مەملەكەت باسشىسى نۇرسۇلتان نازارباەۆ قازاقستان حالقىنا بيىلعى جولداۋىندا ۇكىمەتكە «تسيفرلى قازاقستان» باعدارلاماسىن دايىنداۋدى تاپسىرعانى بەلگىلى. «ەگەمەن قازاقستان» گازەتى اقپارات جانە كوممۋنيكاتسيالار مينيسترلىگىنىڭ قولداۋىمەن ەلباسى تاپسىرماسىنا قاتىستى بىرنەشە ماڭىزدى جوبانى قولعا العان بولاتىن. كەشە استاناداعى ۇلتتىق اكادەميالىق كىتاپحانادا وسى ورايدا بىرقاتار جوبا جۇرتشىلىق نازارىنا ۇسىنىلدى.
«وتكەن جىلى «ەگەمەن قازاقستان» باسىلىمى جاڭا فورماتتا شىعا باستاسا, بيىل ۇلىستىڭ ۇلى كۇنىندە تسيفرلى قىزمەت كورسەتۋ بويىنشا ءۇش بىردەي ماڭىزدى جوبانى تانىستىرماقپىز», دەدى باسىلىم باسشىسى دارحان قىدىرالى. جوبالاردىڭ العاشقىسى – «ەگەمەن قازاقستان» گازەتىنىڭ ءجۇز جىلدىق تاريحىنداعى بارلىق نومىرلەرىن سكانەرلەۋ ارقىلى تۇگەلدەي تسيفرلى نۇسقاعا كوشىرۋ. گازەتتىڭ «ۇشقىن» دەگەن اتاۋمەن العاش 1919 جىلعى 17 جەلتوقساندا شىققان كەزىنەن باستاپ, «ەڭبەك تۋى», «ەڭبەكشىل قازاق», «ەڭبەكشى قازاق», «سوتسيالدى قازاقستان», «سوتسياليستىك قازاقستان», «ەگەمەن قازاقستانعا» دەيىنگى نومىرلەرى تسيفرلى مۇراعاتقا جيناقتالادى. بۇل جۇمىس الماتىداعى ۇلتتىق كىتاپحانامەن بىرلەسە جاسالىپ جاتىر. بۇگىنگە دەيىن گازەتتىڭ 1940 جىلعا دەيىنگى ساندارى سكانەردەن تولىقتاي ءوتىپ بولدى. «ەگەمەن قازاقستاننىڭ» ارحيۆتەگى قاعاز نۇسقاسىن ەلەكتروندى فورماتقا كوشىرۋ بىرىنشىدەن, اسا قۇندى مۇراعاتتى ساقتاۋعا مۇمكىندىك بەرسە, ەكىنشىدەن, گازەتتى جانە گازەت ارقىلى قازاقستان تاريحىن زەرتتەۋشىلەر ءۇشىن اسا ءتيىمدى بولماق. مۇراعاتتى تولىقتاي تسيفرلى فورماتقا كوشىرۋ كەلەسى جىلى اياقتالادى.
ەكىنشى جوبا – «تسيفرلى قازاقستان: ماڭگىلىك ەل مۇرالارى» دەپ اتالادى. «ەگەمەن قازاقستان» فوتومۇراعاتىندا قازاقستاننىڭ وتكەن عاسىرداعى جانە جاڭا داۋىردەگى تۇرمىسىن, تاۋەلسىزدىكتىڭ ماڭىزدى ساتتەرىن بەينەلەيتىن سۋرەتتەر ساقتالعان. سونىمەن قاتار, پرەزيدەنت نۇرسۇلتان نازارباەۆتىڭ, مەملەكەت, قوعام جانە مادەنيەت قايراتكەرلەرىنىڭ, اتاقتى سپورتشىلاردىڭ, قازاقستان قالالارى مەن كورىكتى جەرلەرىنىڭ سيرەك فوتوسۋرەتتەرى بار. Wikibilim قورىمەن بىرلەسكەن ەكىنشى جوبا نەگىزىندە بۇل سۋرەتتەردى ۋيكيپەديا ونلاين-ەنتسيكلوپەدياسى ارقىلى جۇرتشىلىق نازارىنا ۇسىنۋ باستالدى. بۇل دا اسا قۇندى فوتوماتەريالداردى جوعالۋدان ساقتايدى جانە سيرەك سۋرەتتەر ارقىلى قازاقستاننىڭ بىرنەشە ونداعان جىلدار بۇرىنعى ومىرىنە كوز سالۋعا مۇمكىندىك بەرەدى. ول ماتەريالدارعا «ەگەمەن قازاقستاننىڭ» اۆتورلىق قۇقىعى تولىعىمەن ساقتالادى.
