بۇل جوباعا قاتىسقان قاراپايىم ماماندىق يەلەرى وزدەرىن جۇلدىز سەزىنىپ, ونىڭ ۇستىنە قارجىلاي سىيلىق ءۇشىن باق سىناپ كورەدى. جاقسى مۇمكىندىك. جوبانىڭ يدەياسى تىڭ, كورەرمەننىڭ سۇرانىسىنا جاۋاپ بەرەدى. ونىڭ ۇستىنە, ماماندىقتاردى جان-جاقتى, قىر-سىرىن اشىپ كورسەتە السا, جاقسى ءۇردىس قالىپتاستىرا الار ەدى. وتكەن سەنبى, 25-ناۋرىزدا باعدارلامانىڭ العاشقى سانى جارىق كوردى. ەلەڭ ەتكىزگەن جوبا بولعان سوڭ, ارنايى ۋاقىت ءبولىپ تاماشالادىق.
ءبىرىنشى ويعا تۇيەتىنى – وتباسىلىق جوبا. بالاعا دا, ۇلكەنگە دە بىردەي قىزىقتى كورىندى. ارينە, سوزىلىڭقى تۇستارى بار. ونى ءسال كەيىن تالداپ ايتارمىن. ساحنانىڭ ارلەنۋى, جارىق قويىلۋى ءساتتى. تەحنيكالىق جاعىنان مامان بولماعاندىقتان, تەك باسقا جوبالارمەن سالىستىرىپ قانا ايتا الامىز. سونىڭ وزىندە كوزگە ايرىقشا كورىنىپ تۇر. قازىلار القاسى اسا ءبىر ءساتتى تاڭدالعان دەپ ويلايمىن. تەك كومپوزيتور ارمان دۇيسەنوۆتىڭ ۇيقاستىرىپ ماقتاي بەرگەنى بولماسا. بۇل قازىلار القاسىنا ارنايى ويلاستىرىلعان وبراز بولۋى دا مۇمكىن.
ەكى جۇرگىزۋشى جىگىت اشىلا قويمادى. بارىنشا ۇستامدى. بارىنشا كلاسسيكالىق وبراز قالىپتاستىرعىسى كەلدى. دەگەنمەن, ءسوز ساپتاۋلارى دۇرىس, تەك وزدەرىن ءسال ەركىنىرەك سەزىنسە ەكەن دەيسىڭ. ول بولاشاق باعدارلامالار ەنشىسىندە دەپ ۇمىتتەنەيىك.
ءبىرىنشى باعدارلاماعا ءۇش كوماندا تاڭدالعان ەكەن: ءورت سوندىرۋشىلەر, بايلانىس قىزمەتكەرلەرى جانە كىلەم توقۋشىلار. ۇشەۋى دە وتە ماڭىزدى, قىزىقتى, تابىستى كاسىپ. توپ مۇشەلەرى اركەلكى. ۇلكەنى دە, كىشىسى دە, ەرى دە, ايەلى دە بار. الايدا قاتىسۋشىلار مەن ولاردىڭ كاسىبى تۋرالى جاسالعان سيۋجەتتەر ولاردى تولىق اشا الماعان سياقتى. قاتىسۋشىلار - كامەرا كورسە توقتاي الماي قالاتىن ەسترادا جۇلدىزدارى ەمەس, قىسىلىپ تۇرعانى كورىنىپ تۇر. ونىڭ بارلىعى رەجيسسەرلەردىڭ ولارمەن جۇمىس ىستەمەگەنىنەن دەپ سەنىممەن ايتۋعا بولادى. ويتكەنى شەتەلدىك جوبالاردا قاراپايىم ادامدار جۇلدىزداردان دا شيراق سويلەپ, ەركىن قيمىلدايدى.
رەاليتي جوبا بولعاندىقتان, كەيىپكەرلەردىڭ شىنايى وقيعالارىن, باستان كەشكەن قىزىقتارىن, ەموتسيالارىن كورگىڭ كەلەدى. الايدا, ءبىرىنشى شىعارىلىم تۋرا وسى تۇستا جۇتاڭداۋ كورىندى.
ال كوماندالار ساحناعا شىققاندا مۇلدە باسقاشا اسەر الدىم. ۇزاق دايىندالىپ, ءار دەتالدى ويلاستىرعان. ساحنالىق كيىمدەرى, قويىلىمدارى وزگەشە. وسى جەردە قاتىسۋشىلار دا وزدەرىن ەركىن سەزىنە باستادى. ورىنداۋعا تاڭدالعان ءۇش ءان دە تانىمالدىلىعى جاعىنان داۋ تۋدىرمايتىن اندەر. تەك “دۋدار-اي” انىنە ءسال ديناميكالىق قويىلىم جەتىسپەگەن سياقتى بولدى. ال قايرات نۇرتاس مۋزەيى مەن باتىرلار كوڭىلدەن ەرەكشە شىقتى. سول ەكى توپقا وتباسىمىزبەن بولىسىپ وتىردىق.
ۇلتتىق ارنانىڭ وسىنداي قىزىقتى جوبا ۇسىنعانى - كورەرمەن پىكىرىنە كوڭىل اۋدارعانى. سوندىقتان وسى مازمۇندى جوبالار كوبىرەك شىعارىلا باستايدى دەپ سەنۋگە بولادى. ازداعان كەمشىلىكتەر ءوندىرىس كەزىندە جويىلسا, ء“ان سالادى ماماندار” سىندى جوبالار كورەرمەن كوزايىمىنا اينالىپ, تىنىسى كەڭەيە تۇسەر ەدى.
گۇلنۇر قۋانىشبەكقىزى, "ەگەمەن قازاقستان"