فۋتبول. 9 ءساۋىر كۇنى قازاقستان چەمپيوناتى پرەمەر- ليگاسىنىڭ كەزەكتى تۋرى ءوتتى.
وسى كۇنى التىنشى تۋرداعى ماتچتارىن وتكىزگەن كوماندالار اراسىندا الاڭ يەلەرى 5 رەت, قوناقتار 1 رەت جەڭىسكە جەتتى. ءبىر-بىرىنە ارقا قاعىسىپ, تەڭ تاراسقان ويىندار بۇل جولى بولعان جوق.
تالدىقورعاندىقتار ءوز الاڭىندا «اتىراۋدى» جەڭىپ, تۋرنير كەستەسىنىڭ تىزگىنىن بەكەر ۇستاپ وتىرماعاندارىن كورسەتتى. ەسەپ – 2:0. ودان كەيىنگى ورىندا كەلە جاتقان «اقتوبە» دە سىرت الاڭىندا سىر بەرگەن جوق. تارازعا قوناققا بارعان ۆيتسە-چەمپيوندار الاڭ يەلەرىن 2:0 ەسەبىمەن ۇتتى. ءدال وسىنداي ەسەپ استانادا «لوكوموتيۆ» پەن «ۆوستوك» كوماندالارىنىڭ اراسىندا ويىندا ءتىركەلدى. بۇل جولى وسكەمەندىك ۇجىمنان ايلاسىن اسىرعان استانالىقتار قاجەتتى 3 ۇپايلارىن الىپ, تۋرنير كەستەسىندە قاراعاندىنىڭ «شاحتەر» كومانداسىن باسىپ وزدى. قازىر «تەمىرجولشىلاردا» – 13, «شاحتەردە» – 10 ۇپاي. ال ءوز الاڭىندا قاراعاندىلىق كوماندانى 1:0 ەسەبىمەن ۇتقان «ورداباسى» بولسا, وسى جەڭىستەن كەيىن 6 ۇپايمەن «قايسار», «قايرات», «اتىراۋ» ۇجىمدارىن باسىپ وزدى. بۇل كوماندالاردىڭ ىشىندە «جەتىسۋدان» جەڭىلگەن «اتىراۋدان» باسقا «قايسار» قوناقتا «ەرتىستەن» 4:1, «قايرات» قوستانايدا «توبىلدان» 3:1 ەسەبىمەن جەڭىلدى. التىنشى تۋردان كەيىن وسىلايشا 6 ۇپاي يەلەنگەن كوماندالار قازىر 9-11 ورىنداردى بولىسۋگە ءماجبۇر بولىپ وتىر.
دويبى. لەنينگراد وبلىسىندا وتكەن رەسەي بىرىنشىلىگىندە استراحان مەملەكەتتىك تەحنيكالىق ۋنيۆەرسيتەتىنىڭ ستۋدەنتى جاننا سارشاەۆا ءۇش التىن مەدالگە يە بولدى.
گروسسمەيستەر 1992-1994 جىلدارى تۋعان قىزدار اراسىندا ءوتكەن تۋرنيرگە قاتىستى. وسى جارىستا رەسەيدىڭ التى وڭىرىنەن كەلگەن 11 دويبىشىنىڭ اراسىندا ول سانكت-پەتەربۋرگتىك سايىن پوپوۆادان جارتى ۇپاي وزىپ, ءبىرىنشى ورىندى يەلەندى.
كەلەسى جارىستا توعىز ويىندا جەڭىپ, ءبىر ويىندا تەڭ تۇسكەن سارشاەۆا مۇمكىن بولعان 10 ۇپايدان 9,5 ۇپاي جينادى. مۇندا ول تاعى دا سول سانكت-پەتەربۋرگتىڭ وكىلدەرىنەن باسىپ وزدى. نەۆا وزەنىنىڭ جاعاسىنان كەلگەن نيكۋ لەوپولدوۆا قازاق قىزىنان جارتى ۇپاي ارتتا قالدى.
رەسەي بىرىنشىلىگىنە بۇدان باسقا استراحان وبلىسىنان جەتى دويبىشى قاتىسقان بولاتىن. سونىڭ ىشىندە امتۋ-ءدىڭ ستۋدەنتى ءماجيت سارشاەۆ 1989-1991 جىلدارى تۋعان جاستار اراسىندا 11 ويىنشىدان وزىپ, قولا جۇلدەگە يە بولسا, 1995 جىلى تۋعان جاسوسپىرىمدەر اراسىندا وتكەن جارىستا كارينا ءابىلوۆا دا ءۇشىنشى ورىنعا تابان تىرەدى.
شورت-ترەك. استاناداعى «الاۋ» سپورت سارايىندا قازاقستان رەسپۋبليكاسىنىڭ I قىسقى جاستار ويىنى اياسىندا شورت-ترەك بويىنشا جارىستار وتۋدە.
وعان الماتى, وڭتۇستىك قازاقستان, قاراعاندى, باتىس قازاقستان, شىعىس قازاقستان وبلىستارى مەن استانا جانە الماتى قالالارىنان 8 كوماندا قاتىسۋدا. جارىستا بارلىعى 81 سپورتشى كۇش سىناسۋدا.
قازىرگى كەزدە 1500 م قاشىقتىق بويىنشا قىزدار مەن ەرلەر اراسىنداعى سىندار باستالىپ كەتتى.
كەشە ونىڭ العاشقى جەڭىمپازدارى انىقتالدى.
1500 مەترلىك قاشىقتىقتا ەرەسەك قىزدار اراسىندا ءبىرىنشى ورىندى اناستاسيا كۋزنەتسوۆا جەڭىپ الدى. ەكىنشى ورىندى يرينا يۋروچكينا, ءۇشىنشى ورىندى اننا سامارينا يەلەندى. ءجاسوسپىرىم قىزدار اراسىندا ءبىرىنشى ورىنعا اناستاسيا كرەستوۆا, ەكىنشى ورىنعا داريا گونچاروۆا, ءۇشىنشى ورىنعا ماريا زينچەنكو يە بولدى.
وسى قاشىقتىقتاعى ەرلەر اراسىنداعى جارىستا باس جۇلدەنى نيكيتا راداەۆ, ەكىنشى ورىندى ماديار نۇرپەيىسوۆ, ءۇشىنشى ورىندى ەرحات قۇباشەۆ جەڭىپ السا, ءجاسوسپىرىم ەر بالالار اراسىندا 2 ءمينوت 54,70 سەكونت كورسەتكىشپەن دەنيس نيكيشا ەشكىمگە دەس بەرمەدى. ودان كەيىنگى ورىندارعا مەرسايد جاقسىباەۆ پەن ستاس يۋروچكين يە بولدى.
بۇگىن 1000 مەترلىك, ەرتەڭ 500 مەترلىك قاشىقتىقتاعى جارىستار وتەدى.
داستان كەنجالين.