قازاقستان پرەزيدەنتى نۇرسۇلتان نازارباەۆ پەن سينگاپۋردىڭ نەگىزىن قالاۋشى لي كۋان يۋ-ءدىڭ كەزدەسۋى, 1991 جىل, 19 قىركۇيەك (Wikimedia Commons سايتىنا قويىلعان سۋرەت)[/caption] «بۇكىل دۇنيە جۇزىندەگى ماتىندەردىڭ, فوتو, بەينەماتەريالداردىڭ ەركىن اينالىمىن قامتاماسىز ەتەتىن ەڭ ۇلكەن رەپوزيتاري Wikimedia Commons دەپ اتالادى. الەمنىڭ كەز كەلگەن جەرىنەن قازاقستانعا قاتىستى اقپارات, فوتوماتەريال ىزدەگەن ادامداردىڭ ەڭ ءبىرىنشى كىرەتىن جەرى وسى. بۇل جۇيە زاڭدى تۇردە كەز كەلگەن ماتەريالدى تاۋىپ الىپ, اۆتورلىق قۇقىقتى ساقتاي وتىرىپ, زاڭدى تۇردە قولدانۋعا مۇمكىندىك بەرەدى. سوندىقتان, وسى ۇسىنىستى قولداپ, «ەگەمەن قازاقستاندى» جاڭارتۋ باعدارلاماسىنىڭ ءبىر بولىگى رەتىندە قولعا العان گازەت باسشىسىنا راحمەت ايتامىز», دەدى Wikibilim قورىنىڭ باسشىسى راۋان كەنجەحان ۇلى.
ناۋرىز مەيرامى قارساڭىندا «ەگەمەن قازاقستان» گازەتىنىڭ جاڭا سايتى ىسكە قوسىلادى. بۇل – باسىلىمنىڭ ءۇشىنشى جوباسى. وتكەن جىلدىڭ ورتاسىنان بەرى گازەتتىڭ ينتەرنەتتەگى نۇسقاسىن جەتىلدىرۋ جولىندا ءبىراز جۇمىس جاسالدى. ينتەرنەت-رەداكتسيا دەربەس باسىلىم رەتىندە ءوزى دايىندايتىن ساپالى اقپاراتتاردى كوبەيتۋگە باسىمدىق بەردى. ول ماقالالاردىڭ كەيبىرى وتىز مىڭعا دەيىن وقىلىپ, وقىرماندار اراسىندا ۇلكەن رەزونانس تۋعىزدى. قازاقستاندىق سايتتاردىڭ جالپى رەيتينگىندە egemen.kz وتكەن جىلدىڭ ءبىرىنشى جارتىسىندا 140-ورىندا تۇرسا, قازىر العاشقى 50-گە كىرەدى. ال قازاقتىلدى ينتەرنەت باسىلىمدار اراسىندا العاشقى بەستىكتە. سونىمەن قاتار, توتە جازۋ نۇسقاسىن جەتىلدىرۋ ارقاسىندا شەتەلدەگى وقىرماندار سانى كوبەيدى.
باۋىرجان مومىش ۇلى مەن الكەي مارعۇلان جازۋشىلار سەزىندە (Wikimedia Commons سايتىنا قويىلعان سۋرەت)[/caption] باسىلىمنىڭ جاڭا ينتەرنەت-نۇسقاسىنىڭ تەحنيكالىق ەرەكشەلىكتەرىن گازەت قىزمەتكەرى, SEO-ينجەنەر ەربول سەرىكباي تانىستىردى. جاڭا سايتتا 2005 جىلدان بەرگى ماتەريالدار ءبىر جۇيەگە توپتاستىرىلادى. «ەگەمەن قازاقستان» جاڭا سايتتا زاماناۋي جۋرناليستيكانىڭ جەتىستىكتەرىن كەڭىنەن پايدالانۋدى ماقسات ەتتى. سوعان سايكەس, جاڭا نۇسقاداعى ينتەرنەت-باسىلىمدا اۋديو جانە بەينە ماتەريالدارعا كوبىرەك ورىن بەرىلەدى. گازەت شولۋشىلارىنىڭ ماقالالارىن ەندى تىڭداۋعا جانە جۇكتەپ الۋعا مۇمكىندىك بولادى. جاڭا پورتالدىڭ ەرەكشە اتاپ ايتۋعا تۇرارلىق ەرەكشەلىگى, وندا «ەگەمەن قازاقستان» گازەتى مەن ۇلتتىق بىرىڭعاي تەستىلەۋ ورتالىعىنىڭ بىرلەسكەن جوباسى نەگىزىندە وقۋ ورنىنا تۇسكىسى كەلەتىن تۇلەكتەر دايىندىق تەستەرىن ونلاين تاپسىرا الادى.
