ء“ومىر وتكەلدەرى” دەگەن كىتاپتى پاراقتاپ وتىرعاندا اقيىق اقىن مۇقاعالي ماقاتاەۆتىڭ “نە دەگەن كەرىم ەدى! نە بىلەدى وسى جۇرت, نە بىلەدى؟ بابالاردىڭ بالاسى قاريالار, سيرەپ بارا جاتقانداي كورىنەدى” دەگەن ولەڭ جولدارى ويعا ورالعانى بار. شىنىندا, كەشەگى مەن بۇگىنگىنىڭ اراسىن جىبەك ارقاۋداي جالعاپ, ۇرپاق ساباقتاستىعىنىڭ, ەلگە ادال قىزمەت ەتۋدىڭ, قۇلقىننىڭ ق ۇلى ەمەس, جۇرتتىڭ ۇلى بولۋدىڭ, اقىلدىڭ كەنىن, ءسوزدىڭ ءنارىن قادىرلەۋدىڭ ادەمى ۇلگىسىن كورسەتىپ كەلە جاتقان, تۇلەن تۇرتسە دە ءتۇزۋ جولدان تايماعان, ادىلەتتەن اينىماعان قادىرلى قارتتاردىڭ قاشاندا ءجونى بولەك قوي.
كىتاپ اۆتورى – تاياۋدا ومىردەن وتكەن ناعىم قۇسايىن ۇلى ءومىر بويى اۋىلدا تۇرىپ كەلگەن ەكەن. قازاق ءتىلى مەن ادەبيەت ءپانىنىڭ ۇزدىك وقىتۋشىسى بولىپتى. ءوز ماماندىعىنان, تۋعان جەرىنەن اينىماعان مۇنداي ادامدى اۋىلدىڭ التىن ءدىڭگەگى, قاسيەتتى دالانىڭ لۇپىلدەپ سوققان جۇرەگى دەسە بولار. ۇستازدىق ەتە ءجۇرىپ, ءومىردەن كورگەندەرى مەن كوڭىلگە تۇيگەندەرىن قاعازعا ءتۇسىرىپتى.
كىتاپتىڭ ءار بولىمىندەگى ۇلتتىق ۇلگى, حالىقتىق سالت-ءداستۇر, تاريحي كەزەڭدەر, ءتىل تاعدىرى, ەل بىرلىگى, ونەر ءورىسى, ورەن جاستىڭ ءورشىل رۋحى تۋرالى جازبالار وقىعان ادامدى بىردەن باۋراپ الادى. ەل ىشىندەگى جىلت ەتكەن جاقسىلىقتى, ۇلتىمىزعا ءتان جاقسى قاسيەتتەردى اۆتور سەرگەكتىكپەن حاتقا ءتۇسىرىپ, حالىققا ۇسىنىپتى. جەتى بولىمگە توپتاستىرعان ماقالالاردىڭ تاقىرىبىنىڭ وزىنەن-اق كوپ جايدى اڭعارۋعا بولادى. مىسالى, “قارتايا ءبىلۋ دە قادىرلى قاسيەت”, “توقساندا توزباعان, تولعاتىپ ءسوز قوزعاعان”, ء“تىلدى قورلاعانى, ءبىزدى قورلاعانى”, “اقساقال” مەن “ارداگەردىڭ ايىرماسى”, “باس بۇزارعا سوت بار, ءتىل بۇزارعا شە؟”, “التى جىل اش بولساڭ دا, اتاڭنىڭ سالتىن ۇمىتپا” سياقتى جانە تاعى باسقا تاقىرىپتار نەگىزىندە قوزعاعان اڭگىمە اششى شىندىقتى, بۇلتاقسىز اقيقاتتى الدىڭا تارتادى. مۇنىمەن قاتار, كىتاپتا اۆتور ەل اۋزىنان جيناعان شەشەندىك ءسوزدەرگە, ۇرپاققا تيەسىلى ۇلگى-ونەگەگە, اڭىز-ءاپسانالارعا دا مول ورىن بەرىپتى.
