باتىس قازاقستان وبلىسى تۇتىنۋشىلاردىڭ قۇقىقتارىن قورعاۋ دەپارتامەنتى قىزمەتكەرلەرى سوڭعى كەزدە ساۋدا ورىندارىنا قاراپايىم تۇتىنۋشى رەتىندە بارىپ, ساۋدا جاساپ, ساتىپ العان تاۋارلاردى زەرتحانادان وتكىزۋدى ادەتكە اينالدىرعان.
– بىلتىر دەپارتامەنت تاراپىنان تەكسەرۋلەر 2015 جىلمەن سالىستىرعاندا 2,5 ەسەگە ازايدى. قازىرگى ءتارتىپ بويىنشا ساۋدا ورنىن جىلىنا ءبىر-اق رەت تەكسەرە الامىز, ونىڭ ءوزىندە 1 اي بۇرىن ەسكەرتۋگە ءتيىسپىز, – دەيدى وبلىستىق تۇتىنۋشىلاردىڭ قۇقىقتارىن قورعاۋ دەپارتامەنتىنىڭ باسشىسى جايدار قۇرمانوۆ.
ارينە, مەملەكەت تاراپىنان كورسەتىلىپ وتىرعان قولداۋدى تەرىس پايدالانىپ, قاراپايىم تۇتىنۋشىنىڭ قۇقىعىن ەسكەرمەي كەتەتىن «كاسىپكەرلەر» دە تابىلادى. بىراق, ولاردى دا اشكەرەلەۋدىڭ جولى تابىلعان. باتىسقازاقستاندىق سانيتارلار وبلىس اۋماعىنداعى ەلدى مەكەندەردىڭ حالىق كوپ باراتىن ساۋدا ورىندارىنان حالىقتىڭ باسىم بولىگى تۇتىناتىن تاۋار ونىمدەرىن ارنايى ساتىپ الادى. بۇل ءۇشىن مەملەكەتتەن ارنايى قارجى بولىنگەن. وسى تاۋارلار دەپارتامەنتتىڭ ءتۇرلى زەرتحانالارىندا ساراپتامادان وتكىزىلىپ, قالىپقا ساي كەلمەيتىن, زاڭ بۇزۋشىلىق فاكتىلەرى بولسا, كىنالىلەر جاۋاپقا تارتىلادى.
ماسەلەن, 2016 جىلى 2430 ءونىم سانيتارلىق-ەپيدەميولوگيالىق ساراپتاما جۇرگىزۋ ءۇشىن ساتىپ الىنىپ, زەرتحانادان وتكىزىلدى. ونىڭ 70 پايىزدان استامى تاماق ونىمدەرى. تەكسەرىلگەن تاۋاردىڭ ىشىندە 619 ونىمنەن (25,4%) ءتۇرلى دارەجەدەگى ءسايكەسسىزدىك انىقتالعان. مىسالى, كەيبىر تاۋاردىڭ جازۋى مازمۇنىنا ساي ەمەس, كەيبىرىنىڭ ميكروبيولوگيالىق قۇرامىندا اۋىتقۋشىلىق تابىلعان. تەكسەرۋلەر ءناتيجەسىندە قىزمەتىنەن كەمشىلىك تابىلعان كاسىپكەرلەرگە 192 ۇيعارىم بەرىلدى. 24 وقيعا بويىنشا ايىپپۇل سالىنعان. ايىپپۇلدىڭ جالپى سوماسى – 5 514 600 تەڭگە.
قازبەك قۇتتىمۇرات ۇلى,
«ەگەمەن قازاقستان»
ورال