WBA (Super) جانە IBO تۇجىرىمدارى بويىنشا جەڭىل سالماقتاعى جاڭا الەم چەمپيونى قازاقستاندىق جانات جاقيانوۆ (27-1, 18 كو) بۇگىن, 15 اقپاندا قازاقستانعا ورالدى, دەپ حابارلايدى vesti.kz.
جاناتتى پەتروپاۆلدا ايەلى مەن كىشكەنتاي قىزى كۇتىپ وتىر. ال بوكسشىنى استانادا جانكۇيەرلەرى كۇتىپ العان. جانكۇيەرلەرىنىڭ ىستىق ىقىلاسىنا بولەنگەن ول الداعى ەكى ايدا ۋاقىتىن تەك دەمالىسقا بولەتىنىن ايتتى. «الەمدىك تيتۋلدى قورعاعاننان ونى جەڭىپ العان وڭايىراق شىعار. سەبەبى, مۇنداي جەتىستىككە اركىمنىڭ-اق بار تالاسى. ەندى مەن كەم دەگەندە ەكى اي دەمالىپ, سودان كەيىن كومانداممەن جانە مەنەدجەرىممەن بىرگە الداعى جەكپە-جەگىم جايلى اقىلداسامىن», – دەدى جاقيانوۆ.
بۇعان دەيىن استانادا ەكسپو كورمەسىنىڭ اياسىندا بوكس كەشى ۇيىمداستىرىلاتىنى جايلى ايتىلعان بولاتىن. «بوكس كەشىنە قاتىساتىنىم ازىرگە بەلگىسىز. قازىر كەلىسسوزدەر جۇرگىزىلىپ جاتقانى راس. بىراق كەسىپ ەشنارسە ايتا المايمىن», – دەدى بوكسشى.
دەگەنمەن, وسى ۋاقىتتا بوكسشىنىڭ باپكەرى ريككي حاتتون كەلەسى قارسىلاسىنىڭ اتى-ءجونىن ايتىپ ۇلگەردى. ونىڭ ايتۋىنشا, قازاقستاندىق بوكسشى تيتۋلىن قورعاۋ ءۇشىن ۇلىبريتانيانىڭ بوكسشىسى دجەيمي ماكدوننەللمەن (29-2-1, 13 كو) جۇدىرىقتاسادى. ماكدوننەلل – وسى كاتەگوريادا WBA تۇجىرىمى بويىنشا تۇراقتى چەمپيونى.
ايتا كەتەيىك, 11 اقپاندا جانات جاقيانوۆ اقش-تىڭ تولەدو قالاسىندا امەريكالىق روۋشي ۋوررەنمەن جۇدىرىقتاسىپ, 12 راۋندتىڭ قورىتىندىسى بويىنشا جەڭىسكە جەتكەن. وسى جەڭىسىنىڭ ارقاسىندا WBA (Super) جانە IBO تۇجىرىمدارى بويىنشا جاڭا الەم چەمپيونى اتاندى.