بيولوگ عالىمدار, اۋىل شارۋاشىلىعى ماماندارى قاتىسقان شاراعا «اۋىل» پارتياسىنىڭ توراعاسى, پارلامەنت سەناتىنىڭ دەپۋتاتى ءالي بەكتاەۆ توراعالىق ەتتى.
وسى جيىندا «اۋىل» پارتياسىنىڭ توراعاسى قۇرامىندا گمو بار ونىمدەر ادام ومىرىنە قاۋىپتى ەكەنىن ايتىپ, ەلىمىزگە كەلەتىن وسىنداي ونىمدەردى شەكتەۋ قاجەت دەگەن ۇسىنىس ايتتى.
– وزدەرىڭىزگە بەلگىلى, ەكولوگيالىق تازا ءونىم – تازا جەردە, مينەرالدىق تىڭايتقىشسىز, پەستيتسيدتەر مەن وزگە دە تەحنوگەندى قوسپاسىز, نە بولماسا تازا شيكىزاتتان زاماناۋي تەحنولوگيامەن وندىرىلگەن, ەشبىر ارتىق قوسپاسىز الىنعان ءونىم. ەكولوگيالىق تازا ازىق-ت ۇلىكتىڭ قۇرامىندا گەندىك موديفيكاتسيالانعان اعزالار, سينتەتيكالىق كونسەرۆانتتار, جاساندى دامدەۋىشتەر مەن حوش يىستەندىرگىشتەر, حيميالىق تىڭايتقىشتار, قۇرت تۇسۋگە قارسى ءدارى-دارمەكتەر بولمايدى, سوندىقتان تازا بولادى. ورگانيكالىق نەگىزدە وسىرىلگەن ءونىم – قاشاندا پايدالى. كوكونىس پەن جەمىس-جيدەكتىڭ قاۋىپسىز جانە پايدالى بولۋىن تابيعات-انانىڭ ءوزى قامتاماسىز ەتىپ قويعانداي. نەعۇرلىم سىرتقى ىقپال از بولسا – سولعۇرلىم پايداسى ساقتالادى, – دەدى ول.
ونىڭ ايتۋىنشا, قۇرامىندا گمو بار تاياۋ جانە الىس شەت ەلدەردەن اكەلىنەتىن ونىمدەر ادام ءومىرى ءۇشىن قاۋىپتى. قۇرامىندا گمو بار ونىمدەر ءونىم قورابىندا گمو-نىڭ بار ەكەندىگىن كورسەتۋدى مىندەتتەيتىن زاڭعا قاراماستان, قازاقستاندىق نارىققا ەركىن ەنۋدە. بۇل گمو-نى انىقتاۋعا ارنالعان ارنايى زەرتحانالاردىڭ جەتكىلىكسىزدىگىنەن ورىن الۋدا. ال ەڭ باستى قاۋىپ – ازىق-ت ۇلىكپەن قاتار, گمو-نى قولدانۋ تەحنولوگياسى تۇقىم, تىڭايتىش, حيميكاتتار تۇرىندە اكەلىنۋدە. ال بۇل توپىراقتىڭ ءوزىن بۇلدىرەدى. بۇل ادام ومىرىنە وتە قاۋىپتى.
وسى جيىندا ايتىلعانداي, گمو-عا قاتىستى ەڭ ليبەرالدى زاڭ اقش-تا ەكەن. ال ەۋرووداق ەلدەرى گمو قوسىلعان ازىق-ت ۇلىكتەردى وندىرۋگە جانە يمپورتتاۋعا قاتاڭ شەكتەۋ قويعان. اتالعان ەلدەردىڭ ءتارتىبى بويىنشا, قۇرامىنداعى گمو ۇلەسى 0,9 پايىزدان اسقان بارلىق ءونىمدى ماركەرلەۋ كەرەك.
دوڭگەلەك ۇستەلدە بايانداما جاساعانداردىڭ پىكىرى ءبىر جەردەن شىقتى. ەلىمىزگە شەت ەلدەن كەلەتىن تۇقىمدار مەن ەگىستىككە قاجەتتى ماتەريالداردىڭ قۇرامىنداعى بوگدە گەندەردى انىقتايتىن, ەگىستىك القاپتارىنا مونيتورينگ جۇرگىزەتىن, گمو-عا قاتىسى بار قىزمەتتەردى تىركەۋدىڭ, يمپورتتاۋ مەن ەكسپورتتاۋدىڭ شارتتارىن, ولارعا رۇقسات بەرۋ جۇيەسىن قاداعالايتىن كەشەندى مەملەكەتتىك باعدارلاما كەرەك دەگەن تۇجىرىم جاسالدى. سونداي-اق, ناقتى ۇسىنىستار ءتىزىمى ازىرلەندى.
ارنۇر اسقار,
«ەگەمەن قازاقستان»