رەسەيدىڭ «امكار» كلۋبىنىڭ شابۋىلشىسى چۋما انەنە ەلىمىزدىڭ «قايرات» كومانداسىنا رەسمي تۇردە اۋىستى. بۇل تۋرالى «امكار» كلۋبىنىڭ ءباسپاسوز قىزمەتى حابارلادى.
چۋما انەنە «امكار» ساپىندا 24 ويىنعا قاتىسىپ, ەكى گولدىڭ اۆتورى اتانعان. سوڭعى رەت كەشە رەسەي بىرىنشىلىگىندە «زەنيتكە» قارسى ويىندا الاڭدا 90 مينۋت وتكىزدى.
«قايرات» كومانداسىنىڭ پرەزيدەنتى قايرات بورانباەۆپەن كەلىسسوزدەر بارىسىندا جاڭا شابۋىلشى ىزدەۋگە بارىنشا كىرىسكەنىنە كۋا بولدىم. تاڭداۋ كەزىندە ارىپتەستەرىمىزدىڭ جاڭىلىسپاعانىنا سەنىمدىمىن. چۋما انەنەنىڭ قازاقستان چەمپيوناتىنداعى جارقىن ويىنشىلاردىڭ ءبىرى عانا ەمەس, سونىمەن قاتار «قايراتتىڭ» ەۋروكۋبوكتىق ويىندارىنا دا سەپتىگىن تيگىزەتىنىنە سەنىمدىمىن», – دەدى «امكار» كلۋبىنىڭ ديرەكتورى دەنيس ماسلوۆ.
«ءوز قاتارىمىزعا الەكسەي گاسيليندى قوسقاننان كەيىن لەگيونەرلەرگە ەنگىزىلگەن زاڭ بويىنشا نەگىزگى قۇرامدا ۇزبەي ويناۋىنا قيىن بولاتىن ەدى. سوندىقتان قىسقا عانا ۋاقىت ىشىندە مانسابىن ارى قاراي جالعاستىراتىن لايىقتى ۇجىمدى تاپتىق. بۇل بارلىعىمىز ءۇشىن ەكونوميكالىق جاعىنان دا, فۋتبول تۇرعىسىنان دا ءتيىمدى شەشىم بولدى. كوماندامىزعا سىڭىرگەن ەڭبەگى ءۇشىن وعان العىس ايتىپ, الداعى ۋاقىتتا تەك ساتتىلىك تىلەيمىن!» – دەدى ول.
«امكار» مەنىڭ كاسىبي تۇردە جەتىلۋىمە ۇلكەن ەڭبەگىن ءسىڭىردى. مۇندا وزىمە دەگەن سەنىمدىلىگىم ارتىپ, ءومىرىمنىڭ سوڭىنا دەيىن جەتەتىن تاجىريبە جينادىم. رەسەيلىك كلۋبقا كىشكەنە دە بولسىن پايدامدى تيگىزگەنىمە قۋانىشتىمىن. ەندىگى «امكارعا» تەك جەڭىس پەن كوپ گول سوعۋىن تىلەيمىن!» – دەدى «قايراتتىڭ» جاڭا ويىنشىسى.
بۇعان دەيىن «قايراتتىڭ» وسى ترانسفەر ءۇشىن ءبىر ميلليون ەۋرو تولەيتىنى حابارلانعان بولاتىن.
ايتا كەتەيىك, 23 جاستاعى انەنە نورۆەگيادا تۋعان. كاسىبي مانسابى 2011 جىلى باستالعان. ءوز ەلىندە «ۆولەرەنگۋ», «ۋلل/كيسۋ» جانە «ستابەك» كلۋبتارىندا ويناسا, ماكەدونيادا «رابوتنيچكي» ۇجىمىنىڭ نامىسىن قورعاعان.