قازىرگى ۋاقىتتا ۆاليۋتا نارىعىندا تۇراقتىلىق بايقالادى, دەپ جازادى 24.kz.
بۇدان باسقا, تەڭگەنىڭ باعامى سىرتقى ەكونوميكالىق جاعدايلاردىڭ جاقسارۋىنا وراي نىعايىپ وتىر. بۇل تۋرالى بۇگىن قازاقستان ۇلتتىق بانكىنىڭ توراعاسى دانيار اقىشەۆ «2017-2019 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىنا وزگەرىستەر ماسەلەلەرى جونىندەگى باياندامادا سويلەگەن سوزىندە قر پارلامەنتى ءماجىلىسىنىڭ دەپۋتاتتارىنا حابارلادى.
«ايىرباستاۋ باعامىنىڭ ەركىن وزگەرمەلى رەجيمىنە وتكەننەن جانە ەكونوميكا سۋبەكتىلەرى جاڭا جاعدايلارعا بەيىمدەلگەننەن كەيىن ايىرباستاۋ باعامى وبەكتيۆتى فاكتورلارعا سايكەس كەلەدى جانە وندىرۋشىلەرىمىزدىڭ باسەكەگە قابىلەتتىلىگىن قامتاماسىز ەتەدى. مۇنىڭ ءبارى ۇلتتىق بانكتىڭ ۆاليۋتا نارىعىنا ارالاسپاۋى اياسىندا بولىپ وتىر. ءبىز 2016 جىلعى قىركۇيەكتەن باستاپ ينتەرۆەنتسيا جۇرگىزبەيمىز», – دەپ اتاپ ءوتتى د.اقىشەۆ.
ونىڭ ايتۋىنشا, مۇنداي ساياسات التىن-ۆاليۋتا رەزەرۆتەرىن ساقتاۋعا مۇمكىندىك بەرەدى. ماسەلەن, ۇلتتىق بانك باسشىسى حابارلاعانداي, قاڭتاردىڭ سوڭىندا ۇلتتىق قوردىڭ ۆاليۋتا اكتيۆتەرىن قوسا العاندا ەلدىڭ جالپى رەزەرۆتەرى دەرلىك 92 ملرد دوللارعا جەتتى.
«بۇل 2015 جىلدىڭ سوڭىنداعى دەڭگەيدەن جوعارى», – دەپ قورىتىندىلادى ول.