الماتىداعى ۇلتتىق ءباسپاسوز كلۋبىندا «بوبەك» قورى «قايىرىمدىلىق اكتسياسىنىڭ قورىتىندىلارى» تاقىرىبىنا ارنالعان ءباسپاسوز ءماسليحاتىن وتكىزىپ, وندا قوردىڭ باسشىلارى, رەسمي وكىلدەرى اتقارىلىپ جاتقان يگى ىستەر جايىندا ەسەپ بەردى.
تاۋەلسىزدىگىمىزدىڭ العاشقى جىلدارى بارشا قاۋىمعا, اسىرەسە جەتىم بالالار مەن اتا-انا قامقورلىعىنان تىس قالعان سابيلەر ءۇشىن اۋىر كەزەڭ بولعانى بەلگىلى. سول تۇستا ەلىمىزدە قوعامدىق قورلار, قوعامدىق نەگىزدە ءىس باستاۋشى توپتار كوپتەپ قۇرىلىپ, قايىرىمدىلىق, ىزگىلىك قولىن سوزعانى ءالى كۇنگە جادىمىزدا. مىنە, سونداي العاشقى قوعامدىق قورلاردىڭ ءبىرى 1992 جىلدىڭ ناۋرىز ايىندا سارا نازارباەۆانىڭ باستاماسىمەن ومىرگە كەلگەن «ءبوبەك» قورى بۇگىنگى كۇنگە دەيىن سول قولداۋىنان ەش اينىعان ەمەس. «...مەن ادامدارعا كومەك بەرە الاتىنىمدى ءتۇسىندىم, ونىڭ ءۇستىنە مەنىڭ جاعدايىم باسقالارعا قاراعاندا وسى ىستە اناعۇرلىم كوپ ءىس تىندىرۋعا مۇمكىندىك تۋدىرادى», – دەگەن ەدى سول جيىندا سارا الپىسقىزى. راسىندا دا, ون توعىز جىل ىشىندە «بوبەك» قايىرىمدىلىق قورى «جەتىمگە اقىل بەرۋشى كوپ, باقىر بەرۋشى از» ۋاقىتتا انا جىلۋى مەن وتباسىنان ايىرىلعان بالالارعا الەۋمەتتىك كومەك بەرۋدە قىرۋار شارۋا اتقاردى. بۇگىندە ونىڭ بارلىعىنىڭ اتىن اتاپ, ءتۇسىن تۇستەپ جاتۋ مۇمكىن ەمەس. قوردىڭ ەڭ باستى ماقساتى – بالالار ۇيلەرى مەن ولارعا ارنالعان ساۋىقتىرۋ مەكەمەلەرىنە كومەك كورسەتۋ بولاتىن. سول كەزدەرى رەسپۋبليكانىڭ بارلىق ايماقتارىنداعى بالالار ءۇيلەرىنە ونداعان توننا گۋمانيتارلىق كومەك جىبەرىلىپ تۇردى.
سارا الپىسقىزى قازاقستانداعى بالالار ۇيلەرىنىڭ باعىت-باعدارىن وزگەرتۋدى دە قولعا الىپ, جەتىم بالالاردى تاربيەلەۋ جۇيەسىنە «SOS كيندەردورف» حالىقارالىق قورىنىڭ وتباسىلىق ۇلگىدەگى جانە جاسوسپىرىمدەر اۋىلىن جاساقتاۋ تاجىريبەسىن ەنگىزگەن بىردەن-ءبىر ادام. ولاردىڭ تۇرمىس-تىرشىلىگىن بىرىڭعاي مودەلدەۋدىڭ ارقاسىندا بۇگىندە بالالار ۇيىندە تاربيەلەنۋشىلەر ماحاببات پەن قامقورلىقتىڭ اياسىندا تاتۋ-ءتاتتى ءومىر سۇرۋدە. بۇل اۋىلدان جەتىم بالالار جاڭا وتباسىلى بولىپ, اتا-انا, وزدەرىنە جاقىن باۋىر تاپتى. سونىڭ ءناتيجەسىندە, «بوبەك» قورىنىڭ جەتەكشىلىگىمەن «وتباسى ۇلگىسىندەگى بالالار اۋىلى جانە ءجاسوسپىرىمدەر ۇيلەرى تۋرالى» قازاقستان رەسپۋبليكاسىنىڭ زاڭى قابىلدانىپ, مەملەكەتتىڭ بالالارعا الەۋمەتتىك كومەك كورسەتۋ جاۋاپكەرشىلىگى مەن قامقورلىعى ارتا ءتۇسكەنى بەلگىلى. ءبىلىم جانە عىلىم مينيسترلىگىندە بالالار قۇقىقتارىن قورعاۋ كوميتەتى مەن ونىڭ وبلىستىق دەپارتامەنتتەرى قۇرىلدى.
