«استانا» فۋتبول كلۋبىنىڭ ويىنشىسى نەمانيا ماكسيموۆيچ يسپانيانىڭ «ۆالەنسيا» ۇجىمىنا تەگىن اۋىساتىن بولدى. بۇل تۋرالى vesti.kz حابارلادى.
باستاپقىدا ترانسفەرلىك قۇنى 300 مىڭ ەۋرونى قۇراۋى مۇمكىن دەگەن اقپارات تاراعان. الايدا, «Plaza Deportivo» باسىلىمىنىڭ مالىمەتى بويىنشا ونىڭ ەلوردالىق كوماندامەن كەلىسىمشارتى اياقتالعانشا كۇتەتىنى بەلگىلى بولدى. بىرەر اپتا بۇرىن سەرديالىق ويىنشى جاڭا كومانداسىمەن الدىن الا 2021 جىلعا دەيىن ورتاق كەلىسىمگە كەلگەن. وسى ۋاقىت ارالىعىندا ول بارلىعى 7 ميلليون ەۋرو كولەمىندە جالاقى الادى.
نەمانيا ماكسيموۆيچ «استانا» ساپىنا ەكىنشى وقۋ-جاتتىعۋ جيىنى كەزىندە قوسىلادى. كوماندانىڭ دۋبايدا وتكىزگەن ءبىرىنشى وقۋ-جاتتىعۋ جيىنىنا قاتىسقان جوق.
ايتا كەتەيىك, جارتىلاي قورعاۋشى «استانادا» 2015 جىلدىڭ اقپان ايىنان باستاپ ويناپ كەلەدى. ەكى ماۋسىم ارالىعىندا ەكى رەت ەل چەمپيونى اتانىپ, ءبىر رەت قازاقستان كۋبوگىن جەڭىپ العان. سونىمەن قاتار, چەمپيوندار ليگاسى مەن ەۋروپا ليگاسىنىڭ توپتىق كەزەڭىندە وينادى. ال 2015 جىلى سەربيا جاستار قۇراماسىمەن الەم چەمپيونى اتانعان.