جۇمىس توبىنىڭ قۇرامىندا كوميتەت مۇشەلەرى, سەناتورلار ي.ادىربەكوۆ, م.التىنباەۆ, ن.ابىقاەۆ, س.جاقسىبەكوۆ, ل.قيىنوۆ, گ.كيم بار. ولاردى اۋەجايدان وبلىس اكىمى جانسەيىت تۇيمەباەۆ كۇتىپ الدى.
كوميتەت مۇشەلەرى, ەڭ الدىمەن, قازاقستان قارۋلى كۇشتەرىنىڭ شىمكەنت گارنيزونىندا بولىپ, جەكە قۇرامنىڭ كۇندەلىكتى تىنىس-ءتىرشىلىگىمەن تانىستى. سونداي-اق, اۆياتسيالىق بازانىڭ اسكەري ءبولىمدەرىندەگى جاۋىنگەرلىك كەزەكشىلىكتىڭ ۇيىمداستىرىلۋىن, سۋ-25, ميگ-29 ۇشاقتارى مەن مي-17, مي-171 ش جانە مي-35 م تىكۇشاقتارى تۇرعان اۋە شابۋىلىنا قارسى قورعانىس اسكەرلەرىن كوردى. راديوتەحنيكالىق جانە زەنيتتىك زىمىران ەسەپتوپتارى مەن اسكەري اۆياتسيا ەكيپاجدارىنىڭ جاۋىنگەرلىك مۇمكىنشىلىكتەرىن تاماشالادى.
بۇدان سوڭ قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعىنىڭ شىمكەنت قالاسىنداعى 6506 اسكەري بولىمىنە ارنايى كەلدى. كەزدەسۋ بارىسىندا ۇلتتىق ۇلاننىڭ «وڭتۇستىك» ءوڭىرلىك قولباسشىلىعىنىڭ قولباسشىسى, گەنەرال-مايور قايرات اقتانوۆ دەپۋتاتتاردى ەلىمىزدىڭ «وڭتۇستىك» وڭىرلىك قولباسشىلىعى 6506 اسكەري ءبولىمىنىڭ جاۋىنگەرلىك قىزمەتى جانە اسكەردىڭ جەكە قۇرامىنا جۇكتەلگەن قۇقىق قورعاۋ مىندەتتەرى تۋرالى, سونداي-اق, اسكەري قۇرىلىمدى ودان ءارى دامىتۋداعى كەلەشەكتە اتقارىلاتىن ىستەر جايىندا حاباردار ەتتى.
ساپار بارىسىندا سەناتورلارعا تەحنيكانىڭ, قارۋ-جاراق پەن قورعانىس قۇرالدارىنىڭ جاڭا ءۇلگىلەرى, سونداي-اق, ۇلتتىق ۇلان قامتاماسىز ەتىلگەن كيىم ۇلگىلەرى تانىستىرىلدى. «جاس ءبۇركىت» ءاسكەري-پاتريوتتىق كلۋبىنىڭ جاۋىنگەرلەرى وزدەرىنىڭ ءادىس-ءتاسىلدەرىنەن قويىلىمدار كورسەتتى. كوميتەت مۇشەلەرى گارنيزونداعى ىشكى اسكەردىڭ 1995 جىلى تاجىك-اۋعان شەكاراسىندا قازا تاپقان جاۋجۇرەك 17 جاۋىنگەرىنىڭ ەسكەرتكىشىنە تاعزىم ەتىپ, گۇل شوقتارىن قويدى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى