ورتالىق كوممۋنيكاتسيالار قىزمەتىندە «ەكسپو-2017» حالىقارالىق كورمەسىنە قاتىسۋشىلاردىڭ ءىىى جينالىسىنىڭ قورىتىندىسىنا ارنالعان ءباسپاسوز ءماسليحاتى ءوتتى.
بريفينگتە حالىقارالىق كورمەلەر بيۋروسىنىڭ (حكب) باس حاتشىسى ۆيسەنتە لوسەرتالەس, قىتاي حالىق رەسپۋبليكاسىنىڭ سەكتسيالار كوميسسارى ۆان تسزينچجەن, ليتۆا رەسپۋبليكاسى سەكتسيالار كوميسسارى روماس يانكۋاس, ەكسپو-2017 كوميسسارى راپيل جوشىباەۆ پەن «استانا ەكسپو-2017» ۇك» اق باسقارما توراعاسىنىڭ ورىنباسارى ەربول شورمانوۆ كورمەگە دايىندىق جۇمىستارى تۋرالى بەردى.
وندا ۆيسەنتە لوسەرتالەس كەشەدەن بەرى ەكسپو كورمەسى وتەتىن جەردە بولىپ, قۇرىلىس جۇمىستارىمەن تانىسقانىن, قازىر كوپتەگەن ەلدەر پاۆيلوندارىن اشۋعا بەلسەنە ارەكەت ەتىپ جاتقانىن ايتتى. سونىمەن بىرگە ول كورمەنىڭ اۋماعىندا شەتەلدىك قوناقتارعا ارنالىپ سالىنعان پاتەرلەردىڭ قۇرىلىسىنا باعاسىن بەرىپ, «استانا ەكسپو-2017» كومپانياسى كورمەگە قاتىسۋشىلاردى باسپانامەن قامتاماسىز ەتۋدە جاقسى جۇمىس ىستەگەنىن اتاپ ءوتتى.
كەزدەسۋدە ەربول شورمانوۆ حالىقارالىق كورمەلەر بيۋروسىنىڭ وكىلىنىڭ سوزىنە قوسىلا كەلىپ, بۇل جەردە 1 374 پاتەردىڭ سالىنعانىن, وندا ۇلتتىق سەكتسيالار كوميسسارلارى, ولاردىڭ وتباسىلارى مەن باسقا دا شەتەلدىكتەردىڭ ورنالاساتىنىن ايتتى. ال كەشەگى جيىن تۋرالى «استانا ەكسپو-2017» ۇك» اق باسقارما توراعاسىنىڭ ورىنباسارى ونىڭ ءتيىستى دەڭگەيدە وتكەنىن, شەتەلدىك كوميسسارلاردىڭ ەلىمىزدىڭ كورمەگە دايىندىعىنا جوعارى باعا بەرگەنىن جەتكىزدى. سونداي-اق, ول جيىندا كورمە كەزىندە بولاشاق ەنەرگياسى سالاسى بويىنشا ەڭ ۇزدىك اتانعان يننوۆاتسيالىق جوباعا 20 000 ەۋرو كولەمىندە سىياقى تاعايىنداۋ تۋرالى شەشىم قابىلداعانىن مالىمدەدى.
–جيىندا كورمەگە قاتىستى بارلىق ماسەلەنى تالقىلادىق. قازىر ەكسپو-عا 115 ەل مەن 18 حالىقارالىق ۇيىم قاتىسۋعا نيەت ءبىلدىرىپ وتىر. كەشەگى باسقوسۋدا ءبىز سولاردىڭ بىرىمەن ىنتىماقتاستىق تۋرالى مەموراندۋمعا قول قويدىق. 2020 جىلى دۋباي قالاسى كەزەكتى ەكسپو كورمەسىن وتكىزەدى. وسىعان بايلانىستى ءبىز بىرىككەن اراب امىرلىكتەرىنىڭ وكىلدەرىمەن ءوزارا تاجىريبە ءبولىسۋ تۋرالى ماسەلەنى تالقىلادىق, – دەدى ول.
داستان كەنجالين,
«ەگەمەن قازاقستان»