تۇركيانىڭ پرەمەر-ءمينيسترى بينالي يىلدىرىم جەرگىلىكتى تەلەارنالاردىڭ بىرىندە تىكەلەي ەفيردە كۇن تارتىبىندەگى ماسەلەلەرگە قاتىستى ساۋالدارعا جاۋاپ بەرە وتىرىپ, وتكەن جىلدىڭ 24 تامىزىندا باستالعان تۇركيانىڭ سيرياداعى "ەۆفرات قورعانى" اسكەري وپەراتسياسىنىڭ توقتاتىلعانىن ايتتى.
ءوز سوزىندە ۇكىمەت باسشىسى "ەۆفرات قورعانى" اسكەري وپەراتسياسى ءوز ميسسياسىن ورىنداپ شىققانىن ايتتى, دەپ حابارلايدى Hurriyet باسىلىمى.
يىلدىرىمنىڭ ايتۋىنشا, قاجەتتىلىك بولعان جاعدايدا ەلدىڭ اسكەري كۇشى ترانسشەكارالىق ايماقتارعا شوعىرلاندىرىلۋى مۇمكىن.
اتالعان وپەراتسيا بارىسىندا تۇركيا ەۆفرات وزەنىنىڭ جاعاسىنداعى دجارابلۋس قالاسىن الىپ, ونى "يسلام مەملەكەتى" (قازاقستاندا تىيىم سالىنعان تەررورلىق ۇيىم) لاڭكەستەرىنەن تازارتتى. ودان كەيىن تۇركيا اسكەرى وڭتۇستىكتەگى ءال-بابۋ قالاسىنا ورنالاستىرىلدى.
قازىرگى تاڭدا ايماقتا تۇركيا اسكەرى ءالى دە بار, دەگەنمەن, ناقتى قانشا ەكەنى ازىرگە بەلگىسىز قالىپ وتىر, دەپ جازادى باسىلىم.