سىر ەلىندە مىڭنان اسا ادام يندۋستريالاندىرۋ كارتاسىنداعى جوبالار اياسىندا جۇمىسقا ورنالاستىرىلدى. بۇل جونىندە قىزىلوردا وبلىسىنىڭ اكىمى قىرىمبەك كوشەرباەۆ 15 اقپاندا حالىقپەن ەسەپتى كەزدەسۋىندە حابارلادى.
وبلىستىڭ يندۋستريالاندىرۋ كارتاسى اياسىندا جۇزەگە اسىرىلعان 27 جوبانىڭ بۇگىندە 21-ءى ءونىم وندىرۋدە. جاڭا كاسىپورىنداردا بۇگىنگى كۇنى مىننان اسا ادام ەڭبەك ەتۋدە. بۇل جاقسى كورسەتكىش ەكەنىن ايماق باسشىسى اتاپ ءوتتى.
«وكىنىشكە قاراي, جوبالاردى جۇزەگە اسىرۋ تۋرالى شەشىم قابىلدار كەزەڭدە بارلىق تاۋەكەلدى ەسكەرۋ قيىن. سوندىقتان كارتا شەڭبەرىندە جۇزەگە اسىرىلعان 6 جوبا بويىنشا ولاردى جوسپارلى قۋاتىنا جەتكىزۋ ءۇشىن دەربەس جۇمىس جۇرگىزۋدەمىز. مىسالى, ءبىز جالاعاشتاعى ميا تامىرىن وڭدەۋ جوباسى بويىنشا ينۆەستوردى الماستىردىق. جاڭا ينۆەستور جاڭا قوندىرعىلاردى الىپ كەلدى. ءبىز زاۋىتقا شيكىزاتپەن كومەكتەستىك. ناتيجەسىندە 2017 جىلدىڭ قاڭتارىندا العاشقى 20 توننا ءونىمدى ەكسپورتقا (قحر) جىبەردىك», – دەپ مالىمدەدى وبلىس اكىمى.
«سونىمەن بىرگە, مەملەكەت پەن بيزنەستىڭ اۋقىمدى قارجىلارىن تەككە جۇمساماۋ ءۇشىن 2016 جىلى جوبالارعا سۇرىپتاۋ جۇرگىزىپ, يندۋستريالاندىرۋ يدەياسىنا سايكەس كەلمەيتىن جوبالاردى كارتادان الىپ تاستادىق», – دەدى قىرىمبەك كوشەرباەۆ.