قوردىڭ باستى جۇمىسى جەتىم بالالارعا قايىرىمدىلىق كومەك كورسەتۋ بولسا, بۇگىنگى تاڭداعى نەگىزگى باعىتتاردىڭ ءبىرى – جەتىمدەر مەن اتا-اناسىنىڭ قامقورلىعىنسىز قالعان بالالارعا ءبىلىم بەرۋ ءۇشىن قارجى ءبولۋ. ماسەلەن, 2002 جىلدان «بوبەك» قورى اتا-اناسىز جانە از قامتىلعان وتباسىنان شىققان ستۋدەنتتەرگە ءالەۋمەتتىك كومەك بەرە باستادى. وسى جىلدار ىشىندە ارنايى ستيپەنديا تۇرىندە قارجىلىق كومەك الاتىن ستۋدەنتتەردىڭ سانى 30 مىڭنان, ال ولارعا كورسەتىلگەن كومەك قارجىسى 113 ميلليون تەڭگەدەن استى. سارا الپىسقىزى كومەككە مۇقتاج بالا سانىنىڭ ارتقانىن ءبىلىپ, قارجىنى دەپوزيتتىك جۇيەمەن شەشۋدى قولايلى ءتاسىل دەپ تاپتى. بانك دەپوزيتىنە سالىنعان قارجى ءوسىمى, العاشقى سوماسىن جوعالتپاي-اق, بۇگىنگى تاڭدا بالالاردىڭ بارلىق قاجەتتىلىگىن وتەپ كەلەدى.
سارا الپىسقىزى ىزگىلىك قايىرىمدىلىقتىڭ اينىماس بەلگىسى دەپ تانىپ, قاشاندا ءوزىنىڭ تۋعان كۇنىنە كەلگەن قوناقتار اراسىندا جەتىم بالالارعا ارناپ قايىرىمدىلىق اكتسياسىن ۇيىمداستىرۋدى داستۇرگە اينالدىرعان دەسەك, بيىل دا وسىنداي قايىرىمدىلىق اكتسياسىن وتكىزە وتىرىپ, جينالعان قارجىنى قازاقستاندىق بالعىندارعا كومەك رەتىندە بەرۋدى ۇيعاردى. قايىرىمدىلىق كەشتەن جينالعان قارجىدان الماتى قالاسىنداعى №3 بالالار ۇيىندە تاربيەلەنۋشى ءسابيلەر سەنسورلى بولمەلى بولسا, اۋىلدىڭ ەكى بىردەي مەكتەبى اۆتوبۋسقا قول جەتكىزدى. ال دەمەۋشىلەر سىيعا تارقان ەكى اۆتوبۋس گەرمانيادان كەلىپ, ولاردى قاجەت ەتەتىن بالالار ۇيىنە جىبەرىلمەك.
– بۇل جولى دا قور باسشىسى جينالعان قارجىنىڭ ەندىگى ءبىر بولىگىن تاعى دا بالالاردىڭ ءبىلىم الۋى باعىتىنا بەرۋدى ۇيعارىپ, وسى ماقساتپەن دەپوزيتكە اۋدارۋدى قولعا الدى. جاڭا وقۋ جىلى قارساڭىندا ۇزدىك وقىعان مەكتەپ تۇلەكتەرى سارا الپىسقىزى اتىنداعى ءبىلىم گرانتىنا يە بولماق. «ءبوبەك» قورى جەتىم جانە از قامتىلعان وتباسىنان شىققان 64 تالانتتى بالانىڭ ەلىمىزدەگى جوعارى وقۋ ورىندارى مەن كوللەدجدەرىندەگى وقۋ اقىسىن تولەۋدى ءوز موينىنا الىپ وتىر. قازاقستاننىڭ ءار وبلىسىنا 4 گرانتتان بولىنەدى دەپ جوسپارلانۋدا. بۇل قادامدى سارا الپىسقىزىنىڭ انالىق شىنايى ماحابباتىنىڭ ەرەكشە بەلگىسى دەپ تۇسىنەمىز, – دەدى «بوبەك» قورىنىڭ رەسمي وكىلى اقبەرەن ەلگەزەك.
قاشاندا «مەنىڭ اتقارىپ جاتقان ءىس-ارەكەتتەرىم ادامعا دا, اللاعا دا جاعادى دەپ ويلايمىن. «ءبىر جەتىمنىڭ باسىنان سيپاساڭ, قىرىق پەرىشتە ك ۇلىپ تۇرادى»» دەپ ايتۋدان جالىقپاعان سارا الپىسقىزىنىڭ ۇرپاق بولاشاعىنا ارناپ جاساعان يگى ىستەرى كومەك قولىن سوزۋعا مۇمكىندىگى بار ءاربىر قازاقستاندىق ازامات ءۇشىن ۇلگى بولارى ءسوزسىز.
گۇلزەينەپ سادىرقىزى.