تانىستىرۋ كەزىندە ايتىلعان تاعى ءبىر جاڭالىق – «ەگەمەن قازاقستان» گازەتىنىڭ ءجۇز جىلدىق تاريحىنداعى ماقالالاردىڭ ون تومدىق كىتاپقا جيناقتالاتىنى. ون تومدىق جوباسىنا قاتىسۋشىلاردىڭ ءبىرى, پروفەسسور نامازالى وماشەۆ زەرتتەۋ جۇمىستارىن جاساي ءجۇرىپ «ەگەمەن قازاقستاننىڭ» ءارحيۆىن ءۇش رەت قاراپ شىققانىن ايتتى. «ول نومىرلەر ءتورت جەردە ساقتاۋلى. ءبىراز بەتتەرى جوعالعان, قيىلعان. ال ەندى سول ارحيۆ ەلەكتروندى فورماتقا كوشىرىلسە نەمەسە ول ارحيۆ ون تومدىق كىتاپ بولىپ شىقسا, زەرتتەۋشىلەر ءۇشىن باعا جەتپەس سىيلىق بولعالى تۇر. ويتكەنى, «ەگەمەن قازاقستاننىڭ» ءارحيۆى وتە باي. ونىڭ ءبىر بولىگى توتە جازۋ نۇسقاسىندا, ولاردى كيريلليتساعا كوشىرۋ قاجەت», دەدى نامازالى وماش ۇلى. جيناقتىڭ العاشقى التى تومى كەلەسى جىلى شىعادى, ال «ەگەمەن قازاقستاننىڭ» 100 جىلدىعىنا قاراي ون تومدىق تولىقتاي وقىرمان نازارىنا ۇسىنىلماق. تۇساۋكەسەرگە كەلگەن مەيماندار «ەگەمەن قازاقستان» قولعا العان جوبالاردىڭ ماڭىزى تۋرالى پىكىر ءبىلدىردى.
مىرزاتاي جولداسبەكوۆ, مەملەكەت جانە قوعام قايراتكەرى, عالىم: جوبالاردىڭ ءبارى ءىرى جاڭالىقتار ەكەنىن, وتە ماڭىزدى, اسا قاجەت شارۋالاردىڭ جاسالىپ جاتقانىن كورىپ وتىرمىن. ءبىز جاڭالىقتان كەيىن قالماۋىمىز كەرەك. بۇگىندە گازەتتىڭ مازمۇنى دا جاقساردى ماقالالارى قازىر تەز وقىلادى, گازەتتىڭ ءوزى دە قولعا ۇستاۋعا ىڭعايلى بولدى. «ەگەمەن قازاقستان» قازىر قولدان تۇسپەيتىن گازەتكە اينالدى.
