بيىل شىعىس قازاقستاننىڭ بارلىق اۋداندارىنداعى قۇقىق قورعاۋ سالاسىنىڭ قىزمەتكەرلەرىنە جيىنى 143 اۆتوكولىك, زاماناۋي راتسيالار, بەينە رەگيستراتورلار جانە وسكەمەندەگى جەدەل جاردەم اۋرۋحاناسىنا «مەرسەدەس» بازاسىنداعى ەكى رەانيموبيل مەن 11 «فولكسۆاگەن» كولىگى ساتىلىپ الىنباق. بۇل جايىندا وبلىستىق ءماسليحاتتىڭ كەزەكتەن تىس سەسسياسىندا ءمالىم بولدى.
وبلىستىق ەكونوميكا جانە بيۋدجەتتى جوسپارلاۋ باسقارماسىنىڭ باسشىسى الماسحان سماتلاەۆتىڭ ايتۋىنشا, ايماقتاعى فەرمەرلەرگە سۋبسيديا ءۇشىن 1 ملرد. 383 ملن, ىشكى ىستەر سالاسىنا 1 ملرد. 356 ملن, دەنساۋلىق ساقتاۋ سالاسىنا 800 ملن. تەڭگە قارجى بولىنەدى.
«ءوڭىردىڭ قۇقىق قورعاۋ جانە دەنساۋلىق ساقتاۋ سالالارىنىڭ ماتەريالدىق-تەحنيكالىق بازالارىن جاڭعىرتۋعا ەرەكشە كوڭىل ءبولىنىپ وتىر. ەستەرىڭىزدە بولسا, بىلتىر وبلىس باسشىسى دانيال احمەتوۆ وسكەمەن قالاسىندا زاماناۋي ۇلگىدەگى مەديتسينالىق جاردەم كورسەتۋ ماقساتىنداعى كولىكتەردىڭ پايدا بولاتىندىعىن ايتقان بولاتىن. ەندى مىنە, وبلىس ورتالىعىنا زاماناۋي ۇلگىدەگى كولىكتەر ساتىلىپ الىنباق. مۇنىڭ سىرتىندا وسكەمەن قالاسىندا ءبىر, سەمەيدە ەكى اۋرۋحاناعا كۇردەلى جوندەۋ جۇمىستارى جۇرگىزىلەدى. بۇدان بولەك, 50 دارىگەر سەمەي مەديتسينالىق ۋنيۆەرسيتەتىنىڭ بازاسىندا اعىلشىن تىلىنەن ءبىلىمىن جەتىلدىرەدى», – دەدى باسقارما باسشىسى.
ازامات قاسىم,
«ەگەمەن قازاقستان»