رەسەيدىڭ تۆەر وبلىسىنداعى رجەۆ قالاسىنىڭ باسشىسى الەكساندر ششەتينين قازاقستان ەلشىسى زاۋىتبەك تۇرىسبەكوۆتىڭ اتىنا حات جولداپ, بارشا قازاقستاندىقتاردى نۇرسۇلتان نازارباەۆتىڭ سايلاۋداعى زور جەڭىسىمەن قۇتتىقتادى. «قازاقستان حالقى تۇراقتىلىقتى ساقتاۋدى, قوعامنىڭ جاڭارۋىن جانە مەملەكەتتىڭ سەرپىندى دامۋىن قولداپ, ءوز ەركىن ءبىلدىردى»,– دەپ جازادى ول.
وتكەن جىلى قازاقستان پرەزيدەنتىنىڭ تاپسىرماسىنا سايكەس «نۇر وتان» پارتياسىنىڭ, اقتوبە وبلىسى اكىمدىگىنىڭ قولداپ, كومەكتەسۋىمەن رجەۆ قالاسىندا قازاقستاندىق 100 جانە 101-دەربەس اتقىشتار بريگادالارىنىڭ قازا تاپقان جاۋىنگەرلەرىنە ارنالىپ, ەڭسەلى ەسكەرتكىش تۇرعىزىلدى. ەلشىلىك ديپلوماتتارى رەسەي فەدەراتسياسى قورعانىس ءمينيسترلىگىنىڭ ورتالىق مۇراعاتىنان قازاقستاندىق 10 مىڭ جاۋىنگەردىڭ اتى-ءجونىن تاۋىپ, بۇل ەسىمدەر كەشەننىڭ گرانيت قابىرعاسىنا ويىپ جازىلعان بولاتىن.
«وسى مەموريالدىق كەشەن ورناتىلعاننان بەرى ءبىزدىڭ ءوزارا دوستىعىمىز بۇرىنعىدان دا نىعايا ءتۇستى, – دەيدى رجەۆ قالاسىنىڭ باسشىسى. – قازىر بارلىق رجەۆتىكتەر قازاقستان پرەزيدەنتى نۇرسۇلتان نازارباەۆتىڭ سايلاۋداعى جەڭىسىمەن قازاقستاندىقتاردىڭ وسىناۋ بۇكىلحالىقتىق قۋانىشىنا ورتاقتاستىعىن بىلدىرۋدە».
جاقسىلىق جاقسىلىقتى شاقىرادى دەگەن راس ەكەن. رجەۆ قالالىق دۋماسى قازاقستان ەلشىلىگىنىڭ ۇسىنىسىن قولداپ, وسى قالاداعى جالپى ءبىلىم بەرەتىن №5 ورتا مەكتەپكە قازاقستاندىق 100 جانە 101-دەربەس اتقىشتار بريگادالارىنىڭ اتىن بەردى. بۇل ءبىلىم ۇياسى بۇدان بىلاي «تۆەر وبلىسىنىڭ رجەۆ قالاسىنداعى 100 جانە 101-دەربەس اتقىشتار بريگادالارى جاۋىنگەرلەرى اتىنداعى جالپى ءبىلىم بەرەتىن №5 ورتا مەكتەپ» دەپ اتالاتىن بولدى.
رجەۆ قالاسى باسشىسىنىڭ پىكىرىنشە, اتالعان شەشىم ۇلى وتان سوعىسىندا قازا تاپقان قاھارمان جاۋىنگەرلەر ەسىمىن ماڭگى ەستە قالدىرۋ جولىنداعى قازاقستان مەن رەسەي مەملەكەتتەرى اتقارىپ كەلە جاتقان بىرلەسكەن جۇمىستى داستۇرگە اينالدىرىپ, ەكى ەلدىڭ اراسىندا قالىپتاسقان تاريحي بايلانىستاردى نىعايتۋعا, جاستاردى پاتريوتتىق رۋحتا ءتاربيلەۋگە قىزمەت ەتەدى.
ەلشىلىك قازىر تۆەر وبلىسى اۋماعىندا سوعىسقان تاعى دا 6 قازاقستاندىق اسكەري قۇرامالاردىڭ جاۋىنگەرلەرى تۋرالى دەرەكتەر ىزدەستىرۋ جۇمىسىن جالعاستىرۋدا. سونداي-اق ەلشىلىكتىڭ وسى وڭىردە رجەۆ-ۆيازەمسك شايقاسىنىڭ مۇراجايىن قۇرۋ تۋرالى باستاماسىن «ەدينايا روسسيا» پارتياسىنىڭ باسشىلىعى, ماسكەۋ مەرياسى, تۆەر وبلىسىنىڭ اكىمشىلىگى, تاتارستان جانە ياكۋتيا رەسپۋبليكالارىنىڭ باسشىلىعى قولدادى. اتالعان جوبا «نۇر وتان» جانە «ەدينايا روسسيا» پارتيالارىنىڭ قامقورلىعى اياسىندا ماسكەۋ ءتۇبىندەگى شايقاستىڭ 70 جىلدىعىنا وراي جۇزەگە اسىرىلادى.
سەرىكقالي بايمەنشە, «ەگەمەن قازاقستان» – ماسكەۋدەن.