دەگەنمەن دە, قالاشىق جانىندا ورنالاسقان ەلدى مەكەننىڭ ماسەلەسى قازىر وزەكتى بولىپ تۇر.
مۇندا 110 ءۇي بار بولسا, سول 110 ءۇيدىڭ 10 گەكتار جەرگە ورنالاسقان 30 ءۇيىنىڭ جەرى الماتى وبلىسى جامبىل اۋدانىنا قارايدى ەكەن. حالقى دا جامبىل وبلىسىنىكى بولىپ سانالادى. ەندى نەلىكتەن وبلىسارالىق شەكارا ءاۋ باستا دۇرىس بەلگىلەنبەگەن دەگەن وي كوپكە تۇسىنىكسىز بولعانىمەن, تۇرعىندار ءۇشىن شيرەك عاسىر بويى شەشىمىن تاپپاي كەلە جاتقان قازىرگى ماسەلە وسى.
ال وتار اۋىلدىق وكرۋگىنىڭ اكىمى جايلىبەك شاديەۆ ەندى بۇل جاعداي تۇرعىنداردىڭ ءتىركەۋگە تۇرۋىنا, ءۇي قۇجاتتارىن رەسىمدەۋىنە جانە وزگە دە شارۋالارىنا كەدەرگى كەلتىرىپ وتىرعانىن ايتادى. بۇل ءماسەلە ىلگەرىدە كوتەرىلسە دە, شەشىمىن تاپپاعان. سونداي-اق, وبلىسارالىق شەكارالىق ءماسەلەگە بايلانىستى گۆاردەيسك قالاشىعىندا ورنالاسقان 4 قاباتتى 70 پاتەرلى 1 ءۇيدىڭ قۇجاتتارى دا رەسىمدەلمەي وتىرعان كورىنەدى. ال اتالعان قالاشىقتا وسىدان 5 جىل بۇرىن ەل يگىلىگىنە بەرىلىپ, بۇگىندە حالىققا قىزمەت كورسەتىپ تۇرعان 30 كەلۋشىگە ارنالعان دارىگەرلىك امبۋلاتوريا, 900 ورىندىق ورتا مەكتەپ جانە 350 ورىندىق بالاباقشانىڭ قۇجات ماسەلەسى دە شەشىلمەي وتىر. جامبىل وبلىسىنداعى ءىرى اۋدانداردىڭ ءبىرى − قوردايداعى ءبىر ماسەلە وسىنداي.
تالاي جىل بويى اسكەري قىزمەتتە بولىپ, بۇگىندە زەينەت دەمالىسىنا شىققان جەرگىلىكتى تۇرعىن تالاسبەك تەرلىكباەۆتىڭ ايتۋىنشا, ەڭ ماڭىزدى ماسەلە حالىققا تيەسىلى. «قاي اۋىلدا تۇراتىنىمىزدى ءوزىمىز دە ءبىلمەيمىز. اۋىلدا تۇرعىن ءۇيدى ساتۋ دا قيىن. سەبەبى, مۇنداعى ماسەلەنى ەلدىڭ ءبارى ءبىلەدى. سوندىقتان دا المايدى. ودان كەيىن جايىلىم, جەر الۋ دا قيىندىق تۋدىرىپ وتىر. مىسالى, مەنىڭ 4 بالام بار. ال ەندى مەملەكەتتەن تيەسىلى جەرىمىزدى الايىق دەسەك, الدىمىزدان كەدەرگى تاعى شىعادى», دەگەن تۇرعىن مۇندا جارىق ماسەلەسىنىڭ دە وزەكتى ەكەنىن جەتكىزدى. ماسەلە بولعاندا, اۋىلدا جارىق بار, ارينە.
بىراق ەندى ءار ايدىڭ سوڭىندا حالىق تۇتىنعان جارىقتىڭ اقىسىن تولەيىن دەسە, بانك قابىلدامايدى ەكەن. سودان تۇرعىندار تۇتىنۋشىلاردىڭ اقشاسىن جيناپ, ونى وتارعا اپارىپ تولەۋ ءۇشىن ءبىر ادامدى سايلاپ قويعانىن, وعان دا ەندىگى جەردە حالىق قوسىمشا شىعىنداناتىنىن ايتتى. مۇنىڭ بارلىعى دا اينالىپ كەلگەندە حالىققا ءتۇسىپ وتىرعان سالماق ەكەنى بەلگىلى. جەرگىلىكتى حالىق ەندى بۇل ماسەلە بويىنشا ەلباسىنان كومەك كۇتەدى. ەلىمىز تاۋەلسىزدىك الىپ, تۇعىرعا كوتەرىلگەلى دە شيرەك عاسىردان استام ۋاقىت ءوتتى. سودان بەرى كۇن تارتىبىنەن تۇسپەي كەلە جاتقان بۇل ماسەلە حالىق ءۇشىن ءالى دە وزەكتى.
حاميت ەسامان, «ەگەمەن قازاقستان»
جامبىل وبلىسى