى لاۋازىمىنا تاعايىندالدى.
نۇرلىبەك جولداسباەۆ 1955 جىلى تۋعان. ك.ا.تيميريازەۆ اتىنداعى ماسكەۋ اۋىل شارۋاشىلىعى اكادەمياسىن «زووتەحنيك-زووينجەنەر» ماماندىعى بويىنشا بىتىرگەن. ەڭبەك جولىن 1972 جىلى جالاعاش اۋدانىنىڭ «مادەنيەت» كەڭشارىندا جۇمىسشى بولىپ باستاعان.
ءوزىنىڭ ەڭبەك جولىندا نۇرلىبەك قالجاتاي ۇلى مەملەكەتتىك قىزمەت سالاسى مەن جەكە سەكتوردا جاۋاپتى باسشىلىق قىزمەتتەر اتقارعان. وبلىستىق اۋىل شارۋاشىلىعى جانە جەر قاتىناستارى باسقارمالارىن باسقارعان, جالاعاش جانە جاڭاقورعان اۋداندارىنىڭ اكىمى بولعان. 2013 جىلدىڭ شىلدە ايىنان باستاپ قىزىلوردا وبلىسىنىڭ ەڭبەك سالاسىنداعى باقىلاۋ باسقارماسىنىڭ باسشىسى قىزمەتىن اتقارىپ كەلدى.