«الەمدەگى بارلىق بالا ءبىر تىلدە كۇلەدى» دەگەن قاناتتى ءسوز بار. كەشە ەلورداداعى «SOS بالالار اۋىلىندا» بالدىرعاندارعا شاتتىق سىيلاعان ەرەكشە شارا ءوتتى. العىس ايتۋ مەرەكەسىنە وراي ۇيىمداستىرىلعان شارا بارىسىندا, «استانا موتورس» كومپانياسى بالالاردىڭ يگىلىگى ءۇشىن ءۇش بىردەي شاعىن اۆتوبۋستى سىيعا تارتتى.
«SOS بالالار اۋىلىنداعى» بالدىرعاندار قۇرمەتتى قوناقتاردى قۇشاق تولى گۇلدەرىمەن, ىستىق ىقىلاستارىمەن قارسى الدى. ءبۇلدىرشىندەرگە قۋانىش سىيلايتىن شاراعا مۇرىندىق بولعان پارلامەنت سەناتىنىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ ءتورايىمى داريعا نازارباەۆا, «استانا موتورس» كومپانياسىنىڭ پرەزيدەنتى نۇرلان سماعۇلوۆ, «SOS بالالار اۋىلى» كورپوراتيۆتىك قورى قامقورشىلىق كەڭەسىنىڭ توراعاسى سەرىك سەيدۋمانوۆ جانە باسقا دا مەيماندار بالدىرعانداردىڭ پەيىلىنە رازى بولىپ, تولقىعاندارى جۇزدەرىنەن كورىنىپ تۇردى.
بالالاردىڭ قۋانىشىن ءبولىسۋگە كەلگەن سەناتور داريعا نازارباەۆا:
– بۇگىن بارشامىز وتە قۋانىشتى, شۋاقتى شاراعا كۋا بولىپ وتىرمىز. بۇگىن ءبىز ءبىر-ءبىرىمىزدى قۋانتىپ, العىس ايتامىز. قىمباتتىلارىم مەنىڭ, ءبىز بىرگە بولساق, ءبىر-بىرىمىزگە مەيىرىمدى بولساق, الىنبايتىن قامال جوق. ەشقاشان كەرى شەگىنبەۋ كەرەك. ەشقاشان مۇڭايماۋ كەرەك. سەندەر – بىزگە, ءبىز – سەندەرگە دەمەۋ بولۋعا ءتيىسپىز, – دەدى. – بۇگىندە قانشاما ۇلت وكىلدەرى كەڭ-بايتاق ەلىمىزدى مەكەندەپ, باقىتىن تاپتى. سول ءۇشىن ولار قازاق وتباسىلارىنا العىس بىلدىرەدى. وسى ورايدا, پرەزيدەنتىمىز كوكتەمنىڭ العاشقى شۋاقتى كۇنىن العىس ايتۋ كۇنى رەتىندە مەملەكەتتىك مەرەكە ەتىپ بەكىتتى. ءبىز سىزدەردى العىس ايتۋ كۇنىمەن شىن جۇرەكتەن قۇتتىقتايمىز.
وسىلاي دەگەن داريعا نازارباەۆا ولارعا كولىكتەردىڭ كىلتىن ۇسىندى. سونىمەن قاتار, سەناتور قازاقستانداعى «SOS بالالار اۋىلدارى» قورىنىڭ قۇرمەتتى پرەزيدەنتى, وسى بالالار اۋىلدارىنىڭ اشىلۋىنا سەبەپكەر بولعان ادام – اناسى سارا الپىسقىزىنىڭ بالالار مەن تاريبەشىلەرگە ارناعان ىستىق سالەمىن جەتكىزدى. سارا الپىسقىزى بۇل بالالاردى ۇمىتپاعانىن, ۇنەمى ەسىندە ساقتايتىنىن, بالالاردىڭ ورتاسىنا جاقىندا ءوزى كەلەتىنىن ايتتى.
«استانا موتورس» كومپانياسىنىڭ پرەزيدەنتى نۇرلان سماعۇلوۆ ايتقانداي, وتاندىق ءۇش اۆتوكولىكتىڭ بىرەۋى استاناداعى بالالارعا ارنالسا, قالعان ەكەۋى الماتى مەن تەمىرتاۋ قالالارىنداعى «بالالار اۋىلدارىنا» جىبەرىلمەك.
ءبىر ايتا كەتەرلىگى, قۇرىلعانىنا بيىل 25 جىل تولاتىن كومپانيا الداعى ۋاقىتتا قايىرىمدىلىق ماقساتتاعى شارالاردىڭ لەگىن جالعاستىرا بەرمەك. كومپانيا پرەزيدەنتى بالالاردى جاقىندا ەلوردادا اشىلاتىن «مەگا» ساۋدا, ويىن-ساۋىق ورتالىعىندا قىدىرتىپ, ورتالىقتىڭ بالالارعا ارنالعان بارلىق قىزىقتارىن كورسەتۋگە ۋادە بەردى.
بالدىرعاندار سىي-سياپاتقا ءماز-مەيرام بولىپ قۋانىپ, وزدەرىنىڭ اق تىلەكتەرىن اقتاردى. سەگىز جاسار ەسكەندىر:
– ءبىز ەندى ساباققا, سەكتسيالارعا, باسقا جەرلەرگە وسى ماشينامەن بارامىز. قالانىڭ ادەمى جەرلەرىن ارالايمىز, – دەدى.
بالالار مەرەكەگە وراي ارنايى كونتسەرتتىك باعدارلاما ءازىرلەپتى. ءان شىرقاپ, بي بيلەپ, ونەرلەرىن ورتاعا سالدى. قۇرمەتتى قوناقتارعا ارناعان سىي-سياپاتتارى دا بار ەكەن. ولار ءتاربيەشىلەرىمەن بىرلەسىپ جاساعان فوتوالبومدى داريعا نازارباەۆاعا ۇسىندى. ەسكپو-2017 حالىقارالىق كورمەسىنىڭ بويتۇمارلارىنىڭ جۇمساق مۇسىندەرىن باسقا دا مەيماندارعا تارتۋ ەتتى.
ەلىمىزدە «SOS بالالار اۋىلدارىنىڭ» اشىلعانىنا بيىل 25 جىل تولادى. وسىعان وراي, الداعى جازدا كولەمدى شارا وتكىزۋدى جوسپارلاپ وتىرعان «بالالار اۋىلدارىنىڭ» كىشكەنتاي تۇرعىندارى مەن تاربيەشىلەرى قۇرمەتتى قوناقتاردى سول شارالارعا كەلۋگە شاقىردى.
ارنۇر اسقار,
«ەگەمەن قازاقستان»
سۋرەتتى تۇسىرگەن
ەرلان وماروۆ,
«ەگەمەن قازاقستان»