ءادىل احمەتوۆ, عالىم, «ەگەمەن قازاقستاننىڭ» تۇراقتى اۆتورى: بۇگىن «ەگەمەننىڭ» جاڭا دەڭگەيگە كوتەرىلگەن ءساتىن كورىپ وتىرمىز. قازىر ەڭبەكتەگەن بالادان, ەڭكەيگەن كارىگە دەيىن كومپيۋتەردە جۇمىس ىستەيدى. كوپ نارسەنى كومپيۋتەر ارقىلى وقيدى. پرەزيدەنتتىڭ بيىلعى جولداۋىندا «تسيفرلى قازاقستان» تۋرالى ايتىلدى. مىنە, «ەگەمەن» جوعارى دەڭگەيدەن كورىنىپ, ماڭىزدى شارانى ىسكە اسىرىپ ۇلگەردى. ايماقتاعى جۇرت گازەتتى جازدىرىپ السا, ورتالىقتاعى وقىرماندار كوبىنە دۇڭگىرشەكتەن ساتىپ الادى. بىراق «ەگەمەن قازاقستاندى» دۇڭگىرشەكتەردەن تابۋ قيىن بولعاندىقتان, جۇرت باسپاحانادان ىزدەيتىن. قازىر كۇندەلىكتى تاڭەرتەڭ كومپيۋتەردى قوسساڭىز, گازەتتىڭ pdf-نۇسقاسى كەلىپ تۇرادى. گازەتتە ساياساتتى, ەكونوميكانى, مادەنيەتتى تەرەڭ تالدايتىن ماقالالار كوبەيدى. بۇگىندە «ەگەمەننىڭ» قامتىمايتىن سالاسى جوق دەۋگە بولادى. وتە جاقسى وقىلاتىن گازەتكە اينالدى. گازەت الەمدىك باسىلىمداردىڭ جەتىستىكتەرىن ۇلگى ەتىپ وتىر. مىسالى, Financial Times گازەتىندە ەڭ وزەكتى ماقالالار بىردەن كورىنىپ تۇرادى. قازىرگى «ەگەمەندە» دە سولاي. سيرەك فوتولارعا قاتىستى جوبالار دا ماڭىزدى. فوتوشەجىرە دەگەنىمىز – تاريح. فوتو دا سويلەيدى. سونداي قۇندى سۋرەتتەردى تسيفرلاپ جۇرتشىلىققا ۇسىنۋ ۇلكەن جەتىستىك دەپ ويلايمىن. «ەگەمەن قازاقستاننىڭ» وقىرمانى قازىر دە كوپ, وعان سۇرانىس بۇدان كەيىن دە ارتادى دەپ سەنەمىن.
سۇلتان ورازالين, قازاقستاننىڭ ەڭبەك سىڭىرگەن قايراتكەرى: بۇگىنگى ءۇش جوبانىڭ بىرەۋى – بۇكىل «ەگەمەننىڭ» تاريحى. ال «ەگەمەننىڭ» تاريحى – ەلدىڭ تاريحى. مەن ۇلتتىق كىتاپحانادان گازەتتىڭ 1928 جىل مەن 1968 جىل ارالىعىنداعى تىگىندىلەرىن قاراپ شىققان ەدىم. وندا وتە ماڭىزدى ماقالالار بار. ولاردىڭ سىزدەر شىعارعالى وتىرعان ون تومعا كىرۋى, تسيفرلى ۇلگىدە جاريالانۋى – قازاق تاريح عىلىمى ءۇشىن ءىرى وقيعا. ويتكەنى, زەرتتەۋگە قاجەت ماتەريالداردى مۇراعاتتا شاڭ جۇتپاي, ۇيدە وتىرىپ-اق قاراۋعا بولادى. ال قازىرگى «ەگەمەندى» قاراپ وتىرىپ بۇگىنگى تاريحىمىزدى بىلەمىز, كەلەشەگىمىزدى باعامداي الامىز. ماڭگىلىك ەلدىڭ ايناسى بولاتىن گازەت – وسى.
قايرات ساق, ەۋرازيا ۇلتتىق ۋنيۆەرسيتەتى جۋرناليستيكا جانە ساياساتتانۋ فاكۋلتەتىنىڭ دەكانى: جۋرناليستيكا ەلدىڭ تاريحىن جازادى. «ەگەمەن قازاقستاننىڭ» ءجۇز جىلعى تاريحىنداعى ماتەريالداردى جوعالۋدان, كومەسكىلەنۋدەن ساقتاۋ – باعا جەتپەس ەڭبەك. جانە بۇل ءبىزدىڭ جۋرناليستيكا فاكۋلتەتى ءۇشىن دە اسا ماڭىزدى. ستۋدەنتتەر بۇل جوبا ارقىلى قازاق جۋرناليستيكاسىنىڭ تاريحىمەن كەڭىنەن تانىسادى, بىرنەشە ونداعان جىلدار بۇرىن جازىلعان ماقالالاردى تالدايدى, ولار ارقىلى تاريحىمىزدىڭ ماڭىزدى كەزەڭدەرىن تەرەڭىرەك بىلەدى.
ەرجان ءابدىرامان,
گۇلنۇر قۋانىشبەكقىزى,
«ەگەمەن قازاقستان»
سۋرەتتەردى تۇسىرگەن ەرلان وماروۆ,
"ەگەمەن قازاقستان"