قر ينۆەستيتسيالار جانە دامۋ مينيسترلىگىنىڭ قۇرىلىس جانە تۇرعىن ءۇي شارۋاشىلىعى جونىندەگى كوميتەت توراعاسى مارحابات جايىمبەتوۆتڭ ايتۋىنشا, الداعى 15 جىلدىڭ ىشىندە «نۇرلى جەر» مەملەكەتتىك باعدارلاماسى بويىنشا كەزەكتە تۇرعان ازاماتتارعا 630 مىڭ جەر ۋچاسكەسىن تاراتۋ جوسپارلانىپ وتىر, دەپ حابارلايدى قازاقپارات.
«جەر بەرىلەدى. بىراق ول جەرگە ينجەنەرلىك جەلىلەر تارتىلۋى قاجەت. ەلباسىنىڭ تاپسىرماسى بويىنشا جىل سايىن 80 ملرد تەڭگە سول ينفراقۇرىلىمدى تارتۋعا ءبولىنىپ جاتىر. ونداي قارجى ءبىرىنشى رەت بەرىلىپ وتىر. بيىل ول قاراجاتتىڭ كولەمى 80 ملرد-تان كوپ, 86 ملرد بەرۋدەمىز. اقشانى اكىمدىكتەرگە ۇلەستىردىك. ەندى ولار ينجەنەرلىك جەلىلەردى تارتىپ, حالىققا بەرۋى كەرەك», - دەدى جايىمبەتوۆ.
كوميتەت باسشىسىنىڭ ايتۋىنشا, وتكەن جىلى 100 ملرد-تان استام قارجى بولىنگەن. وسى اقشاعا 110 مىڭ جەر ۋچاسكەسىنە ينفراقۇرىلىم تارتىلۋى قاجەت.
«ەندى, سول 110 مىڭ ۋچاسكەنىڭ شامامەن 53 مىڭى - بۇرىن بەرىلگەن جەرلەر (ول جەرلەر ينجەنەرلىك جەلىلەرسىز بەرىلدى). ال 47 مىڭ جەر ۋچاسكەسى جاڭادان جاساقتالۋى شارت. بيىلعا تاعى 86 ملرد. تەڭگە, ءسويتىپ اعىمداعى جىلى ول جۇمىستى (جاڭا ۋچاسكەلەردى جاساقتاۋدى - اۆت.) اياقتايدى. وسىلايشا, ءبىزدىڭ جوسپارىمىزعا سايكەس, رەسپۋبليكا بويىنشا جىل سايىن 42 مىڭ جەر ۋچاسكەسى تاراتىلادى. ال الداعى 15 جىلدىڭ ىشىندە 630 مىڭداي ۋچاسكە بەرىلەتىنى كۇتىلۋدە. بيىل اكىمدىكتەر جاڭاعى ايتقان 47 مىڭ جەر ۋچاسكەسىنىڭ ينفراقۇرىلىمىن اياقتاۋى ءتيىس. ەندى, قارجى بولىنسە, ودان دا كوپ بولادى», - دەپ اتاپ كورسەتتى جايىمبەتوۆ.