ءبىر زاماندارى حات جازىسىپ تۇرۋ ونەر بولعانىن بۇگىندە ءبارىمىز دە بىلەمىز دەسەك, كىتاپ اۆتورى ءالى كۇنگە ونى وشىرمەي جالعاپ كەلەدى ەكەن. سونىڭ ءبىر ءدالەلى قازاقتىڭ ايتۋلى ازاماتتارىمەن جازىسقان حاتتارىنىڭ ەڭ سوڭعى بىرەۋى قولىمىزعا ءتۇسىپ ەدى. سونى وقىرمانعا تانىستىرا كەتسەك, ارتىق بولا قويماس. قازاق ادەبيەتىنىڭ ايتۋلى اقساقالدارىنىڭ ءبىرى, قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى, ۇلى وتان سوعىسىنىڭ ارداگەرى ءازىلحان نۇرشايىقوۆتىڭ تەتەلەس ىنىسىنە جولداعان سالەم حاتى بىلاي باستالادى. “قۇرمەتتى ناكە! سىزگە سالەم جولدايمىن. حابارلاسپاعانىمىزعا كوپ بولدى.
وتكەن جىلدىڭ اياعىندا استانادا “ەگەمەن قازاقستاننىڭ” 90 جىلدىق تويىندا بالاڭىز تەمىرمەن كەزدەستىم. تەمىر ماعان ءسىزدىڭ ء“ومىر ءورنەكتەرى” دەگەن تاماشا كىتابىڭىزدى سىيلادى. “تاماشا” دەپ وتىرعان سەبەبىم: بالا وقىتقان, كوپتەگەن جالىندى جاستاردى ءتاربيەلەپ, حالىق وربيتاسىنا كوتەرگەن ءسىز سياقتى ءۇلگىلى قارت ۇستازدار كوپ قوي. بىراق, سولاردىڭ كوبى, كارىلىك زاڭىنا باعىنىپ, تاياق ۇستاپ, تىم-تىرىس وتىرىپ قالدى.
ءسىز ۇستازدىق ۇلاعاتتارىڭىزدى قاعازعا ءتۇسىرىپ, كىتاپ ەتىپ شىعارىپ, قازاق حالقىنىڭ بولاشاق بىرنەشە ۇرپاقتارىنا ۇلگى ەتىپ, ۇسىنىپ وتىرسىز. مەن ءسىزدى وسى ۇلى ەڭبەگىڭىزبەن قۇتتىقتايمىن!
مەن ەرتەدە شىققان ماكارەنكونىڭ, سۋحوملينسكيدىڭ كىتاپتارىن بىلەتىن ەدىم. قازاق ۇستازدارىنان شىققان سولارداي ۇلكەن كىتاپتى ءبىرىنشى رەت قولىما ۇستاۋىم. جەتى تاراۋدان تۇراتىن بۇل قىمبات كىتاپتا قازاقتىڭ ۇلتتىق ونەگەلەرى تەگىس توپتاستىرىلعان. ءسىز سياقتى ۇلكەن ۇلاعاتتى ۇستازدىڭ كىتابىنا مەنىڭ “ماڭگىلىك ماحاببات جىرى” كىتابىم تۋرالى ءوزىڭىزدىڭ ۇستازدىق قاسيەتتى قولىڭىزدان شىققان ونەگەلى ماقالاڭىزدىڭ كىرگەنىنە وتە قۋانىشتىمىن.
قۇرمەتپەن قولىڭىزدى قىسامىن. وتباسىڭىزعا سالەم.
ءازىلحان نۇرشايىقوۆ.
24.01.2010 ج. الماتى” دەگەن كورنەكتى قالامگەردىڭ بەرگەن باعاسىنا ءبىزدىڭ الىپ-قوسارىمىز جوق. تەك تىلەك-نيەتتىڭ ورتاقتىعىن بىلدىرگىمىز كەلەدى.
سۇلەيمەن مامەت.