قوستاناي وبلىستىق قازاقستان حالقى اسسامبلەياسى جانىنداعى عىلىمي-ساراپتاما توبى مۇشەلەرىنىڭ قاتىسۋىمەن وتكەن دوڭگەلەك ۇستەل ءماجىلىسى ەلىمىزدەگى كونستيتۋتسيالىق رەفورما قورىتىندىلارىن اڭگىمە ارقاۋى ەتتى.
ماجىلىسكە قاتىسۋشىلار ءبىر اي بويى جۇرگەن كونستيتۋتسيالىق رەفورمانىڭ تالقىلاۋ قورىتىندىسىن قاراي كەلە, ەلىمىزدىڭ اتا زاڭىنا ەنگىزىلگەن وزگەرىستەر مەن تولىقتىرۋلاردى ايتۋلى وقيعا دەپ باعالادى.
– ەلىمىزدەگى كونستيتۋتسيالىق رەفورما كەنەتتەن بولعان كەزدەيسوق وقيعا ەمەس. 2005 جىلى ەلباسىنىڭ قازاقستان حالقىنا جولداۋىندا ساياسي جۇيەنى جاڭعىرتۋ جايىندا ايتىلعان بولاتىن. بارلىق ەلدەردە ساياسي رەفورما ەكونوميكالىق رەفورماعا, ەكونوميكالىق ءوزگەرىستەرگە تىكەلەي بايلانىستى جاسالادى. ەكونوميكالىق رەفورما بولماعان ەلدە ساياسي جۇيەنى دە قايتا قۇرۋ, جاڭعىرتۋ مۇمكىن ەمەس. وعان حالىقارالىق جارقىن مىسالدار دا بار. امەريكا قۇراما شتاتتارىنداعى رۋزۆەلتتىڭ جاڭا باعىتى, رەيگاننىڭ ەكونوميكالىق باعدارلاماسى, گەرمانياداعى ەرحاردتىڭ رەفورماسى», سونداي-اق وڭتۇستىك-شىعىس ازياداعى رەفورمالار ساياسي جۇيەنىڭ جاڭعىرۋى ەكونوميكانىڭ دامۋىنا, وزگەرىسىنە تىكەلەي بايلانىستى ەكەنىنە تولىق دالەل بولا العان ەدى. ءبىزدىڭ ەلىمىزدەگى ساياسي رەفورما وسىنداي حالىقارالىق ءتاجىريبەلەرگە سۇيەنگەن ءارى ۋاقتىلى جاسالىپ وتىرعان دەموكراتيالىق ۇدەرىس, – دەدى كونستيتۋتسياعا وزگەرىستەر مەن تولىقتىرۋلار ەنگىزۋگە تاريحي سيپات بەرگەن زاڭ عىلىمدارىنىڭ كانديداتى الىبەك تابىلدينوۆ.
زاڭ عىلىمدارىنىڭ كانديداتى سىمبات ۋكين ەلىمىز كونستيتۋتسياسىنا ەنگىزىلگەن وزگەرىستەر مەن تولىقتىرۋلار كونستيتۋتسياعا دا, وزگە زاڭدارعا دا تولىق سايكەس كەلەتىنىن ءجانە قايشىلىعى جوق ەكەنىن ايتتى. نىعايىپ كەلە جاتقان پارلامەنتتىڭ ەندى زاڭ شىعارۋشى ورگان ەمەس, زاڭ شىعارۋشى بيلىك بولاتىندىعى شىنايى ومىرگە جاقىن ەكەنىن تىلگە تيەك ەتتى.
– پارلامەنت بەدەلىنىڭ ارتۋى – حالىقتىڭ بيلىككە ارالاسۋى, دەموكراتيا قادامىنىڭ العا باسقاندىعى دەپ بىلەمىز, – دەدى سىمبات كەنجەبەك ۇلى. سونىمەن قاتار, دوڭگەلەك ۇستەل وتىرىسىندا بۇرىنعى ءماجىلىس دەپۋتاتى ۆالەري ۆيشنيچەنكو دا پارلامەنت ءرولىنىڭ كۇشەيتىلەتىنى ۋاقىت تالابى ەكەندىگىنە توقتالدى. وسىعان وراي ارنايى قۇرىلعان كوميسسياعا وبلىستان جىبەرىلگەن ۇسىنىستار اراسىندا ۆالەري گريگورەۆيچتىڭ جەرگىلىكتى ءوزىن ءوزى باسقارۋ, ءماسليحات دەپۋتاتتىعى جونىندەگى ويلارى دا بولدى.
عىلىمي-ساراپتاما توبىنىڭ مۇشەلەرى وتىرىستى پرەزيدەنتتىك بيلىك, كۇشەيتىلگەن پارلامەنت, وعان ەسەپتى ۇكىمەت ەلىمىز ەكونوميكاسىنىڭ دامۋىنا, دەموكراتيالىق ۇدەرىستەردىڭ جاڭعىرۋىنا, الەۋمەتتىك تۇرمىستىڭ وسۋىنە باستايدى دەگەن ويمەن تۇيىندەدى.
ءنازيرا جارىمبەتوۆا,
«ەگەمەن قازاقستان»
قوستاناي