مەملەكەت باسشىسىنىڭ تاپسىرماسىنا سايكەس, اۋىلشارۋاشىلىعى ونىمدەرىن ەكسپورتقا شىعارۋ – قىزىلوردا وبلىسىنىڭ وتكەن جانە الدىڭعى جىلدارداعى باسىم باعىتتارىنىڭ ءبىرى. بۇل تۋرالى وبلىس اكىمى قىرىمبەك كوشەرباەۆ 15 اقپانداعى تۇرعىندارعا ەسەپتى كەزدەسۋىندە باياندادى.
مىسالى وتكەن جىلى شيەلى اۋدانىندا قۋاتتىلىعى تاۋلىگىنە 400 ليتر شۇبات وندىرەتىن تسەح ىسكە قوسىلدى. قىزىلوردا قالاسىندا جارتىلاي فابريكات ەت ونىمدەرىنىڭ فابريكاسى, ال, سىرداريا اۋدانىندا جىلىنا 250 توننا ءونىم شىعاراتىن ەت كومبيناتى بار 10 مىڭ باس قوزى وسىرەتىن كەشەن سالىندى.
- بۇگىنگى تاڭدا تۇتىناتىن قۇس ەتىنىڭ بارلىق كولەمىن وبلىستان تىس جەردەن اكەلەتىنىمىزدى ەسكەرىپ, يمپورتتى اۋىستىرۋ ماسەلەسىندەگى جۇمىستاردى بەلسەندى جۇرگىزە باستادىق. قۇس ەتى وندىرىسىندەگى جوبالاردى جۇزەگە اسىرۋشىلاردى ىنتالاندىرا باستادىق. رەسپۋبليكالىق ينۆەستيتسيالىق ورتالىق قارجىسى ەسەبىنەن سىرداريا اۋدانىندا ۇيرەك پەن قاز وسىرەتىن قۇس فەرماسىنىڭ جوباسىن نەسيەلەندىردىك (قازىردىڭ وزىندە وسى فەرمادا 10 مىڭ باستان استام قۇس وسىرىلۋدە),- دەدى وبلىس اكىمى ەسەپتى كەزدەسۋ بارىسىندا.
وبلىستىڭ اگرارلىق سەكتورى شەتەلدىك ينۆەستورلار ءۇشىن دە قولايلى بولا تۇسۋدە. سونداي بىرلەسكەن جوبالاردىڭ ءبىرى – 2018 جىلى جاڭاقورعان اۋدانىندا تومات پاستاسىن شىعاراتىن زاۋىتتى ىسكە قوسۋ جوسپارلانۋدا. سونداي-اق, جاڭاقورعان اۋدانىندا جىلىنا 100 مىڭ توننا كەشەندى مينەرالدىق تىڭايتقىشتار وندىرەتىن زاۋىت قۇرىلىسىن باستاۋ جوسپارلانىپ وتىر. ال, ارال اۋدانىندا تۇيە ءسۇتىن وڭدەۋ زاۋىتى سالىنباق. قازىر بۇل جوبالار شەتەلدىك ينۆەستورلارمەن بىرگە ازىرلەنۋ ۇستىندە.
- باقشا داقىلدارى ونەركاسىبى ءوندىرىسىن قالپىنا كەلتىرۋدەمىز. كوپ جىلداردان كەيىن, العاش رەت 2016 جىلى ءبىزدىڭ قاۋىندارىمىز رەسەي مەن قىرعىزستانعا ەكسپورتتالا باستادى. بيىلعى جىلى باقشا داقىلدارىنىڭ كولەمىن ءتىپتى ۇلعايتۋدى جوسپارلاپ وتىرمىز,- دەدى وبلىس اكىمى.