«نۇر وتان» حدپ-نىڭ پارلامەنت ماجىلىسىندەگى فراكتسياسىنىڭ جانىنداعى الەۋمەتتىك كەڭەس «ءوزىن-ءوزى جۇمىسپەن قامتىعان حالىق – قازاقستاندى يندۋستريالىق دامىتۋدىڭ كادرلىق رەزەرۆى» دەگەن تاقىرىپتا دوڭگەلەك ۇستەل وتكىزدى.
جينالىستى «نۇر وتان» حدپ-نىڭ پارلامەنت ءماجىلىسىندەگى فراكتسياسى جانىنداعى الەۋمەتتىك كەڭەس ءتورايىمى ايتكۇل ساماقوۆا جۇرگىزىپ وتىردى. نەگىزگى باياندامانى ەڭبەك جانە حالىقتى الەۋمەتتىك قورعاۋ ءمينيسترىنىڭ ورىنباسارى ءبىرجان نۇرىمبەتوۆ جاسادى.
ەلباسى نۇرسۇلتان نازارباەۆ قازاقستان حالقىنا جولداۋىندا «ءوزىن-ءوزى جۇمىسپەن قامتىعان حالىق – ءبىزدىڭ ەكونوميكانىڭ ەڭ ماڭىزدى كادرلىق رەزەرۆى بولىپ تابىلادى», دەي كەلىپ, ەلدى اۋقىمدى يندۋستريالاندىرۋعا ءار قازاقستاندىقتىڭ قاتىسۋ مۇمكىندىگىن قامتاماسىز ەتۋ قاجەتتىگىن باسا ايتقان بولاتىن.
2010-2014 جىلدارعا ارنالعان قازاقستان رەسپۋبليكاسىن ۇدەمەلى يندۋستريالىق-يننوۆاتسيالىق دامىتۋدىڭ مەملەكەتتىك باعدارلاماسى 161 مىڭ تۇراقتى جۇمىس ورنىن جانە قۇرىلىس كەزەڭىندە 207 مىڭ جۇمىس ورنىن قۇراتىن, جالپى سوماسى 8,1 تريلليون تەڭگە بولاتىن 294 جاڭا جوبانى ىسكە اسىرۋدى قاراستىرادى. باعدارلامادا جەتى باسىم باعىت ايقىندالعان. بۇلار – اوك, مەتاللۋرگيا, مۇناي وڭدەۋ, ەنەرگەتيكا, حيميا ونەركاسىبى مەن فارماتسەۆتيكا, قۇرىلىس يندۋسترياسى, كولىك جانە اقپاراتتىق كوممۋنيكاتسيالاردى دامىتۋ.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتتەرى بويىنشا, ۇدەمەلى يندۋستريالىق-يننوۆاتسيالىق دامۋ باعدارلاماسى ءۇشىن كادرلارعا سۇرانىس 108 مىڭ ماماندى قۇرايدى. اتاپ ايتقاندا, تەرەڭ بۇرعىلاۋ ينجەنەرلەرى, مۇناي مەن گاز وپەراتورلارى, گەوفيزيكتەر, ەنەرگەتيكتەر, مونتاجشىلار, دانەكەرلەۋشىلەر, توكار-فرەزەروۆششيكتەر, ەلەكتر جۇيەلەرىنە قىزمەت كورسەتەتىن ماماندار, كومپرەسسورلىق ستانسالار مەن جەر استى قۇبىرلارىنىڭ جانە ت.ب. شەبەرلەرى سياقتى جوعارى جانە ارنايى بىلىكتىلىگى بار جۇمىسشىلار قاجەت. 2010-2014 جىلدارى ەكونوميكانىڭ كادرلارعا جالپى سۇرانىسى 287 مىڭ ادامدى قۇرايدى.
وتىرىس بارىسىندا جۇمىسقا ورنالاستىرۋ مەن ءوزىن ءوزى جۇمىسپەن قامتىعانداردىڭ, جۇمىسسىزداردىڭ جانە از قامتىلعان تۇرعىنداردىڭ ءومىر ءسۇرۋ دەڭگەيىن ارتتىرۋ جولدارى تالقىلاندى.
شاراعا پارلامەنت ءماجىلىسىنىڭ دەپۋتاتتارى, مەملەكەتتىك جانە ۇكىمەتتىك ەمەس ۇيىمداردىڭ جەتەكشىلەرى قاتىستى. وتىرىستىڭ قورىتىندىلارى بويىنشا ءتيىستى ۇسىنىستار ازىرلەندى.
ساۋلە دوسجانوۆا, جۋرناليست.