ىستامبۇلدا قازاقستاننىڭ ءتۇركياداعى ەلشىسى ج.ءتۇيمەباەۆتىڭ قازاقستاندا 3 ساۋىردە وتكەن كەزەكتەن تىس پرەزيدەنتتىك سايلاۋ تۋرالى تۇرىك جۇرتشىلىعىنا اقپارات بەرۋ ماقساتىنداعى جۇمىس كەزدەسۋى بولدى. وعان تۇرىك رەسپۋبليكاسىنان تاۋەلسىز بايقاۋشىلار رەتىندە قازاقستانداعى كەزەكتەن تىس سايلاۋدىڭ بارىسىن باقىلاعان «گەديز» ۋنيۆەرسيتەتى قامقورشىلىق كەڭەسىنىڭ ءتوراعاسى, تۇركيا ەگەي ايماعىنىڭ بەلدى كاسىپكەرى ابدۋللا كاۆۋك پەن ءتۇركيانىڭ «ەكوەۋرازيا» ەكونوميكالىق زەرتتەۋلەر قاۋىمداستىعىنىڭ وكىلى, «يەني چاگ» گازەتىنىڭ شولۋشىسى كۇرشات زورلۋ قاتىستى.
ەلشىنىڭ اقپاراتىنان كەيىن سويلەگەن ك.زورلۋ قازاقستاننىڭ ورتالىق ازياداعى ەڭ تۇراقتى مەملەكەت بولىپ تابىلاتىندىعىن اتاپ ءوتىپ, ەكى ەل اراسىنداعى ساياسي, ەكونوميكالىق, مادەني ىنتىماقتاستىقتىڭ جوعارى دەڭگەيىن جانە تۇركيانىڭ ءوزارا قاتىناستاردى ودان ءارى بەلسەندى دامىتۋعا ءجاردەمدەسۋ نيەتىن اتاپ ءوتتى. ول قر پرەزيدەنتى ن.نازارباەۆتىڭ تۇركىتىلدەس مەملەكەتتەر ىنتىماقتاستىعىن تەرەڭدەتۋگە قوسقان ۇلەسىن جوعارى باعالادى. ك.زورلۋ 3 ءساۋىردە الماتىدا قالانىڭ ءار ءتۇرلى اۋداندارىنداعى 10-نان استام سايلاۋ ۋچاسكەلەرىندە بولعانىن جانە قانداي دا ءبىر زاڭ بۇزۋشىلىقتاردىڭ بايقالماعانىن ايتتى.
كەزدەسۋ بارىسىندا ءسوز ءسويلەگەن جانە استاناداعى سايلاۋ بارىسىن باقىلاعان ابدۋللا كاۆۋك سايلاۋ كۇنى قازاقستانداعى اۋا رايىنىڭ قولايسىزدىعىنا قاراماستان, سايلاۋشىلاردىڭ قاتىسۋ دەڭگەيىنىڭ جوعارى بولعانىن اتاپ ءوتتى. «3 ساۋىردە قازاقستاندا وتكەن كەزەكتەن تىس سايلاۋ اشىق, دەموكراتيالىق تۇرعىدا ءوتتى جانە بارلىق حالىقارالىق ستاندارتتارعا سايكەس بولدى», دەپ قورىتىندى جاسادى تۇرىك بايقاۋشىسى.