مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ وبلىستىق دەپارتامەنتىنىڭ باسشىسى, ادەپ جونىندەگى كەڭەستىڭ توراعاسى عالىم تۇرسىنباەۆتىڭ جەتەكشىلىگىمەن وتكەن وتىرىسقا مەملەكەتتىك قىزمەت سالاسىنداعى باقىلاۋ دەپارتامەنتىنىڭ ديرەكتورى – ادەپ جونىندەگى ۋاكىل قۋانىش جاپاقوۆ قاتىستى.
كۇن تارتىبىنە بەس ماسەلە شىعارىلىپ, الدىمەن جەرگىلىكتى پوليتسيا قىزمەتىنىڭ باستىعى قانات ايتباەۆ پەن اكىمشىلىك پوليتسيا باسقارماسى جەتەكشىسىنىڭ ورىنباسارى بولات جەكسەنبينوۆتىڭ ەسەپتەرى تىڭدالدى. كەڭەس مۇشەلەرى قۇقىقتىق-نورماتيۆتىك اكتىلەر بويىنشا تۇراقتى مونيتورينگ جۇرگىزىپ وتىرۋدى, جۇمىس تيىمدىلىگىن ارتتىرۋعا تۇراقتى نازار اۋدارۋدى, ادەپ كودەكسى تالاپتارىن قاتاڭ ساقتاۋدى, ۇجىم اراسىندا قۇقىقتىق ساۋاتتىلىقتى ۇدايى جەتىلدىرۋدى, ءتارتىپ پەن تالاپتى بوساڭسىتپاۋدى تاپسىردى.
كەڭەستە ەسەپ بەرگەن اققايىڭ اۋدانى اكىمىنىڭ مىندەتىن اتقارۋشى ەركىن جاقىپوۆتىڭ اتىنا بىرقاتار سىندار ايتىلدى. ادەپ نورمالارىن بۇرمالاعانى ءۇشىن ەكى مەملەكەتتىك قىزمەتشى اكىمشىلىك جازاعا تارتىلعان. الداعى ۋاقىتتا بيۋدجەتتىك زاڭ نورمالارىن بۇرمالاماۋ, جۇمىس ساپاسىن نىعايتۋ اتاپ كورسەتىلدى. قالا اكىمىنىڭ ورىنباسارى قايروللا عالەەۆ تۇرعىن ءۇي-كوممۋنالدىق شارۋاشىلىق, جەر قاتىناستارى, قۇرىلىس جانە قالا قۇرىلىسى ماسەلەلەرى بويىنشا اقپار بەردى.
كۇن تارتىبىنە ەسىل اۋدانى توراڭعۇل اۋىلدىق وكرۋگىنىڭ اكىمى بيبىگۇل ەرمەكبايدىڭ ماسەلەسى شىعارىلعاندا تالقىلاۋ قىزىپ سالا بەردى. جەرگىلىكتى شەنەۋنىكتىڭ كەڭەس الدىندا جاۋاپ بەرۋىنە اۋىل تۇرعىنى دينا يۆانوۆانىڭ شاعىمى تۇرتكى بولعان. تەكسەرۋ ءناتيجەلەرى اكىمنىڭ مەملەكەتتىك قىزمەتشىگە قاتىستى ادەپ تالاپتارىن ورەسكەل بۇزعانىن كورسەتىپ بەردى. ەلباسى جولداۋىن تالقىلاۋ جينالىسىندا تۇرعىندارعا دورەكى مىنەز تانىتقان. ونى جاۋاپكەردىڭ ءوزى مويىنداعانىمەن, بالاعات سوزدەر ايتپاعانىنا سەندىرۋگە تىرىستى.
الايدا, كەڭەس مۇشەلەرى كوپشىلىك داۋىسپەن ونى قىزمەتىنەن بوساتۋ جونىندە شەشىم الىپ, اۋدان اكىمىنىڭ قاراۋىنا جىبەردى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى